ଭୁବନେଶ୍ୱର: ପୋଖରୀପୁଟସ୍ଥିତ ମଧୁସୂଦନ ଦାସ ପାର୍କ ରାଜଧାନୀର ଅନ୍ୟତମ ସୁନ୍ଦର ପାର୍କ। ସୁନ୍ଦର ସୁନ୍ଦର ଗଛ, ଅତ୍ୟାଧୁନିକ ଚିତ୍ତବିନୋଦନ ବ୍ୟବସ୍ଥା ଥିବାରୁ ରାଜଧାନୀବାସୀଙ୍କ ପାଇଁ ଏହି ପାର୍କ ଏକ ସମୟରେ ଆକର୍ଷଣର କେନ୍ଦ୍ର ପାଲଟିଥିଲା। କିନ୍ତୁ ବର୍ତ୍ତମାନ ପାର୍କର ଅବସ୍ଥା ଶୋଚନୀୟ। ପିଲାଙ୍କ ଦୋଳି, ଖସଡ଼ା ଆଦି ଭାଙ୍ଗି ଯାଇଥିବା ବେଳେ ପାଇଖାନା କାମ କରୁନାହିଁ। ପାର୍କର ଏଭଳି ଅସଜଡ଼ା ଭିତ୍ତିଭୂମିକୁ ଦେଖି ଏଠାକୁ ଆସୁଥିବା ଛୋଟ ପିଲାଙ୍କଠାରୁ ବୟସ୍କଙ୍କ ପର୍ଯ୍ୟନ୍ତ ସମସ୍ତେ ନାକ ଟେକୁଛନ୍ତି।
Sambad is now on WhatsApp
Join and get latest news updates delivered to you via WhatsApp
ସୂଚନାନୁସାରେ ଏହି ପାର୍କ ପରିସରରେ ପୁରୁଷ ଓ ମହିଳାଙ୍କ ପାଇଁ ପୃଥକ ପୃଥକ ୩ଟି ଲେଖାଏ ପାଇଖାନା ଥିବା ବେଳେ ସେଥିମଧ୍ୟରୁ ଗୋଟିଏ ଲେଖାଏ ଇ-ଟଏଲେଟ୍ ମଧ୍ୟ ରହିଛି। କିନ୍ତୁ ରକ୍ଷଣାବେକ୍ଷଣ ଅଭାବରୁ ପୁରୁଷଙ୍କ ପାଇଁ ଉଦ୍ଦିଷ୍ଟ ଇ-ଟଏଲେଟ୍ କାମ କରୁନାହିଁ। ଅନ୍ୟ ଦୁଇଟି ସାଧାରଣ ଶୌଚାଳୟରେ ପାଣି ଆସୁନାହିଁ। ଫଳରେ ସକାଳେ ଓ ସନ୍ଧ୍ୟାରେ ବୁଲି ଆସୁଥିବା ଲୋକମାନେ ପାର୍କ ପରିସରରେ ହିଁ ପରିସ୍ରା କରୁଥିବା ଦେଖିବାକୁ ମିଳୁଛି। ବିଶେଷକରି ସକାଳେ ସଂଜେ ଚାଲିବାକୁ ଆସୁଥିବା ବହୁ ମଧୁମେହ ରୋଗୀ ପାଇଖାନା ଅଭାବରୁ ଯେଉଁଠି ସେଠି ପରିସ୍ରା କରିଦେଉଛନ୍ତି। ମହିଳାମାନେ ବେଶି ସମସ୍ୟାରେ ପଡ଼ୁଛନ୍ତି। ସେହିଭଳି ଦୋଳି, ଖସଡ଼ା ଆଦି ଭାଙ୍ଗି ଗଲାଣି। ତେଣୁ ପାର୍କକୁ ଆସୁଥିବା ଛୋଟ ପିଲାଙ୍କ ଖେଳିବା ପାଇଁ ଅସୁବିଧା ହେଉଛି। ପୁଣି ପାର୍କ ଭିତରେ ଫୁଟ୍ପାଥ୍ରେ ପଡ଼ିଥିବା ଟାଇଲ୍ ଉଠି ଯାଇଥିବାରୁ ବରିଷ୍ଠ ନାଗରିକମାନେ ଚାଲିବା ବେଳେ ଝୁଣ୍ଟିପଡ଼ୁଥିବା ଅଭିଯୋଗ ହେଉଛି। ଏନେଇ ସ୍ଥାନୀୟ କର୍ପୋରେଟର ଚାରୁଲତା ସାମନ୍ତରାୟ କହିଛନ୍ତି, ଏବେ ମରାମତି କାମ ଚାଲିଛି। ସବୁ ଅସୁବିଧାକୁ ଦୂର କରିବାକୁ ଉଦ୍ୟମ ଆରମ୍ଭ ହୋଇସାରିଛି।