ବାରଙ୍ଗ: ବିଶ୍ୱ ବ୍ୟାଘ୍ରଦିବସରେ ପ୍ରଥମକରି ମା’ ହୋଇଛି ନନ୍ଦନକାନନ ପ୍ରାଣୀ ଉଦ୍ୟାନର ଧଳାରଙ୍ଗର ବାଘୁଣୀ ମୌସୁମୀ। ଗତକାଲି ରାତି ୮ଟା ୫୧ ମିନିଟ୍‌ରେ ମୌସୁମୀ ରହିଥିବା କକ୍ଷ ମଧ୍ୟରେ ନିଜର ପ୍ରଥମ ଶାବକକୁ ଜନ୍ମ ଦେଇଥିବା ପ୍ରାଣୀଉଦ୍ୟାନ କର୍ତ୍ତୃପକ୍ଷ ସିସିଟିଭି ଦେଖି ଜାଣିବାକୁ ପାଇ ଥିଲେ। ସାଧାରଣ ନାଲିରଙ୍ଗର ମହାବଳ ରାଜେଶ ସହିତ ମିଳନରୁ ଏହି ଶାବକଟି ଜନ୍ମ ହୋଇଛି। ବ୍ୟାଘ୍ର ଦିବସରେ ମୌସୁମୀ ଶାବକ ଜନ୍ମ ଦେଇଥିବା ଖବର ପ୍ରଚାରିତ ହେବାପରେ ଖୁସିର ଲହରି ଖେଳି ଯାଇଥିଲା। ମୌସୁମୀ ତା୩ପରେ ପରେ ଆହୁରି ଦୁଇଟି ସାଧାରଣ ନାଲିରଙ୍ଗର ଶାବକଙ୍କୁ ଜନ୍ମ ଦେଇଥିଲା। ହେଲେ ଜନ୍ମିତ ମୋଟ୍‌ ୩ଟି ଶାବକ ଭିତରୁ ୨ଟି ମୃତ ଅପସ୍ଥାରେ ଜନ୍ମ ହୋଇଥିଲେ। ବଞ୍ଚିଥିବା ଶାବକଟି ଅତ୍ୟନ୍ତ ଦୁର୍ବଳ ଥିବା ଜଣାପଡ଼ିଛି। ତା’କୁ ମା’ଠାରୁ ଅଲଗା କରି ପ୍ରାଣୀ ଚିକିତ୍ସାକେନ୍ଦ୍ର ପରିସରର ହ୍ୟାଣ୍ଡରିଅରିଂ କକ୍ଷ ବା ଲାଳନପାଳନକେନ୍ଦ୍ରକୁ ନିଆଯାଇ କର୍ମଚାରୀଙ୍କ ତତ୍ତ୍ୱାବଧାନରେ ରଖାଯାଇଛି। ଏହି ଶାବକଟିକୁ ମିଶାଇ ନନ୍ଦନକାନନର ମୋଟ୍‌ ବାଘ ସଂଖ୍ୟା ୨୬କୁ ବୃଦ୍ଧି ପାଇଛି। ସେମାନଙ୍କ ମଧ୍ୟରେ ସାଧାରଣ ନାଲିରଙ୍ଗର ୧୭ଟି (୮ ବାଘୁଣୀ, ୮ ମହାବଳ ଓ ୧ ଲିଙ୍ଗ ଚିହ୍ନଟ ହୋଇନଥିବା ଶାବକ), ବିରଳ କଳାରଙ୍ଗର ୪ଟି ( ୩ ମହାବଳ ଓ ୧ବାଘୁଣୀ) ଓ ଧଳାରଙ୍ଗର ୫ଟି (୩ ମହାବଳ ଓ ୨ବାଘୁଣୀ) ଅଛନ୍ତି। ସୂଚନାଯୋଗ୍ୟ, ନିଜେ ମୌସୁମୀ ବି ଏହି ନନ୍ଦନକାନନରେ ଜନ୍ମ ହୋଇଛି। ୨୦୧୬ ମସିହା ଅଗଷ୍ଟ ୫ ତାରିଖରେ ସାଧରଣ ନାଲିରଙ୍ଗର ମହାବ ବାଘ ମନିଷ ଓ ଧଳାରଙ୍ଗର ବାଘୁଣୀ ସ୍ନେହାଙ୍କ ମିଳନରୁ ସେ ଜନ୍ମଲାଭ କରିଥିଲା।