ଝାରସୁଗୁଡ଼ା: ଲଖନପୁର କୋଇଲା ଖଣିରୁ ବେଆଇନ୍ ଅସୁଲି ଘଟଣାରେ ଲଖନପୁର ପୁଲିସ୍ ୩ ଦିନ ତଳେ ଏକ ମାମଲା ରୁଜୁ କରିଥିବାବେଳେ ଏହି ଘଟଣାରେ ଏମ୍ସିଏଲ୍ ଲଖନପୁର ଖଣିର ପୂର୍ବତନ ପିଓ (ପ୍ରକଳ୍ପ ଅଧିକାରୀ) ତଥା ବର୍ତ୍ତମାନର ଏମ୍ସିଏଲ୍ ଲଖନପୁର କ୍ଷେତ୍ରର ଜିଏମ୍ (ଅପରେସନ) ଉତ୍ତରପ୍ରଦେଶ ଚନ୍ଦୌଲିର ବୀରେନ୍ଦ୍ର କୁମାର ସିଂହ (୫୬)ଙ୍କୁ ଗିରଫ କରି କୋର୍ଟଚାଲାଣ କରିଛି। ଝାରସୁଗୁଡ଼ା ଏସ୍ଡିଜେଏମ୍ ଜାମିନ୍ ନାମଞ୍ଜୁର କରିବାରୁ ତାଙ୍କୁ ୧୪ ଦିନିଆ ବିଚାରବିଭାଗୀୟ ହାଜତକୁ ପଠାଇ ଦିଆ ଯାଇଥିବା ଶ୍ରୀ ସିଂହଙ୍କ ଓକିଲ ବିଶ୍ବନାଥ ଦତ୍ତ କହିଛନ୍ତି। ଅଭିଯୁକ୍ତଙ୍କ ବିରୋଧରେ ଭାରତୀୟ ନ୍ୟାୟ ସଂହିତା ଧାରା ୧୧୧(୨)(ଯୋଜନା ବଦ୍ଧ ଅପରାଧ), ଧାରା ୩୦୮(୫)(ବି)(ଅସୁଲି ପାଇଁ ହତ୍ୟାର ଭୟ ବା ଆହତ କରିବା), ଧାରା ୬୧(୨)(ଅପରାଧିକ ଷଡ୍ଯନ୍ତ୍ର)ରେ ପୁଲିସ୍ ମାମଲା ରୁଜୁକରିଛି। ସେପଟେ, ଲଖନପୁର ଥାନାରେ କୋଇଲାଖଣିରୁ ଅସୁଲି ଘଟଣା ନେଇ ଏହା ପୂର୍ବରୁ ୧୨୩/୨୫ରେ ଆଉ ଏକ ମାମଲା ରୁଜୁ ହୋଇଥିଲା, ଯେଉଁଥିରେ ପରବର୍ତ୍ତୀ ଶୁଣାଣି ଯାଏଁ ତାଙ୍କୁ ଗିରଫ ନ କରିବା ପାଇଁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି।
ସୂଚନା ଅନୁସାରେ, ୩ ଦିନ ତଳେ ଜଣେ ଟ୍ରକ୍ ମାଲିକ ଏ ସଂକ୍ରାନ୍ତରେ ଲଖନପୁର ଥାନାରେ ଅଭିଯୋଗ କରିଥିଲେ। ଯେଉଁଠି ଏମ୍ସିଏଲ୍ର ବରିଷ୍ଠ ଅଧିକାରୀଙ୍କ ଜ୍ଞାତସାରରେ ଟେଣ୍ଡର ଫିକ୍ସିଂ ହୋଇ ୯୯ ପ୍ରତିଶତ କ୍ଷତିରେ କୋଇଲା ଲୋଡିଂକୁ ମଞ୍ଜୁରି ଦିଆଯାଉଥିବା ଅଭିଯୋଗ ହୋଇଥିଲା। ଏହି ଘଟଣାରେ ପୁଲିସ୍ ତଦନ୍ତ ଆରମ୍ଭ କରିବାପରେ ଏମ୍ସିଏଲ୍ରେ ଏବେ କୋକୁଆ ଭୟ ସୃଷ୍ଟି ହୋଇଛି। ଆଉକିଛି ବରିଷ୍ଠ ଅଧିକାରୀ, ବନ୍ଧବାହାଲସ୍ଥିତ ମା' ସମଲେଇ ଟ୍ରକ୍ ମାଲିକ ସଂଘ, ଲୋଡର କଣ୍ଟ୍ରାକ୍ଟର ବି ତଦନ୍ତ ପରିସରଭୁକ୍ତ ହୋଇଥିବା ଜଣାପଡ଼ିଛି। ଆଜି ବୀରେନ୍ଦ୍ର କୁମାର ସିଂହଙ୍କୁ ପୁଲିସ୍ ଗିରଫ କରିଥିବା ବେଳେ ଆହୁରି ୩ ଜଣ ଅଭିଯୁକ୍ତ ଏବେ ବି ପୁଲିସ୍ ରାଡାରରେ ରହିଥିବା ଜଣେ ବରିଷ୍ଠ ପୁଲିସ୍ ଅଧିକାରୀ କହିଛନ୍ତି। ଶ୍ରୀ ସିଂହ ଅସୁଲିରେ ସାମିଲ ଥିବାନେଇ ଏତଲାରେ ରହିଥିବା ଜଣାପଡ଼ିଛି।
Advertisment

Sambad is now on WhatsApp
Join and get latest news updates delivered to you via WhatsApp