ଭୁବନେଶ୍ବର: ଜଟଣୀ ଅଞ୍ଚଳର ସନ୍ତୋଷ ବେହେରାଙ୍କର ବହୁ ଦିନ ଧରି ପେଟ ସମସ୍ୟା ଲାଗି ରହିଥିବାରୁ ସେ କ୍ୟାପିଟାଲ ହସ୍ପିଟାଲକୁ ଆସିଥିଲେ। ମେଡିସିନ ବିଭାଗରେ ଦେଖାଇବା ପରେ ଡାକ୍ତର ତାଙ୍କୁ ଅଲଟ୍ରାସାଉଣ୍ଡ କରିବାକୁ କହିଥିଲେ। ତେଣୁ ସେ ହସ୍ପିଟାଲ ପରିସରରେ ଥିବା ଅଲଟ୍ରାସାଉଣ୍ଡ ରୁମ୍ରେ ପରୀକ୍ଷା ପାଇଁ ପହଞ୍ଚିବା ବେଳକୁ ସେଠାରେ ଲମ୍ବା ଧାଡ଼ି ଦେଖି ଚିନ୍ତାରେ ପଡ଼ିଥିଲେ। ଦାୟିତ୍ବରେ ଥିବା କର୍ମଚାରୀ ତାଙ୍କୁ ୧୫ ଦିନ ପରେ ଆସିବାକୁ କହିଥିଲେ। ଏହାର କାରଣ ପଚାରିବାରୁ ଗୋଟିଏ ମେସିନର ରିଜୋଲ୍ୟୁସନ କମି ଯାଇଥିବାରୁ ସେଥିରେ ଭିଜୁଆଲ୍ ଠିକ୍ ଭାବେ ଆସୁନାହିଁ। ତେଣୁ ଗୋଟିଏ ମେସିନରେ କାମ ଚାଲିଥିବା ତାଙ୍କୁ କୁହାଯାଇଥିଲା। ତେଣୁ ନାମ ପଞ୍ଜୀକରଣ କଲେ ପ୍ରାୟ ଦୁଇ ସପ୍ତାହ ପରେ ନମ୍ବର ପଡ଼ିବ ବୋଲି ସେଠାରେ ଥିବା କର୍ମଚାରୀ ତାଙ୍କୁ କହିଥିଲେ। ତେଣୁ ସେ ବାଧ୍ୟ ହୋଇ ଏକ ଘରୋଇ ଲ୍ୟାବ୍ରେ ଅଲ୍ଟ୍ରାସାଉଣ୍ଡ କରିଥିଲେ।
ଦୁଇମାସ ହେବ ରୋଗୀ ହିନସ୍ତା
ଖତଖାଉଛି ନୂଆ ମେସିନ୍
ଜିଲ୍ଲାପାଳଙ୍କ ଅନୁମତିକୁ ଅପେକ୍ଷା
ଘଟଣା ବିଷୟରେ ଖବର ନେବାରୁ ଜଣାପଡ଼ିଛି ଯେ, ଦୁଇ ମାସ ହେବ କ୍ୟାପିଟାଲ ହସ୍ପିଟାଲର ଅଲ୍ଟ୍ରାସାଉଣ୍ଡ ମେସିନ ଅଚଳ ହୋଇପଡ଼ିଛି। ଦୁଇଟି ମେସିନରୁ ଗୋଟିଏ ଖରାପ ହୋଇ ଯାଇଥିବାରୁ ସାଧାରଣ ରୋଗୀ ହଇରାଣ ହେଉଛନ୍ତି। ଦାନସୂତ୍ରରେ ଆଉ ଏକ ନୂଆ ମେସିନ ଆସିଥିଲେ ମଧ୍ୟ ତାହା ଷ୍ଟୋର୍ରୁମ୍ରେ ଖତ ଖାଉଛି। ଏହାକୁ କାର୍ଯ୍ୟକ୍ଷମ କରିବାକୁ ଏକ ମାସ ହେବ ଜିଲ୍ଲାପାଳଙ୍କୁ ହସ୍ପିଟାଲ ନିର୍ଦ୍ଦେଶକ ଚିଠି ଲେଖିଥିଲେ ମଧ୍ୟ ଏଯାଏଁ ଏହାକୁ ସ୍ଥାପନ କରିବାକୁ ଅନୁମତି ମିଳି ପାରି ନାହିଁ। ହସ୍ପିଟାଲରେ ଦିନକୁ ଦିନ ରୋଗୀ ସଂଖ୍ୟାରେ ବୃଦ୍ଧି ହେଉଛି। ଏବେ ଦୈନିକ ପ୍ରାୟ ୪୦୦୦ରୁ ଅଧିକ ରୋଗୀ କ୍ୟାପିଟାଲ ହସ୍ପିଟାଲକୁ ଚିକିତ୍ସା ପାଇଁ ଆସୁଛନ୍ତି। ସେମାନଙ୍କ ମଧ୍ୟରୁ ଦିନକୁ ପ୍ରାୟ ୧୫୦ରୁ ୨୦୦ ରୋଗୀଙ୍କୁ ଅଲଟ୍ରାସାଉଣ୍ଡ ପାଇଁ ଡାକ୍ତର ପରାମର୍ଶ ଦେଉଛନ୍ତି। କିନ୍ତୁ ଗୋଟିଏ ମେସିନ୍ରେ ଦିନକୁ ପାଖାପାଖି ୮୦ ରୋଗୀଙ୍କର ଅଲଟ୍ରାସାଉଣ୍ଡ କରାଯାଇ ପାରୁଛି। ବାକି ରୋଗୀଙ୍କୁ ଅପେକ୍ଷା କରିବାକୁ ପଡ଼ୁଛି।
ଏନେଇ କ୍ୟାପିଟାଲ ହସ୍ପିଟାଲର ନିର୍ଦ୍ଦେଶକ ଡାକ୍ତର ଦିଲ୍ଲୀପ ପଣ୍ଡା କହିଛନ୍ତି ଯେ, ହସ୍ପିଟାଲରେ ଦୁଇଟି ମେସିନ ସାଧାରଣ ରୋଗୀଙ୍କ ପାଇଁ ରହିଛି। ଗୋଟିଏ ନୂଆ ମେସିନ ହୋଇଥିବା ବେଳେ ଅନ୍ୟଟି ୫ ବର୍ଷର ପୁରୁଣା ମେସିନ। ପୁରୁଣା ମେସିନରେ ଆଉ ଫଟୋ ଭଲ ଉଠୁ ନାହିଁ। ରିଜୋଲ୍ୟୁସନ କମି ଗଲାଣି। ତେଣୁ ଏଥିରେ ଅଲଟ୍ରାସାଉଣ୍ଡ ବନ୍ଦ ରହିଛି। ଆଉ ଏକ ନୂଆ ଅଲଟ୍ରାସାଉଣ୍ଡ ମେସିନ ଅଛି। ଅଲଟ୍ରାସାଉଣ୍ଡ ମେସିନ୍ କାର୍ଯ୍ୟକ୍ଷମ ପୂର୍ବରୁ ଜିଲ୍ଲାପାଳଙ୍କ ଠାରୁ ଅନୁମତିର ଆବଶ୍ୟକତା ରହିଛି। ଏନେଇ ଆମେ ଜିଲ୍ଲାପାଳଙ୍କୁ ଅନୁମତି ପାଇଁ ଚିଠି ଲେଖିଛୁ। ଖୁବ୍ ଶୀଘ୍ର ନୂଆ ମେସିନ କାର୍ଯ୍ୟକ୍ଷମ ହେବ।