ଦୁର୍ଘଟଣା ରୋକିବାକୁ ଲାଗିଲା ଲୁହା ବାଡ଼ା

ଚନ୍ଦ୍ରଶେଖରପୁର: ଏକାମ୍ରକାନନରୁ ଆଇଏମ୍‌ଏ ପର୍ଯ୍ୟନ୍ତ ନିର୍ମାଣଧୀନ ୨୦୦ ଫୁଟିଆ ରାସ୍ତାର ହାତିଆଶୁଣିରୁ ଓଇଆର୍‌ସି ପର୍ଯ୍ୟନ୍ତ ଲମ୍ବିଥିବା ୨୦୦ ଫୁଟିଆ ରାସ୍ତା ଦୁର୍ଘଟଣାପ୍ରବଣରେ ପରିଣତ ହୋଇଛି। ଜୟଦେବବିହାର-ନନ୍ଦନକାନନ ରାସ୍ତାରେ ଭିଡ଼ ହେଉଥିବାରୁ ଗାଡ଼ିଚାଳକମାନେ ଏହାକୁ ବିକଳ୍ପ ରାସ୍ତା ଭାବେ ବାଛି ନେଇଛନ୍ତି। ତେବେ ଗାଡ଼ିଚାଳକଙ୍କ ସୁବିଧା‌ ପାଇଁ ନିର୍ମାଣ ହୋଇଥିବା ଏହି ରାସ୍ତାରେ ପ୍ରତିଦିନ ଦୁର୍ଘଟଣା ହେଉଛି। କେତେବେଳେ ଲୁହା ବାଡ଼ ଡେଇଁ ଗାଡ଼ି ମେଡିଆନ୍‌ ଉପରେ ଚଢ଼ିଯାଉଛି ତ ଆଉ କେବେ ମୁହାଁମୁହାଁ ଧକ୍କା। ୨୦୨୪ ତୁଳନା‌ରେ ୨୦୨୫ରେ ଦୁର୍ଘଟଣା ହ୍ରାସ ପାଇଥିଲେ ମଧ୍ୟ ନିୟନ୍ତ୍ରଣ ଭିତରକୁ ଆସିପାରି ନାହିଁ। ଏବେ ମଧ୍ୟ ପ୍ରତି ସପ୍ତାହରେ ୪ରୁ ୫ଟି ଦୁର୍ଘଟଣା ଘଟୁଛି।

ବିଶେଷକରି ଉତ୍କଳ ହସ୍ପିଟାଲରୁ ଓଇଆର୍‌ସି ପର୍ଯ୍ୟନ୍ତ ସଂଯୋଗ କରୁଥିବା ୩ କିମି ରାସ୍ତାପାର୍ଶ୍ବରେ ଗଢ଼ିଉଠିଥିବା ବସ୍ତି ଯୋଗୁ ବଢ଼ୁଥିବା ଦୁର୍ଘଟଣା ଚିନ୍ତାର କାରଣ ପାଲଟିଛି। ଏବର୍ଷ ତିନିଜଣଙ୍କର ମୃତ୍ୟୁ ହୋଇଥିବା ବେଳେ ଅନେକ ଆହତ ହୋଇଛନ୍ତି। ବଢ଼ୁଥିବା ଦୁର୍ଘଟଣା ରୋକିବାକୁ ପ୍ରଶାସନ ବିକଳ୍ପ ବ୍ୟବସ୍ଥା ଆପଣାଇଛି। ବସ୍ତିବାସିନ୍ଦା ଯେପରି ରାସ୍ତା ଉପରକୁ ନ ଆସିବେ ସେଥିପାଇଁ ଲୁହା ବାଡ଼ା ଲାଗୁଛି। ୩ କିମି ରାସ୍ତାପାର୍ଶ୍ବରେ ଏହି ଲୁହାବାଡ଼ା ଦ୍ବାରା ବସ୍ତିବାସିନ୍ଦା କିମ୍ବା ଛୋଟ ପିଲା ହଠାତ୍‌ ରାସ୍ତା ଉପରକୁ ଆସିପାରିବେ ନାହିଁ ଏବଂ ଦୁର୍ଘଟଣା ହ୍ରାସ ପାଇବ ବୋଲି ପ୍ରଶାସନ ଆକଳନ କରିଛି।

୨୦୦ ଫୁଟିଆ ରାସ୍ତା ନିର୍ମାଣ ହେବା ଦିନଠାରୁ ହିଁ ଦୁର୍ଘଟଣା ବଢ଼ି ଚାଲିଛି। ତେଣୁ ଦୁର୍ଘଟଣା ରୋକିବାକୁ ପୁଲିସ ସହ ପୂର୍ତ୍ତ ବିଭାଗର ଅଧିକାରୀମାନେ ୨୦୨୪ରୁ ରୂପରେଖ ପ୍ରସ୍ତୁତ କରୁଥିଲେ ମଧ୍ୟ ସଫଳ ହୋଇପାରି ନାହାନ୍ତି। ପ୍ରାରମ୍ଭିକ ଭାବେ ଉତ୍କଳ ହସ୍ପିଟାଲ‌୍ରୁ ରେଳବିହାର ମଧ୍ୟରେ ଥିବା ଦୁଇଟି କଟ୍‌ ମଧ୍ୟରୁ ଗୋଟିଏ ବନ୍ଦ କରିଥିଲେ। ଏଥିରେ ଦୁର୍ଘଟଣାରେ ରୋକ୍‌ ଲାଗିପାରି ନଥିଲା। ରେଳବିହାର ଆଡ଼ୁ ଉତ୍କଳ ହସ୍ପିଟାଲ୍‌ ଆଡ଼କୁ ଯିବା ସମୟରେ ଏକ ବଡ଼ ବାଙ୍କ ରହିଛି, ଯାହାକି ଏବେ ବି ଦୁର୍ଘଟଣାର ପ୍ରମୁଖ କାରଣ ପାଲଟିଛି। ୨୦୦ ଫୁଟ୍‌ ଓସାରିଆ ରାସ୍ତା ହୋଇଥିବାରୁ ଗାଡ଼ିଗୁଡ଼ିକର ବେଗ ଘଣ୍ଟା ପ୍ରତି ୮୦ରୁ ୧୦୦ କିଲୋମିଟର ଉପରେ ରହୁଛି। ସ୍ପିଡ୍‌ ବାଇକ୍‌ ଓ କାର୍‌ଚାଳକମାନେ ମନଇଚ୍ଛା‌ ଗାଡ଼ିର ବେଗ ବଢ଼ାଉଛନ୍ତି।

ଯେଉଁଥିପାଇଁ ଦୁର୍ଘଟଣା ବଢ଼ୁଥିବା ଅଭିଯୋଗ ହୋଇଛି। ରାସ୍ତାର କୌଣସି ସ୍ଥାନରେ ଟର୍ଣ୍ଣିଂ କିମ୍ବା ୟୁ-ଟର୍ଣ୍ଣ ସଙ୍କେତ ଲଗାଯାଇ ନାହିଁ। ଜେବ୍ରା କ୍ରସିଂ ନ ଥିବାରୁ ପଥଚାରୀମାନେ ବାରମ୍ବାର ଦୁର୍ଘଟଣାର ସମ୍ମୁଖୀନ ହେଉଛନ୍ତି। ଲଗାତାର ଦୁର୍ଘଟଣା ଯୋଗୁ ମେଡି୍ରାନ୍‌ର ସୌନ୍ଦର୍ଯ୍ୟୀକରଣ ନଷ୍ଟ ହୋଇପଡ଼ିଛି। ରାସ୍ତା‌‌ର ୧୦ରୁ ଅଧିକ ସ୍ଥାନରେ ଏବେ ମଧ୍ୟ ଲୁହା ବାରିକେଡ୍‌ ଭାଙ୍ଗି ପଡ଼ିଥିଲେ ମଧ୍ୟ ସେଗୁଡ଼ିକର ମରାମତି କରାଯାଉ ନାହିଁ। ତେଣୁ ସ୍ଥାନୀୟ ଲୋକେ ଅସନ୍ତୋଷ ପ୍ରକାଶ କରିବା ସହ ବେପରୁଆ ଗାଡ଼ିଚାଳକଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି। ରାସ୍ତା ପାର୍ଶ୍ବରେ ଲାଗିଥିବା ଷ୍ଟ୍ରିଟ୍‌ ଲାଇଟ୍‌ କିଛି ସ୍ଥାନରେ ଜଳୁ ନ ଥିବାରୁ ଯିବା ସମୟରେ ଲୋକେ ହଟହଟା ହେଉଛନ୍ତି। ଏଦିଗରେ ତୁରନ୍ତ ପଦକ୍ଷେପ ନେବାକୁ ଦାବି ହୋଇଛି।