ଦୁଇ ଅପହର୍ତ୍ତାଙ୍କୁ ରାଜଧାନୀରୁ ଉଠାଇଲା କୋଲକାତା ପୁଲିସ

ଭୁବନେଶ୍ବର: ଖଡ଼ଗପୁରରୁ ଜଣେ ନାବାଳିକାଙ୍କୁ ଅପହରଣ କରି ରାଜଧାନୀରେ ଲୁଚିଥିବା ଦୁଇ ଅପହର୍ତ୍ତାଙ୍କୁ ନୂଆପଲ୍ଲୀ ଥାନା ସହଯୋଗରେ ଖଡ଼ଗପୁର ପୁଲିସ ଗିରଫ କରିଛି। ସେମାନେ ହେଲେ, ପଶ୍ଚିମବଙ୍ଗ ପଶ୍ଚିମ ମେଦିନାପୁର ଅଞ୍ଚଳର ବିପିନ ନିମ୍‌ଖାଇ(୨୨) ଓ ଶଙ୍କର ନିମ୍‌ଖାଇ ଓରଫ ବିଶୁ ଓରଫ ରାଜୁ(୧୯)। ପୁଲିସ୍‌ ସେମାନଙ୍କ କବଳରୁ ଅପହୃତା ନାବାଳିକାଙ୍କୁ ମଧ୍ୟ ଉଦ୍ଧାର କରିଛି। ସୂଚନା ମୁତାବକ, ବିପିନ ଜଣେ ନାବାଳିକାଙ୍କୁ ଏକ ତରଫା ଭଲ ପାଉଥିଲା।

ନାବାଳିକା ତା’ ପ୍ରେମ ନିବେଦନରେ ରାଜି ନହେବାରୁ ୪ମାସ ତଳେ ତାଙ୍କୁ ଅପହରଣ କରି ଭୁବନେଶ୍ବର ନେଇ ଆସିଥିଲା। ଏଠାରେ ସାଲିଆସାହି ଅଞ୍ଚଳରେ ରହୁଥିଲା। ଖଡ଼ଗପୁର ଥାନା ପୁଲିସ ମାମଲାର ତଦନ୍ତ କରୁଥିବା ବେଳେ ଉଭୟଙ୍କ ଠିକଣା ଠାବ କରିଥିଲା। ନୂଆପଲ୍ଲୀ ଥାନା ସହ ଯୋଗାଯୋଗ କରି ଘଟଣା ସମ୍ପର୍କରେ ଜଣାଇଥିଲା। ଯୋଜନା ମୁତାବକ ମଙ୍ଗଳବାର ବିଳମ୍ବିତ ରାତିରେ ଦୁଇଟି ଯାକ ଟିମ୍‌ ସାଲିଆସାହିରେ ଚଢ଼ଉ କରି ଦୁଇ ଜଣଙ୍କୁ ଗିରଫ କରିବା ସହ ନାବାଳିକାଙ୍କୁ ଉଦ୍ଧାର କରିଥିଲେ।