ପୁରୁଣା ଭୁବନେଶ୍ୱର: ହୁଗୁଳି ଗଲାଣି ଶ୍ରୀଲିଙ୍ଗରାଜ ମନ୍ଦିରର ସୁରକ୍ଷା ବ୍ୟବସ୍ଥା। ମନ୍ଦିରର ଚର୍ତୁପାର୍ଶ୍ବ ସୌନ୍ଦର୍ଯ୍ୟୀକରଣ କରାଯାଉଥିବା ବେଳେ ସୁରକ୍ଷା ପ୍ରତି ନଜର ଦିଆଯାଉନାହିଁ। କେତେବେଳେ କିଛି ବ୍ୟକ୍ତି ମନ୍ଦିର ଭିତରକୁ ମୋବାଇଲ ନେଇ ଗର୍ଭଗୃହର ଫଟୋ ସୋସିଆଲ ମିଡିଆରେ ଭାଇରାଲ କରୁଛନ୍ତି ତ କେତେବେଳେ ମନ୍ଦିର ବେଢ଼ାରେ ସିଗାରେଟ୍‌ ଟାଣୁଛନ୍ତି। ଆଜି ପୁଣି ଏଭଳି ଏକ ଅଭାବନୀୟ ଘଟଣା ଲିଙ୍ଗରାଜ ମନ୍ଦିରର ଢିଲା ସୁରକ୍ଷାକୁ ପ୍ରମାଣିତ କରିଛି। ତିନିଜଣ ବିଦେଶୀ ନାଗରିକ ଅନାୟାସରେ ମନ୍ଦିରରେ ପ୍ରବେଶ କରିବା ଯୋଗୁଁ ମହାପ୍ରଭୁଙ୍କ କୋଠଭୋଗ ମାରା ହେବା ସହ ନୀତି ବିଳମ୍ବ ହୋଇଛି। ଶ୍ରୀଲିଙ୍ଗରାଜ ମନ୍ଦିର ସିଂହଦ୍ବାର ପୁଲିସ ଓ ମନ୍ଦିର କର୍ମଚାରୀଙ୍କ ଅବହେଳା ଯୋଗୁଁ ଏପରି ହୋଇଥିବା ଅଭିଯୋଗ କରି ସେବାୟତମାନେ କ୍ଷୋଭ ପ୍ରକାଶ କରିଛନ୍ତି। 

Advertisment

ଆଜି ପୂର୍ବାହ୍ନ ପ୍ରାୟ ସାଢ଼େ ୯ଟାରେ ୩ଜଣ ବିଦେଶୀ ନାଗରିକ କଳା ରଙ୍ଗର ସାର୍ଟ ପ୍ୟାଣ୍ଟ୍‌ ପିନ୍ଧି ସିଂହଦ୍ବାର ବାଟେ ମନ୍ଦିରକୁ ପଶିଥିଲେ। ମନ୍ଦିର ଭିତରେ ପ୍ରବେଶ କରି ମୁଖ୍ୟ ମନ୍ଦିରର ଜଗମୋହନ ମଣ୍ଡପ ପର୍ଯ୍ୟନ୍ତ ଯାଇଥିଲେ। ସେଠାରେ ଥିବା ହୁଣ୍ଡି ନିକଟରେ କିଛି ସେବାୟତ ସେମାନଙ୍କୁ ଦେଖି ବାହାରି  ଯିବାକୁ କହିଥିଲେ। ପରେ ସେମାନେ ମନ୍ଦିର ବାହାରକୁ ଆସି କେଉଁଆଡ଼େ ଚାଲିଯାଇଥିଲେ। ଅଣହିନ୍ଦୁ ପ୍ରବେଶ ଫଳରେ ମନ୍ଦିର ନୀତି ମାରା ହୋଇଥିଲା। ଚୂନ ପାଣି ସିଞ୍ଚନ କରାଯାଇ ଧୋପଖାଳ ତଥା ରୋଷ ଶୁଦ୍ଧି କରାଯାଇଥିଲା। ସେପଟେ ଠାକୁରଙ୍କ ଭୋଗ ପ୍ରସ୍ତୁତ କରୁଥିବା ସୁଆର ସେବାୟତମାନେ କୋଠଭୋଗ ଓ ଅନ୍ୟ ଭୋଗକୁ ଅମୁଣିଆ କୂଅରେ ଫିଙ୍ଗିଥିଲେ। କମିସନରେଟ ପୁଲିସ ପକ୍ଷରୁ ମାଳମାଳ ପୁଲିସ ମନ୍ଦିରରେ ରହୁଥିବା ବେଳେ କେବଳ ମୋବାଇଲ୍‌ ଚେକିଂ କରି ଭକ୍ତଙ୍କୁ ଭିତରକୁ ପ୍ରବେଶ କରାଉଛନ୍ତି। ଠିକଣା ଭାବେ ଚେକିଂ ନ କରିବାରୁ ୨୦୨୪ ମସିହାରେ ତିନି ଥର ବିଦେଶୀ ଯୁବକ ମନ୍ଦିରକୁ ପ୍ରବେଶ କରିଥିଲେ।