ଭିଜିଲାନ୍ସ ଚଢ଼ାଉ ପରେ ଗିରଫ ହେଲେ କୋଟିପତି ଗଣିତ ସାର୍
ଭୁବନେଶ୍ବର: ଭିଜିଲାନ୍ସ ଜାଲରେ ପଡ଼ିଥିବା କୋଟିପତି ପ୍ରଫେସରଙ୍କୁ ଆଜି ଗିରଫ କରାଯାଇଛି । ଭୁବନେଶ୍ବର ଘାଟିକିଆସ୍ଥିତ କଲେଜ ଅଫ୍ ଇଞ୍ଜିନିୟରିଂ ଆଣ୍ଡ ଟେକ୍ନୋଲୋଜି(ସିଇଟି)ର ଗଣିତ ବିଭାଗର ସହକାରୀ ପ୍ରଫେସର ପ୍ରସନ୍ନ କୁମାର ମିଶ୍ରଙ୍କ ଘରେ ସୋମବାର ଭୁବନେଶ୍ବର ଭିଜିଲାନ୍ସ ଡିଭିଜନ ଚଢ଼ଉ କରିଥିଲା । ଚଢ଼ଉ ସମୟରେ ୨ କୋଟିରୁ ଅଧିକ ଟଙ୍କାର ସମ୍ପତ୍ତି ଠାବ ହୋଇଥିଲା । ସିଇଟିରେ ବାୟୋଟେକ୍ନୋଲୋଜି ବିଭାଗରେ ଠିକା ଅଧ୍ୟାପିକା ଥିବା ତାଙ୍କ ପତ୍ନୀଙ୍କ କାର୍ଯ୍ୟାଳୟ ଚାମ୍ବରରେ ମଧ୍ୟ ଖାନତଲାସି କରାଯାଇଥିଲା । ଏତେ ସମ୍ପତ୍ତି କେମିତି ହାତେଇଲେ, ସେ ନେଇ ଶ୍ରୀ ମିଶ୍ରଙ୍କୁ ଭିଜିଲାନ୍ସ ଜେରା କରିଥିଲା।
Sambad is now on WhatsApp
Join and get latest news updates delivered to you via WhatsApp
ଭିଜିଲାନ୍ସ ସୂତ୍ରରୁ ମିଳିଥିବା ସୂଚନା ଅନୁସାରେ, ପ୍ରସନ୍ନ ମିଶ୍ରଙ୍କ ବିରୋଧରେ ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗ ଆସିବା ପରେ ଗତକାଲି ସକାଳୁ ଭୁବନେଶ୍ବର ଭିଜିଲାନ୍ସ ଡିଭିଜନ୍ର ୫ଟି ଟିମ୍ ଚଢ଼ଉ ଆରମ୍ଭ କରିଥିଲେ। ସିଇଟିରେ ଥିବା କାର୍ଯ୍ୟାଳୟ, ଖଣ୍ଡଗିରିରେ ଥିବା ଘର, ଖୋର୍ଦ୍ଧା ଜିଲ୍ଲା ଟାଙ୍ଗୀ କାଳୁପଡ଼ାଘାଟରେ ଥିବା ପୈତୃକ ଘରେ ଚଢ଼ଉ ହୋଇଥିଲା। ଚଢ଼ଉ ସମୟରେ ଖଣ୍ଡଗିରିବାରିରେ ସେ ରହୁଥିବା ଚାରି ମହଲା କୋଠା, ନିର୍ମାଣାଧୀନ ଥିବା ଆଉ ଏକ ଚାରି ମହଲା କୋଠା ଠାବ ହୋଇଥିଲା। ଏହି ଦୁଇଟି କୋଠାର ମୂଲ୍ୟ ୧ କୋଟି ୫୨ ଲକ୍ଷ ଟଙ୍କା ହେବ ବୋଲି ଆକଳନ କରାଯାଇଛି। ସେହିପରି ଦୁଇଟି ଜମି ମଧ୍ୟ ମିଳିଛି, ଯାହାର ମୂଲ୍ୟ ୧୪ଲକ୍ଷ ୮୫ ହଜାର ଟଙ୍କା ହେବ ବୋଲି ଜଣାପଡ଼ିଛି। ସେହିପରି ୩୬ ଲକ୍ଷ ୩୬ ହଜାର ଟଙ୍କାର ବ୍ୟାଙ୍କ ଜମା, ୩ ଲକ୍ଷ ୮୭ ହଜାର ଟଙ୍କାର ଗହଣା, ୫ ଲକ୍ଷ ୫୧ ହଜାର ଟଙ୍କାର ଆସବାବପତ୍ର ମିଳିଛି। ମୋଟ୍ ସମ୍ପତ୍ତିର ପରିମାଣ ୨ କୋଟି ୧୯ ଲକ୍ଷ ୬୩ ହଜାର ଟଙ୍କା ହେବ ବୋଲି ଭିଜିଲାନ୍ସ ପକ୍ଷରୁ ହିସାବ କରାଯାଇଛି।