ପତ୍ନୀଙ୍କ ଅଶ୍ଳୀଳ ଫଟୋ ଭାଇରାଲ୍ କରି ସ୍ବାମୀ ଗିରଫ
ଭୁବନେଶ୍ବର : ସୋସିଆଲ ମିଡିଆରେ ପତ୍ନୀଙ୍କ ଅଶ୍ଳୀଳ ଫଟୋ ପୋଷ୍ଟ କରି ଭାଇରାଲ୍ କରିବା ଅଭିଯୋଗରେ ସୋମବାର ଦିନ ଭୁବନେଶ୍ୱର ସାଇବର ଥାନା ପୁଲିସ ଅଭିଯୁକ୍ତ ସ୍ବାମୀକୁ ଗିରଫ କରିଛି। କେସ୍ ନମ୍ବର- ୩/୨୨ ଆଧାରରେ ଆଇପିସି ଧାରା ୩୮୩, ୪୨୦, ୪୯୮(ଏ), ୫୦୯ ଏବଂ ଆଇଟି ଆକ୍ଟ୍ ଧାରା ୬୭, ୬୭(ଏ)ରେ ପୁଲିସ ଭଦ୍ରକ ଚାନ୍ଦବାଲିରୁ ଅଭିଯୁକ୍ତ ସରୋଜ କୁମାର ଦାସକୁ ଗିରଫ କରିଛି।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ସରୋଜଙ୍କ ସ୍ତ୍ରୀ ମଞ୍ଚେଶ୍ବର ଅଞ୍ଚଳରେ ଘରୋଇ ସହାୟକ ଭାବେ କାମ କରୁଛନ୍ତି। ସରୋଜ ଭଦ୍ରକରେ ପାଇପ୍ ମିସ୍ତ୍ରି କାମ କରନ୍ତି। ସରୋଜ ରୋଜଗାର କରୁଥିଲେ ବି ନିଶାରେ ଟଙ୍କା ଉଡ଼ାଇ ଦେଉଥିଲେ ଓ ମଝିରେ ମଝିରେ ସ୍ତ୍ରୀଙ୍କଠାରୁ ଟଙ୍କା ନେଉଥିଲେ। ଏବେ କିଛି ଦିନ ହେଲା ସ୍ତ୍ରୀ ସରୋଜକୁ ଟଙ୍କା ଦେବା ବନ୍ଦ କରିଦେଲେ। ଏହାକୁ ନେଇ ଉଭୟଙ୍କ ମଧ୍ୟରେ ପାଟିତୁଣ୍ଡ ହେଉଥିଲା। ରାଗରେ ସରୋଜ ସେମାନଙ୍କର ଅନ୍ତରଙ୍ଗ ମୁହୂର୍ତ୍ତର କିଛି ଫଟୋକୁ ଫେସ୍ବୁକ୍ରେ ପୋଷ୍ଟ କରିଥିଲା। ଜଣେ ପଡୋଶୀ ମହିଳା ଏଭଳି ଭିଡିଓ ଓ ଫଟୋ ଦେଖି ସରୋଜଙ୍କ ସ୍ତ୍ରୀଙ୍କୁ ଜଣାଇଥିଲେ। ଏନେଇ ପତ୍ନୀ ଭୁବନେଶ୍ୱର ଡିସିପି ଅଫିସରେ ଅଭିଯୋଗ କରିଥିଲେ। ଏନେଇ ସାଇବର ଥାନା ପୁଲିସ ମାମଲା ରୁଜୁକରିବା ସହ ଆଜି ତାକୁ କୋର୍ଟ ଚାଲାଣ କରିଛି।