ଭୁବନେଶ୍ୱର : ମହାମାରୀ କରୋନା ପ୍ରତିଷେଧକ ଅକ୍ସଫୋର୍ଡ ଟିକାର ପ୍ରଥମ ଓ ଦ୍ବିତୀୟ ମାନବ ପରୀକ୍ଷଣ ସଫଳତାର ସହ ହୋଇ ସାରିଛି। ଏହାର ସୁଫଳ ମଧ୍ୟ ମିଳିଛି। ତେଣୁ ଏହାର ତୃତୀୟ ମାନବ ପରୀକ୍ଷଣ ପର୍ଯ୍ୟନ୍ତ ଅପେକ୍ଷା ନ କରି ଭାରତରେ ଯୁବକ ଓ ସୁସ୍ଥ ଲୋକଙ୍କୁ ଏହି ଟିକା ଦିଆଯିବା ପାଇଁ ପଦକ୍ଷେପ ନିଆଯିବା ଠିକ୍ ହେବ ବୋଲି ବିଶେଷଜ୍ଞମାନେ ମତ ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ଆଇଏମ୍ଏସ୍ ଆଣ୍ଡ ସମ୍ ହସ୍ପିଟାଲର ଗ୍ୟାଷ୍ଟ୍ରୋଏଣ୍ଟରଲୋଜି ବିଭାଗ ମୁଖ୍ୟ ତଥା ଇଣ୍ଡୋ-ବ୍ରିଟିଶ୍ ହେଲ୍ଥ ଇନିସିଏଟିଭ୍ ସଦସ୍ୟ ତଥା ଆଇଏସ୍ଜିୟୁଜିଆଇ ବ୍ଲିଡ୍ ଟାସ୍କଫୋର୍ସ ସଂଯୋଜକ ଡା. ମନୋଜ କୁମାର ସାହୁ ଏ ନେଇ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟର ଯୁଗ୍ମ ସଚିବ ଲବ ଅଗ୍ରୱାଲ୍ଙ୍କୁ ଏକ ଚିଠି ଲେଖିଛନ୍ତି। ଡା ସାହୁ ଚିଠିରେ ଉଲ୍ଲେଖ କରିଥିବା ସୂଚନାନୁସାରେ ଅକ୍ସଫୋର୍ଡ ଟିକା ଡିସେମ୍ବର ପୂର୍ବରୁ ଉପଲବ୍ଧ ସମ୍ଭବ ନୁହେଁ। ତେଣୁ ଡିସେମ୍ବର ପର୍ଯ୍ୟନ୍ତ ଅପେକ୍ଷା ନ କରି ଏବେଠାରୁ ଭାରତରେ ଏହି ଟିକା ଦିଆଯିବା ଠିକ୍ ହେବ। ଭାରତରେ ଅଧିକ ସଂଖ୍ୟକ ଯୁବକ ଓ ସୁସ୍ଥ ଲୋକ ଥିବାରୁ ବର୍ତ୍ତମାନ ସେମାନଙ୍କୁ ଏହି ଟିକା ଦେବା ଉପଯୁକ୍ତ ସମୟ ବୋଲି ସେ ଚିଠିରେ ଉଲ୍ଲେଖ କରିଛନ୍ତି। ସୁସ୍ଥ ଓ ଯୁବକଙ୍କୁ ଏହି ଟିକା ଦିଆଯିବା ସମ୍ପୂର୍ଣ୍ଣ ସ୍ବେଚ୍ଛାକୃତ ହେବ। ଏଥିସହିତ ଟିକା ନେଇଥିବା ଯୁବକଙ୍କ ଉପରେ ନଜର ରଖାଯିବ ଓ ଆବଶ୍ୟକ ପଡ଼ିଲେ ସେମାନଙ୍କୁ ଉପଯୁକ୍ତ ମେଡିକାଲ ସେବା ଯୋଗାଇ ଦିଆଯିବ। ଭାରତ ବିପୁଳ ମାତ୍ରାରେ ଏହି ଟିକା ପ୍ରସ୍ତୁତ କରିବାକୁ ସକ୍ଷମ ଥିବାରୁ ଏହି ପଦକ୍ଷେପ ନେବା ଉପଯୁକ୍ତ ହେବ ବୋଲି ସେ କହିଛନ୍ତି।