ଥାନା ଆଗରେ ପାଗଳ ଭଳି ରହୁଥିଲା
ରେଳଯାତ୍ରୀଙ୍କୁ ଲୁଟ୍ରେ ସମ୍ପୃକ୍ତ
ଲୁଟ୍ ଟଙ୍କାରେ କିଣିଛି ଏକାଧିକ ପ୍ଲଟ୍
Sambad is now on WhatsApp
Join and get latest news updates delivered to you via WhatsApp
ଜଟଣୀ : ଖାଇବାକୁ ପାଉ ନଥିବା କହି ଯାହାକୁ ଲୋକେ ଦୟାରେ ଖାଦ୍ୟ ପୁଡ଼ିଆ ଦେଉଥିଲେ, ସେ ଜଣେ କୋଟିପତି ଏବଂ ଏକାଧିକ ବାସଗୃହ ଜମିର ମାଲିକ। କେବଳ ସେତିକି ନୁହେଁ, ସେ ଜଣେ କୁଖ୍ୟାତ ଲୁଟେରା ମଧ୍ୟ। ଜଟଣୀ ଆର୍ପିଏଫ୍ କାର୍ଯ୍ୟାଳୟ ସମ୍ମୁଖରେ ଦୀର୍ଘ ଦିନ ହେଲା ରହି ଆସୁଥିବା ଯାଯାବର ଭଗିଆ ଶବରର ଏହା ଅସଲ ଚେହେରା। ଖୋର୍ଦ୍ଧାରୋଡ୍ ରେଲୱେ ପୁଲିସ ତାକୁ ଗିରଫ କରିବା ପରେ ସ୍ଥାନୀୟ ଅଞ୍ଚଳରେ ଭଗିଆକୁ ନେଇ ଚର୍ଚ୍ଚା ଜୋର୍ ଧରିଛି।
ଭଗିଆ ଦିନସାରା ଜଟଣୀ ବଜାରରେ ପାଗଳ ଭଳି ଏଣେତେଣେ ବୁଲାବୁଲି କରିବା ପରେ ରାତିରେ ଆର୍ପିଏଫ୍ କାର୍ଯ୍ୟାଳୟ ଆଗରେ ରହୁଥିଲା। ଆର୍ପିଏଫ୍ କର୍ମଚାରୀଙ୍କ ସମେତ ଜଟଣୀ ବାସିନ୍ଦା ତାଙ୍କୁ ଜଣେ ଯାଯାବର ପାଗଳ ବୋଲି ଭାବୁଥିଲେ। କିନ୍ତୁ ସେ ରେଳ ଷ୍ଟେସନ୍ରେ ଯାତ୍ରୀଙ୍କଠାରୁ ଟଙ୍କା ଓ ସୁନା ଗହଣା ଲୁଟ୍ କରୁଥିଲା। ଏ ସମ୍ପର୍କରେ ପୁଲିସ କୌଣସି ସୂଚନା ପାଇ ପାରୁନଥିଲା। ଗତ ଜାନୁଆରି ୧୭ ତାରିଖରେ ଭୁବନେଶ୍ୱର ଅଶୋକ ନଗର ଅଞ୍ଚଳର ଶରତ କୁମାର ମଲ୍ଲଙ୍କ ପତ୍ନୀଙ୍କଠାରୁ ଭ୍ୟାନିଟି ବ୍ୟାଗ୍ ସହ ୨ଟି ମୋବାଇଲ୍ ଫୋନ୍, ସୁନା ଚେନ୍, ନଗଦ ୨୫୦୦ ଟଙ୍କା ଲୁଟ୍ ହୋଇଥିଲା। ଶ୍ରୀ ମଲ୍ଲ ଖୋର୍ଦ୍ଧା ରୋଡ୍ ଜିଆରପି ଥାନାରେ ଅଭିଯୋଗ କରିଥିଲେ। ସେତେବେଳେ ପୁଲିସ ଲୁଟେରାକୁ ଧରିବାରେ ସକ୍ଷମ ହୋଇନଥିଲା। ରେଳପଥ ସୁରକ୍ଷା ବଳ ମଣ୍ଡଳ ସ୍ପେସାଲ୍ ଟାକ୍ସଫୋର୍ସ ତଦନ୍ତ ଦାୟିତ୍ୱ ନେଇ ଛାନ୍ଭିନ ଆରମ୍ଭ କରିଥିଲା। ଯାଞ୍ଚ ବେଳେ ଯାଯାବର ଭାବେ ଏହି ଅଞ୍ଚଳରେ ବୁଲୁଥିବା ଭଗିଆ ଶବର ନିକଟରୁ ଲୁଟ୍ ୨ ମୋବାଇଲ୍ ଫୋନକୁ ପୁଲିସ ଜବତ କରିଥିଲା । ତେବେ ଲୁଟ୍ ୨୫୦୦ ଟଙ୍କା ଏବଂ ସୁନା ଚେନ୍ ମିଳି ନଥିଲା। ତଦନ୍ତ ବେଳେ ଲୁଟ୍ ସୁନାଚେନ୍କୁ ସେ ଇଣ୍ଡିଆନ ବ୍ୟାଙ୍କ୍ ଜଟଣୀ ଶାଖାରେ ବନ୍ଧକ ରଖି ୧୫ହଜାର ଟଙ୍କା ଋଣ ନେଇଥିବା ଜଣାପଡ଼ିଥିଲା। ଭଗିଆ ନାମରେ ଜଟଣୀ ସହରସ୍ଥିତ ବିକାଶନଗର, ବିଡିଏ କଲୋନି ସହ ଅନେକ ସ୍ଥାନରେ କୋଟିଏ ଟଙ୍କାରୁ ଅଧିକ ମୂଲ୍ୟର ପ୍ଲଟ୍ ରହିଥିବା ଜଣାପଡ଼ିଛି। ଏନେଇ ଜିଆରପି ଥାନା ନମ୍ବର ୩୭/୨୧ାରେ ଏକ ମାମଲା ରୁଜୁ କରିଛି। ଆଜି ତାଙ୍କୁ କୋର୍ଟ ଚାଲାଣ କରାଯାଇଥିବା ଜଟଣୀ ଖୋର୍ଦ୍ଧା ରୋଡ୍ ଜିଆରପି ଥାନା ଅଧିକାରୀ ଧରଣୀଧର ପ୍ରଧାନ ସୂଚନା ଦେଇଛନ୍ତି। ପୁଲିସ ପାଖରେ ରହି ସେ ଲୁଟ୍ ଚଳାଇଥିବା ବେଳେ କେହି ଏହାର ସୁରାକ୍ ପାଉ ନଥିଲେ।