ଭୁବନେଶ୍ବର: ଜଟଣୀ ଥାନା ଷଣ୍ଢପୁର ଗାଁରେ ୨୦୧୭ ମସିହା ସେପ୍ଟେମ୍ବର ୧୨ରେ ଘଟିଥିବା ବୀଭତ୍ସ ହତ୍ୟାକାଣ୍ଡର ରାୟ ଆଜି ପ୍ରକାଶ ପାଇଛି। ବିଳମ୍ବିତ ରାତିରେ ଦୋକାନରେ ଶୋଇଥିବା ଅନୁପ ବେହେରାକୁ ଟାଣି ନେଇ ୪ଜଣ ହାଣି ପକାଇଥିଲେ। ସେମାନଙ୍କୁ ଆଜି ଭୁବନେଶ୍ବର ଦ୍ବିତୀୟ ଅତିରିକ୍ତ ଦୌରାଜଜ୍‌ ବିଚାରପତି ବନ୍ଦନା କର ଆଜୀବନ ସଜା ଶୁଣାଇଛନ୍ତି। ଆସାମୀମାନେ ହେଲେ ହାଲୁ ବେହେରା, ତା’ ପୁଅ ଗୋପୀନାଥ ବେହେରା, ହାଲୁର ଭାଇ ନାଲୁ ‌ବେହେରା ଓ ନାଲୁ ପୁଅ ମୃଣାଳ ବେହେରା ଓରଫ କାହ୍ନା। ଆଜୀବନ କାରାବାସ ସହ ସେମାନଙ୍କକୁ ୨୫ ହଜାର ଟଙ୍କା ଲେଖାଏଁ ଜରିମାନା ଦେବାକୁ ନିର୍ଦ୍ଦେଶ ରହିଛି। ଜରିମାନା ଅନାଦାୟ ହେଲେ ସେମାନଙ୍କୁ ଅଧିକ ବର୍ଷେ ଲେଖାଏଁ ଜେଲ୍‌ ଦଣ୍ଡ ଭୋଗିବାକୁ ହେବ ବୋଲି ରାୟରେ ଉଲ୍ଲେଖ ରହିଛି। ଆଜି ଶୁଣାଣି ବେଳେ ଆସାମୀମାନଙ୍କ ଓକିଲ ଉପସ୍ଥିତ ନଥିଲେ। ତାଙ୍କୁ ଡକାଯାଇଥିଲେ ହେଁ ସେ ଶୁଣାଣି ବେଳେ ଉପସ୍ଥିତ ରହି ନଥିଲେ। ଝାରପଡ଼ା ଜେଲ୍‌ରୁ ଆସିଥିବା ଆସାମୀମାନଙ୍କୁ ପୁଣି ଜେଲ୍‌କୁ ପଠାଇଦିଆଯାଇଥିଲା। ୧୬ଜଣ ସାକ୍ଷୀ ଓ ୨୦ଟି ପ୍ରଯୁଜ୍ୟ ଦସ୍ତାବିଜ ବଳରେ ବିଚାରପତି ଏହି ରାୟ ଶୁଣାଇଛନ୍ତି। ସରକାରୀ ପିପି ସଲିଳ ପ୍ରଧାନ ଏହି ମାମଲା ପରିଚାଳନା କରିଥିଲେ।   

Advertisment

ଭଉଣୀକୁ କମେଣ୍ଟ କରି ଭାଇକୁ ହାଣିଦେଲେ
୨୦୧୭ ମସିହା ଗଣେଶ ପୂଜା ପରଦିନ ଷଣ୍ଢପୁର ଦଳିତସାହିରେ ଏହି ହତ୍ୟାକାଣ୍ଡ ଘଟିଥିଲା। ଏହା ପୂର୍ବରୁ ହତ୍ୟାର ଶିକାର ହୋଇଥିବା ଅନୁପଙ୍କ ଭଉଣୀକୁ ଗୋପୀନାଥ ଓ କାହ୍ନା କମେଣ୍ଟ ମାରିଥିଲେ। ତିନି ଭାଇଙ୍କର ଗୋଟିଏ ଗେହ୍ଲା ଭଉଣୀକୁ କମେଣ୍ଟ ମାରିଥିବାରୁ ବଡ଼ ଭାଇ ଅନୁପ ରାଗରେ ଗୋପୀ ଓ କାହ୍ନାକୁ ଗାଳି କରିବା ସହ ତାଗିଦ କରିଥିଲେ। ଏହାକୁ ନେଇ ଗୋପୀ ଓ କାହ୍ନାଙ୍କ ବାପା ତଥା ଦୁଇ ଭାଇ ହାଲୁ ଓ ନାଲୁ ପ୍ରତିକ୍ରିୟାଶୀଳ ହୋଇପଡ଼ିଥିଲେ ଏବଂ ଅନୁପଙ୍କୁ ଧମକ ଦେଇଥିଲେ। ଫଳରେ ବିବାଦ ବଢ଼ିଥିଲା। ଅନୁପଙ୍କ ସହ ତାଙ୍କ ଦୁଇ ଭାଇ ଥିବାରୁ ସେ ହାଲୁ-ନାଲୁଙ୍କ ଧମକକୁ ନ ଡରି ପାଲଟା ଜବାବ ଦେଇଥିଲେ। ଫଳରେ ସାହିରେ ପତିଆରା ଜାହିର କରିଆସିଥିବା ହାଲୁ ଓ ନାଲୁକୁ ଏହା ବାଧିଥିଲା। ସେମାନେ ସବୁଦିନ ପାଇଁ ଅନୁପଙ୍କୁ ରାସ୍ତାରୁ ହଟାଇବାକୁ ‌ଯୋଜନା କରିଥିଲେ। ସବୁ ଦିନ ଭଳି ଗଣେଶ ପୂଜା ପରଦିନ ରାତି‌ରେ ଅନୁପ ଗାଁ ମୁଣ୍ଡ ଛକରେ କରିଥିବା ଦୋକାନରେ ଶୋଇଥିଲେ।

ପୂର୍ବରୁ ପ୍ରସ୍ତୁତ ହୋଇ ରହିଥିବା ହାଲୁ, ନାଲୁ ଓ ସେମାନଙ୍କ ଦୁଇ ପୁଅ ମିଳିତ ଭାବେ ଦୋକାନ ଉପରେ ଆକ୍ରମଣ କରିଥିଲେ। ସେମାନେ ଅନୁପଙ୍କୁ ଦୋକାନ ଭିତରୁ ଟାଣି ଆଣି ମାରଣାସ୍ତ୍ରରେ ଆକ୍ରମଣ କରିଥିଲେ। ରକ୍ତାକ୍ତ ଅବସ୍ଥାରେ ଜୀବନ ବିକଳରେ ଅନୁପ ସାହି ଭିତରକୁ ଧାଇଁଥିଲେ ଏବଂ ଦୁଇ ଭାଇଙ୍କୁ ଡାକ ପକାଇଥିଲେ। ଚିତ୍କାର ଶୁଣି ଅନୁପଙ୍କ ଦୁଇ ଭାଇ ଓ ମା ସାହି ଦାଣ୍ଡକୁ ବାହାରି ଆସିଥିଲେ। କିନ୍ତୁ ସେମାନେ ନିରସ୍ତ୍ର ଥିବାରୁ ୪ ଆକ୍ରମଣକାରୀଙ୍କୁ ମୁକାବିଲା କରିପାରି ନଥିଲେ। ଆକ୍ରମଣକାରୀମାନେ ଅନୁପଙ୍କୁ ବଡ଼ ନିର୍ମମ ଭାବେ ହାଣି ପକାଇବା ସହ ତାଙ୍କ ମା’ ଓ ଜଣେ ଭାଇଙ୍କୁ ମଧ୍ୟ ଗୁରୁତର କରି ଦେଇଥିଲେ। ପାଟି ଶୁଣି ସାହିବାସିନ୍ଦାମାନେ ଉଠିଆସିବା ଦେଖି ଆକ୍ରମଣକାରୀମାନେ ଫେରାର ହୋଇଯାଇଥିଲେ। ଖବର ପାଇ ଜଟଣୀ ଥାନା ପୁଲିସ ପହଞ୍ଚିଥିଲା ଏବଂ ସାହିଲୋକଙ୍କ ସହଯୋଗରେ ଆହତମାନଙ୍କୁ ଡାକ୍ତରଖାନା ପଠାଇଥିଲା। ମାତ୍ର ଡାକ୍ତର ଅନୁପକୁ ମୃତ ଘୋଷଣା କରିଥିଲେ।