ବୈଷୟିକ ଶିକ୍ଷାରେ ଏକ ତୃତୀୟାଂଶ ବାଳିକା ସ୍ନାତକ ନିଶ୍ଚିତ କରିବା ସରକାରଙ୍କ ଉଦ୍ଦେଶ୍ୟ: ମୁଖ୍ୟମନ୍ତ୍ରୀ
ଭୁବନେଶ୍ବର: ରାଜ୍ୟର ବୈଷୟିକ ଶିକ୍ଷା ଓ ପରେ ଶିକ୍ଷାନୁଷ୍ଠାନରେ ମହିଳାଙ୍କ ନିଯୁକ୍ତିକୁ ରାଜ୍ୟ ସରକାର ପ୍ରାଥମିକତା ଦେଉଛନ୍ତି। ରାଜ୍ୟ ସରକାରଙ୍କ ‘ସୁଦକ୍ଷା’ ଯୋଜନା ପାଇଁ ଆଇଟିଆଇରେ ବାଳିକାଙ୍କ ନାମଲେଖା ଗତ ୫ବର୍ଷରେ ୬ ପ୍ରତିଶତରୁ ୧୮ ପ୍ରତିଶତକୁ ବୃଦ୍ଧି ପାଇଛି। ତେଣୁ ବୈଷୟିକ ଶିକ୍ଷାରେ ଅତିକମ୍ରେ ଏକ ତୃତୀୟାଂଶ ବାଳିକା ସ୍ନାତକ ନିଶ୍ଚିତ କରିବା ରାଜ୍ୟ ସରକାରଙ୍କ ଉଦ୍ଦେଶ୍ୟ ରହିଛି ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଜାତିସଂଘର ମହିଳା ପ୍ରତିନିଧି ସୁଜାନ ଜେନ୍ ଫର୍ଗୁସନ ଆଜି ନବୀନ ନିବାସରେ ମୁଖ୍ୟମନ୍ତ୍ରୀଙ୍କୁ ଭେଟି ମହିଳା ସଶକ୍ତୀକରଣ ସମ୍ବନ୍ଧୀୟ ବିଭିନ୍ନ ପ୍ରସଙ୍ଗରେ ଆଲୋଚନା କରିଛନ୍ତି। ଆଲୋଚନା ସମୟରେ ମୁଖ୍ୟମନ୍ତ୍ରୀ କହିଥିଲେ ଯେ, ନିକଟରେ କାରଖାନା ଗୁଡ଼ିକରେ ମହିଳାମାନଙ୍କ ସଂପୃକ୍ତି ବୃଦ୍ଧି ପାଇଛି। ତେଣୁ ଜାତିସଂଘ ମହିଳାମାନେ ଉନ୍ନତ ମାନର ଆବାସ ଓ କ୍ରେଚ୍ ଭଳି ସୁବିଧା ସୁନିଶ୍ଚିତ କରିବା ଦିଗରେ ଉଦ୍ୟମ କରିବା ଜରୁରୀ। ଯେଉଁ ମହିଳାମାନେ ସେମାନଙ୍କର ଶିକ୍ଷା ସମାପ୍ତ କରିପାରି ନାହାନ୍ତି ସେମାନେ ରାଜ୍ୟ ସରକାରଙ୍କ ସହଯୋଗରେ ଜାତିସଂଘ ମହିଳାମାନଙ୍କ ଦ୍ବିତୀୟ ସୁଯୋଗ କାର୍ଯ୍ୟକ୍ରମରେ ଅଂଶଗ୍ରହଣ କରିବା ଉପରେ ମୁଖ୍ୟମନ୍ତ୍ରୀ ସହାୟତା ଲୋଡ଼ିଛନ୍ତି। ଫଳରେ ଚାକିରି ବଜାରରେ ସେମାନଙ୍କ ଦକ୍ଷତାର ପୁନଃ ବିକାଶ ଦିଗରେ ଏହା ସହାୟକ ହୋଇପାରିବ। ବିଶ୍ବ ଦକ୍ଷତା କେନ୍ଦ୍ର ଭଳି ବିଶ୍ବସ୍ତରୀୟ ପ୍ରକଳ୍ପ କାର୍ଯ୍ୟ କରୁଛି। ତେଣୁ ମହିଳାଙ୍କ ଅଂଶଗ୍ରହଣ ବଢ଼ିବା ଓ ଲିଙ୍ଗଗତ ସମାନତା ପାଇଁ ଜାତିସଂଘ ମହିଳାମାନେ ଏଭଳି ଅନୁଷ୍ଠାନ ସହିତ ଅଂଶୀଦାର ହେବା ଉଚିତ୍ ବୋଲି ମୁଖ୍ୟମନ୍ତ୍ରୀ କହିଥିଲେ। ଶ୍ରୀମତୀ ଫର୍ଗୁସନ୍ ମହିଳା ସଶକ୍ତୀକରଣ କ୍ଷେତ୍ରରେ ରାଜ୍ୟ ସରକାରଙ୍କ ପଦକ୍ଷେପକୁ ପ୍ରଶଂସା କରିଥିଲେ।
ରାଜ୍ୟରେ ମହିଳା ସଶକ୍ତୀକରଣରେ ମିସନ ଶକ୍ତିର ପ୍ରଭାବଶାଳୀ ଭୂମିକା ରହିଛି। ଏହାସହ ରାଜ୍ୟରେ ଦ୍ରୁତ ଗତିରେ ଦାରିଦ୍ର୍ୟ ହ୍ରାସକୁ ସେ ପ୍ରଶଂସା କରିଥିଲେ। ଆଲୋଚନା ସମୟରେ ମୁଖ୍ୟମନ୍ତ୍ରୀଙ୍କ ସଚିବ ଭି.କେ ପାଣ୍ଡିଆନ୍ ଉପସ୍ଥିତ ଥିଲେ। ପରବର୍ତୀ ସମୟରେ ଶ୍ରୀମତୀ ଫର୍ଗୁସନ ଓଡ଼ିଶା ଦକ୍ଷତା ବିକାଶ ପ୍ରାଧିକରଣର ଅଧ୍ୟକ୍ଷ ସୁବ୍ରତ ବାଗ୍ଚୀଙ୍କ ସହ ସାକ୍ଷାତ କରିଥିଲେ। ଓଡ଼ିଶା ଦକ୍ଷତା ବିକାଶ ପ୍ରାଧିକରଣ ଜାତିସଂଘ ମହିଳାଙ୍କ ସହ ବିଭିନ୍ନ ପଦକ୍ଷେପ ନେଇ ସହଭାଗିତା ପାଇଁ ଏକ ବୁଝାମଣାପତ୍ର ସଂପାଦନ କରିଛନ୍ତି। ବୁଝାମଣାର ଅଂଶ ଭାବେ ରାଜ୍ୟର ୧୦ଟି ଆକାଂକ୍ଷୀ ଜିଲ୍ଲାରେ ମିସନ ଶକ୍ତି ବିଭାଗ ଅଧୀନରେ ମହିଳା ସ୍ବୟଂ ସହାୟକ ଗୋଷ୍ଠୀଙ୍କୁ ସେମାନଙ୍କ ଉତ୍ପାଦର ଅନଲାଇନ ବିକ୍ରୟ ପାଇଁ ଇ-କମର୍ସ ପ୍ଲାଟଫର୍ମ ସହିତ ସଂଯୋଗକୁ ସୁଗମ କରିବା ପାଇଁ ଡିଜିଟାଲ ମାର୍କେଟିଂ ଓ ଔଦ୍ୟୋଗିକତା ଉପରେ ତାଲିମ ପ୍ରଦାନ କରାଯିବ। ଜାତିସଂଘ ମହିଳା ସରକାରୀ ଆଇଟିଆଇ ବାଲେଶ୍ବର, ବ୍ରହ୍ମପୁର, ରାଉରକେଲାର ମହିଳା ଫୁଟବଲ ଦଳ ଓ ଗୋପବନ୍ଧୁ ଆଇଟିଆଇ, କୋରାପୁଟ ଓ ସରକାରୀ ଆଇଟିଆଇ, ବଲାଙ୍ଗୀରଠାରେ ଭଲିବଲ କୋର୍ଟ ପାଇଁ ସହଯୋଗ କରିବ। ରାଜଧାନୀସ୍ଥିତ ବିଶ୍ବ ଦକ୍ଷତା କେନ୍ଦ୍ରରେ ମହିଳାଙ୍କୁ ମୁଖ୍ୟସ୍ରୋତରେ ସାମିଲ କରିବା ନେଇ ନୀତି, ପାଠ୍ୟକ୍ରମ ଓ ନିଯୁକ୍ତି ପାଇଁ କାର୍ଯ୍ୟ ଆରମ୍ଭ ହେବ। ମୟୂରଭଞ୍ଜ, ରାୟଗଡ଼ା ଓ ଢେଙ୍କାନାଳ ଜିଲ୍ଲର ସରକାରୀ ଆଇଟିଆଇ ଓ ପଲିଟେକ୍ନିକ ମାନଙ୍କରେ ସେକେଣ୍ଡ ଚାନ୍ସ ଏଜୁକେସନ୍ କାର୍ଯ୍ୟକ୍ରମ କାର୍ଯ୍ୟକାରୀ ହୋଇଛି। ସାକ୍ଷାତ କାର୍ଯ୍ୟକ୍ରମରେ ବୈଷୟିକ ଶିକ୍ଷା ଓ ପ୍ରଶିକ୍ଷଣ ନିର୍ଦେଶାଳୟର ନିର୍ଦେଶକ ରେଘୁ ଜି., ରାଷ୍ଟ୍ରୀୟ କାର୍ଯ୍ୟକ୍ରମ ପ୍ରବନ୍ଧକ, ଏସ୍ସିଇ, ଜାତିସଂଘ ମହିଳା କାନ୍ତା ସିଂ, ବୈଷୟିକ ପରାମର୍ଶଦାତା(ଜେଣ୍ଡର) ସ୍ମିତା ଜଗଦେବ ଓ ଅତିରିକ୍ତ ସଚିବ ପିନାକୀ ପଟ୍ଟନାୟକ ପ୍ରମୁଖ ଉପସ୍ଥିତ ଥିଲେ।