ଭୁବନେଶ୍ବର: ପିଏମ୍ କିଷାନ ଓ ଆର୍‌ଟିଓ ରେଜିଷ୍ଟ୍ରେସନ୍‌ ନାଁରେ ଏପିକେ ଫାଇଲ୍‌ କରି ସାଇବର୍‌ ଲୁଟ୍ ହୋଇଛି। ବିଭିନ୍ନ ହ୍ବାଟ୍‌ସଆପ୍‌ ଗ୍ରୁପ୍‌ରେ ଏପିକେ ଫାଇଲ ପଠାଇ ସାଇବର୍‌ ଠକ ଆକାଉଣ୍ଟରୁ ଟଙ୍କା ଖାଲିକରି ନେଉଥିବା ଅଭିଯୋଗ ହୋଇଛି। ଆପ୍ଲିକେସନ୍‌କୁ ଡାଉନ୍‌ଲଲୋଡ୍‌ କରି ୧୦ଲକ୍ଷରୁ ଅଧିକ ଟଙ୍କା ଠକେଇ ହୋଇଛି। ବିଭିନ୍ନ ସ୍କିମ୍‌ ନାଁରେ ସାଧାରଣ ଲୋକଙ୍କୁ ଫସାଇ ମୋବାଇଲ ହ୍ୟାକ୍‌ କରି ଏପରି ଲୁଟ୍‌ କରାଯାଇଛି। ବିନା ଓଟିପି, ପିନ୍‌ ନମ୍ବରରେ ଲୁଟେରା ଆଖି ପିଛୁଳାକେ ଆକାଉଣ୍ଟ ଖାଲି ହୋଇଯାଉଛି। ଦୁଇସପ୍ତାହ ଭିତରେ ସାଇବର୍‌ ଥାନାରେ ଏଭଳି ୧୫ରୁ ଅଧିକ ଅଭିଯୋଗ ରୁଜୁ ହୋଇଛି। ଯାହା ଏବେ ସାଇବର୍‌ ଥାନାର ଚିନ୍ତା ବଢ଼ାଇଛି।
ରାଜଧାନୀର ବ୍ୟବସାୟୀ ସନ୍ତୋଷ ପତିଙ୍କ ମୋବାଇଲ୍‌କୁ ପିଏମ୍‌ କିଷାନ୍‌ ‌ଯୋଜନା ଲିଙ୍କ୍‌ ଆସିଥିଲା। ସରକାରୀ ସୂଚନା ଭାବି ସେ ଏହାକୁ ଡାଉନ୍‌ଲୋ଼ଡ୍‌ କରିଥିଲେ। ଆପ୍ଲିକେସନ୍‌ ଡାଉନ୍‌ଲୋଡ୍‌ କରିବାର ଦୁଇଦନ ପରେ ତାଙ୍କ ଆକାଉଣ୍ଟରୁ ୩ଲକ୍ଷ ୭୦ହଜାର ଟଙ୍କା ଗାଏବ ହୋଇଯାଇଥିଲା। ସେହିଭଳି ବିଶ୍ବାସ ସାହୁଙ୍କ ଆକାଉଣ୍ଟରୁ ମଧ୍ୟ ଅଢ଼େଇ ଲକ୍ଷ ଟଙ୍କା ଠକେଇ ହୋଇଛି। କେବଳ ପିଏମ୍‌ କିଷାନ୍‌ ଯୋଜନା ନୁହେଁ, ଆର୍‌ଟିଓ ରେଜିଷ୍ଟ୍ରେସନ୍‌ ଲିଙ୍କ୍‌ ନାଁରେ ମଧ୍ୟ ଠକେଇ ହେଉଛି। କେବଳ ସେତିକି ନୁହେଁ ଆପ୍ଲିକେସନ୍‌ ଡାଉନ୍‌ଲୋଡ୍‌ ହେବା ପରେ ଦୁର୍ବୃତ୍ତ ମୋବାଇଲ୍‌ ହ୍ୟାକ୍‌ କରିନେଉଛି। ଏହା ପରେ କଣ୍ଟାକ୍ଟରୁ କିଛି ଲୋକଙ୍କୁ ଟଙ୍କା ମାଗି ନେଉଛି। ଲୋକମାନେ ବିଶ୍ବାସ କରି ଟଙ୍କା ପଠାଇବା ପରେ ଠକାମୀର ଶିକାର ହେଉଛନ୍ତି। ଏଭଳି ଠକେଇରୁ ବର୍ତ୍ତିବ‌ା ଲାଗି ବିଭିନ୍ନ ଲିଙ୍କ୍‌ରେ ଆସୁଥିବା ଆପ୍ଲିକେସନ୍‌କୁ ଡାଉନ୍‌ଲୋଡ୍‌ ନ କରିବାକୁ ସାଇବର୍‌ ଥାନା ପରାମର୍ଶ ଦେଇଛି।