ଇଣ୍ଡିଆ ବୁକ୍ ଅଫ୍ ରେକର୍ଡସ୍ରେ ଏଲ୍କେଜି ଛାତ୍ର ସ୍ବୟଂ
ମୁହଁରେ ଇଂରାଜୀ ଓ ହିନ୍ଦୀରେ ୨୫ ତାଲିକା
ବାଲିପାଟଣା: ସ୍ବୟଂ ସାହୁ। ବୟସ ମାତ୍ର ୩ ବର୍ଷ। ବନମାଳୀପୁର ଆଦର୍ଶ ଶିଶୁ ନିକେତନର ଏଲ୍କେଜିର ଛାତ୍ର। ଭଲରେ ପାଟି ଫିଟିନି କହିଲେ ଅତ୍ୟୁକ୍ତି ହେବ ନାହିଁ। କିନ୍ତୁ ଆଶ୍ଚର୍ଯ୍ୟର କଥା ସେ ବହୁ ଶବ୍ଦ ଇଂରାଜୀ ଓ ହିନ୍ଦୀରେ କହିପାରୁଛନ୍ତି। ପଶୁପକ୍ଷୀ, ପନିପରିବା ଭଳି ୨୫ପ୍ରକାର ତାଲିକାରେ ଥିବା ଶହ ଶହ ନାଁ ଉଭୟ ଇଂରାଜୀ ଓ ହିନ୍ଦୀରେ ତାଙ୍କ ମୁହଁରେ ରହିଛି। ପଚାରିବା ମାତ୍ରେ ଅନର୍ଗଳ କହିପାରୁଛନ୍ତି। ଏଭଳି ଅନନ୍ୟ ପ୍ରତିଭା ପାଇଁ ତାଙ୍କୁ ଇଣ୍ଡିଆ ବୁକ୍ ଅଫ୍ ରେକର୍ଡସ୍ରେ ସ୍ଥାନ ମିଳିଛି।
Sambad is now on WhatsApp
Join and get latest news updates delivered to you via WhatsApp
ବାଲିପାଟଣା ବ୍ଲକ୍ ବନମାଳୀପୁର ଦିୱାନ୍ପାଟଣା ମଠସାହିର କୃଷ୍ଣଚନ୍ଦ୍ର ସାହୁ ଓ ଅନ୍ନପୂର୍ଣ୍ଣାଙ୍କ ୩ ବର୍ଷର ପୁଅ ସ୍ବୟଂ ଏହି ସଫଳତା ପାଇବା ପରେ ସ୍ଥାନୀୟ ଅଞ୍ଚଳରେ ଖୁସିର ଲହରି ଖେଳି ଯାଇଛି। ସ୍ଥାନୀୟ ଅଞ୍ଚଳର ବହୁ ବିଶିଷ୍ଟ ବ୍ୟକ୍ତି ତାଙ୍କୁ ବାଲିପାଟଣାର ଗର୍ବ ଓ ଗୌରବ ବୋଲି କହିଛନ୍ତି। ସେ ଇଂରାଜୀ ଏବଂ ହିନ୍ଦୀ ଭାଷାରେ ବିଭିନ୍ନ ଜାତୀୟ ସଂକେତର ନାଁ, କବିତା, ମାସର ନାଁ, ପନିପରିବା ନାଁ, ପଶୁପକ୍ଷୀଙ୍କ ନାଁ, ଏମିତି ପାଖାପାଖି ୨୫ ପ୍ରକାର ତାଲିକାରେ ଥିବା ନାମ ମନେ ରଖିଛନ୍ତି ଓ ଭଲ ଭାବେ କହିପାରୁଛନ୍ତି। ଏହାସହ ସେ ସୁନ୍ଦର ଚିତ୍ରକଳା ବି କରିପାରନ୍ତି। ସେ ଇଣ୍ଡିଆ ବୁକ୍ ଅଫ୍ ରେକର୍ଡସ୍ରେ ସ୍ଥାନ ପାଇବାକୁ ମନୋନୀତ ହେବା ପରେ ତାଙ୍କ ପାଇଁ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟିଛି।