୬ରୁ ଖୋଲିବ ଐତିହ୍ୟ ସ୍ମାରକୀ
ଭୁବନେଶ୍ବର: ଭାରତୀୟ ପ୍ରତ୍ନତତ୍ତ୍ବ ସର୍ବେକ୍ଷଣ ସଂସ୍ଥା (ଏଏସଆଇ) ସଂରକ୍ଷିତ ସ୍ମାରକୀ କୀର୍ତିରାଜି ଆସନ୍ତା ୬ ତାରିଖରୁ ଖୋଲିବ। କଟକଣା ପାଳନ ସହ ଏସବୁ ଖୋଲିବା ବୋଲି କେନ୍ଦ୍ର ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ପ୍ରହ୍ଲାଦ ସିଂହ ପଟେଲ ଜଣାଇଛନ୍ତି। ସେ ଜଣାଇଛନ୍ତି ଯେ ନନ୍-କଣ୍ଟେନମେଣ୍ଟ ଅଞ୍ଚଳରେ ଥିବା ସ୍ମାରକୀ ଓ ସଂଗ୍ରହାଳୟଗୁଡ଼ିକ କେବଳ ଲୋକଙ୍କ ପାଇଁ ଖୋଲି ପାରିବ। ତେବେ ସମସ୍ତ ସଂରକ୍ଷିତ କୀର୍ତିରାଜିରେ ନୀତି ନିୟମ ମାନିବା ବାଧ୍ୟତାମୂଳକ କରାଯାଇଛି। ସାନିଟାଇଜେସନ୍, ସାମାଜିକ ଦୂରତା ଏବଂ ଅନ୍ୟ ସ୍ବାସ୍ଥ୍ୟ ସମ୍ବନ୍ଧୀୟ କଟକଣାକୁ ମାନିବା ପାଇଁ ନିର୍ଦେଶ ଦିଆଯାଇଛି। ତେବେ ରାଜ୍ୟ ଓ ଜିଲ୍ଲା ପ୍ରଶାସନ ମଧ୍ୟ ଏ ସମ୍ପର୍କରେ ନିର୍ଦିଷ୍ଟ ନିର୍ଦେଶନାମା ଜାରି କରିପାରିବେ। ସୂଚନାଯୋଗ୍ୟ ଏଏସଆଇ ମୋଟ ୩୬୯୧ଟି ସଂରକ୍ଷିତ କୀର୍ତିରାଜି ଥିବା ବେଳେ ସେଥିମଧ୍ୟରୁ ୮୨୦ଟି ସଂରକ୍ଷିତ କୀର୍ତିରାଜି ଜୁନ୍ ୮ରୁ ଖୋଲା ଯାଇଛି। ଏଥିପାଇଁ ଏଏସ୍ଆଇ ପକ୍ଷରୁ ସ୍ବତନ୍ତ୍ର ଏସ୍ଓପି ମଧ୍ୟ ଜାରି ହୋଇଛି।