ପୁରୁଣା ଭୁବନେଶ୍ୱର: ପୁରୀ ଓ ଭୁବନେଶ୍ୱରକୁ ରାଜ୍ୟ ଓ ରାଜ୍ୟ ବାହାର ଲୋକଙ୍କ ଅଧିକ ଆଗମନ ଘଟୁଥିବାରୁ ଏହି ୨ ସହରରେ ଖଦି ସାମଗ୍ରୀର ବିକ୍ରୟ ଓ ପ୍ରଦର୍ଶନ ଉପରେ ଗୁରୁତ୍ବ ଦିଆଯିବ। ଏଥିପାଇଁ ଏହି ୨ ସହରରେ ଖଦି ଭବନ ନିର୍ମାଣ ପାଇଁ ରାଜ୍ୟ ସରକାରଙ୍କୁ ପ୍ରସ୍ତାବ ଦିଆଯିବ। ସରକାର ଏହାକୁ ଗ୍ରହଣ କଲେ, ବୋର୍ଡର ପୁରୀ ଓ ଭୁବନେଶ୍ବରରେ ଥିବା ଜମିରେ ଖଦି ଭବନ ନିର୍ମାଣ କରାଯିବ ବୋଲି ଓଡ଼ିଶା ଖଦି ଓ ଗ୍ରାମୋଦ୍ୟୋଗ ବୋର୍ଡର ଅଧ୍ୟକ୍ଷ ସଂଗ୍ରାମ କେଶରୀ ପାଇକରାୟ କହିଛନ୍ତି। ଏହାଦ୍ବାରା ଖଦି ସାମଗ୍ରୀର ବିକ୍ରିବଟା ବୃଦ୍ଧି ପାଇବା ସହ ଗାଁରେ ଥିବା ବୁଣାକାର ଲାଭ ପାଇପାରିବେ।
Sambad is now on WhatsApp
Join and get latest news updates delivered to you via WhatsApp
‘ଫନି’ ପ୍ରଭାବରେ ଅନେକ ଖଦି କାରିଗରଙ୍କ ଘର ଭାଙ୍ଗି ଯାଇଛି। ଏହାଦ୍ବାରା ଚରଖା, ସୂତା ଓ ତନ୍ତ ସାମଗ୍ରୀ ନଷ୍ଟ ହୋଇଛି। କ୍ଷୟକ୍ଷତି ଆକଳନ କରାଯାଇ ସରକାରଙ୍କୁ ରିପୋର୍ଟ ଦିଆଯାଇଛି। ସହାୟତା ରାଶି ମିଳିବା ପରେ କ୍ଷତିଗ୍ରସ୍ତ ବୁଣାକାରଙ୍କୁ ଆର୍ଥିକ ସହାୟତା ଦିଆଯିବ ବୋଲି ଶ୍ରୀ ପାଇକରାୟ ସୂଚନା ଦେଇଛନ୍ତି। ଏହାବ୍ୟତୀତ ଓଡ଼ିଶା ଖଦି ଓ ଗ୍ରାମୋଦ୍ୟୋଗ ପକ୍ଷରୁ ଅକ୍ଟୋବର ୨ତାରିଖରେ ମହାତ୍ମାଗାନ୍ଧୀଙ୍କ ଜୟନ୍ତୀ ମହାସମାରୋହରେ ପାଳନ କରାଯିବ ବୋଲି ଶ୍ରୀ ପାଇକରାୟ କହିଛନ୍ତି। ଏଥିପାଇଁ ବିଭିନ୍ନ ଅନାଥାଶ୍ରମ, ବାଳାଶ୍ରମ ଓ କନ୍ୟାଶ୍ରମର ପିଲାଙ୍କୁ ନେଇ ପ୍ରବନ୍ଧ ପ୍ରତିଯୋଗିତା ଶେଷ ହୋଇଛି। ଭଞ୍ଜକଳା ମଣ୍ଡପଠାରେ ଏହି ଉତ୍ସବ ପାଳନ ଅବସରରେ ସେମାନଙ୍କୁ ସମ୍ବର୍ଧିତ କରାଯିବ। ଏଥିରେ ବହୁ ସ୍ବାଧୀନତା ସଂଗ୍ରାମୀ ଓ ବିଭାଗୀୟ ମନ୍ତ୍ରୀଙ୍କ ସମେତ ବିଶିଷ୍ଟ ବ୍ୟକ୍ତି ଯୋଗଦେବେ। ଏହି ସୂଚନା ପ୍ରଦାନ ବେଳେ ବୋର୍ଡର ସଚିବ ସରୋଜ ପଟେଲ, ଉପସଚିବ ତ୍ରିଯୋଗୀ ନାରାୟଣ ଦାଶ ଉପସ୍ଥିତ ଥିଲେ।