ଭୁବନେଶ୍ବର: ‘ଯେଉଁମାନେ ଅନୁପ୍ରବେଶକାରୀ ସେମାନଙ୍କୁ ବାହାର କରାଯିବ। ମାତ୍ର ଯେଉଁ ବାଂଲାଦେଶୀ ଏଠାରେ ରହିବା ସହ ସେମାନଙ୍କର ଆଧାର, ରାସନ୍‌ କିମ୍ବା ଭୋଟର କାର୍ଡ ରହିଛି ଏବଂ ନାଗରିକ ଭାବେ ଏଠାରେ ରହୁଛନ୍ତି ସେମାନଙ୍କୁ ବାହାର କରିବା ସମ୍ଭବ ନୁହେଁ। ସେମାନଙ୍କୁ କିଭଳି ଭଲରେ ରଖିବା ତାହା ଆମମାନଙ୍କ ଦାୟିତ୍ବ’। ମେୟର ସୁଲୋଚନା ଦାସଙ୍କ ଏଭଳି ବକ୍ତବ୍ୟ ଆଜି ରାଜଧାନୀ ରାଜନୀତିକୁ ଉଷ୍ମ କରିଛି। ନୀଳାଦ୍ରିବିହାରଠାରୁ ରାଜମହଲ ପର୍ଯ୍ୟନ୍ତ, ମେୟରଙ୍କ ବିରୋଧର ନିଆଁ ବ୍ୟାପିବାରେ ଲାଗିଛି। ବାଂଲାଦେଶୀଙ୍କୁ ସମର୍ଥନ ଜଣାଉଥିବା ଅଭିଯୋଗରେ ମେୟର ଶ୍ରୀ ଦାସଙ୍କ ଇସ୍ତଫା ଦାବିରେ ବିଭିନ୍ନ ସଙ୍ଗଠନ ରାଜରାସ୍ତାକୁ ଓହ୍ଲାଇଛନ୍ତି। ଯୁବକମାନେ କଳାପତାକା ପ୍ରଦ‌ର୍ଶନ କରିବା ସହ ମେୟରଙ୍କ ଉପରକୁ କଳାକପଡ଼ା ଫିଙ୍ଗିଛନ୍ତି।  ବିଏମ୍‌ସିରେ ବିରୋଧୀ ଭୂମିକାରେ ଥିବା ଶାସକ ବିଜେପି ଦଳର ନେତାମାନେ ମେୟରଙ୍କ ବକ୍ତବ୍ୟଙ୍କୁ ନିନ୍ଦା କରିବା ସହ ମେୟରଙ୍କ ଇସ୍ତଫା ଦାବି କରିଛନ୍ତି। 

Advertisment

ନୀଳାଦ୍ରିବିହାରଠାରେ ୧୪ ନମ୍ବର ଵାର୍ଡ ଅଫିସଠାରେ ଅଭିଯୋଗ ଶୁଣାଣି ଶିବିରରେ ଯୋଗଦେଇ ମେୟର ଶ୍ରୀମତୀ ଦାସ ଫେରିବା ସମୟରେ କିଛି ଯୁବକ ତାଙ୍କୁ ଘେରିଯାଇଥିଲେ। ବାଂଲାଦେଶୀ ମେୟର ଇସ୍ତଫା ଦିଅ ନାରା ଦେଇ ଯୁବକମାନେ ମେୟରଙ୍କ ଗାଡ଼ି ଆଡ଼କୁ ମାଡ଼ିଯାଇଥିଲେ। ଗାଡ଼ିରୁ ଓହ୍ଲାଇ ଯୁବକମାନଙ୍କ ସହ ଆଲୋଚନା କରିଥିଲେ।  ମାତ୍ର ଯୁବକମାନେ ସିଧାସଳଖ ମେୟରଙ୍କୁ ଦୋଷାରୋପ କରିବା ସହ ବାଂଲାଦେଶୀଙ୍କୁ ଭୁବନେଶ୍ବରରୁ ନ ତଡ଼ିବା ପର୍ଯ୍ୟନ୍ତ ଏଭଳି ବିରୋଧ କରାଯିବ ବୋଲି ଚେତାବନୀ ଦେଇଥିଲେ।  ବକ୍ତବ୍ୟ ସମ୍ପର୍କରେ ମେୟର ସ୍ପଷ୍ଟୀକରଣ ଦେଇଥିଲେ ମଧ୍ୟ ଯୁବକମାନେ ତାହାଗ୍ରହଣ କରି ନଥିଲେ। ଏହାପରେ ମେୟର ସ୍ଥାନ ଛାଡ଼ି ପଳାଇଥିଲେ।

ଗୁରୁତ୍ବପୂର୍ଣ୍ଣ କଥା ହେଉଛି, ଅଭିଯୋଗ ଶୁଣାଣି ଶିବିର ଆରମ୍ଭ ହେବା ପୂର୍ବରୁ ୮ରୁ ଅଧିକ ପୁଲିସ କର୍ମଚାରୀ ସେଠାରେ ଉପସ୍ଥିତଥିଲେ। ହେଲେ ଯୁବକମାନଙ୍କ ବିରୋଧ ବେଳେ ପୁଲିସ  ଚୁପ୍‌ ରହିବା, ଯୁବକମାନେ ବିନା ବାଧାରେ ମେୟରଙ୍କୁ ଉପରକୁ କଳାକପଡ଼ା ଫିଙ୍ଗିବା ସମୟରେ ନ ଅଟକାଇବାକୁ ନେଇ ଏବେ ପ୍ରଶ୍ନ ଉଠିଛି। ଯଦି ଜନପ୍ରତିନିଧିଙ୍କୁ ସୁରକ୍ଷା ଦେବାରେ ପୁଲିସ ବିଫଳ, ତେବେ‌ ସାଧାରଣ ଲୋକେ କିଭଳି ନ୍ୟାୟ ପାଇବେ ବୋଲି ଅଞ୍ଚଳବାସୀ କହିଛନ୍ତି। ବିଜେପି ବିଧାୟକ ବାବୁ ସିଂହ କହିଛନ୍ତି, ମେୟର ସରକାର କିମ୍ବା ସମ୍ବିଧାନ ଉପରେ ନୁହନ୍ତି। ବାଂଲାଦେଶୀ କିଭଳି ରାସନ, ଆଧାର ଓ ଭୋଟର କାର୍ଡ ପାଇଲେ ତାହାର ଯାଞ୍ଚ ସହ ସେମାନଙ୍କୁ ତୁରନ୍ତ ବିଦା କରାଯାଉ।  ଦେଶ ସୁରକ୍ଷା ଆଗରେ କାହା ସହ ସାଲିସ କରାଯାଇପାରିବ ନାହିଁ। ମେୟର ଭୁବନେଶ୍ବରର ପ୍ରଥମ ନାଗରିକ ବୋଲି ଭୁଲିଯିବା ଉଚିତ ନୁହେଁ ବୋଲି ଶ୍ରୀ ସିଂହ କହିଛନ୍ତି।

ରାଜମହଲରେ କୁଶପୁତ୍ତଳିକା ଦାହ
ମେୟରଙ୍କ ବାଂଲାଦେଶୀ ମନ୍ତବ୍ୟକୁ ନେଇ ଆଞ୍ଚଳିକ ସୁରକ୍ଷା ମଞ୍ଚ ତୀବ୍ର ବିରୋଧ କରିଛି। ମଞ୍ଚ ସଭାପତି ଜଗନ୍ନାଥ ପ୍ରଧାନଙ୍କ ନେତୃତ୍ବରେ ରାଜମହଲ ଛକରୁ ଶିଶୁଭବନ ଛକ ପର୍ଯ୍ୟନ୍ତ ଅନୁଷ୍ଠିତ ଶୋଭାଯାତ୍ରାରେ ଶତାଧିକ ଲୋକ ଯୋଗଦେଇ ମେୟର ଶ୍ରୀମତୀ ଦାସଙ୍କ ମନ୍ତବ୍ୟକୁ ନିନ୍ଦା କରିବା ସହ କୁଶପୁତ୍ତଳିକା ଦାହ କରିଥିଲେ।  ସଭାପତି ଶ୍ରୀ ପ୍ରଧାନ କହିଛନ୍ତି, ୟ ବଂଲାଦେଶୀଙ୍କ ଅନୁପ୍ରବେଶ ଓ ବେଆଇନ ଭାବେ ବସବାସ କରିବା ଦେଶ ଓ ରାଜ୍ୟର ଆଭ୍ୟନ୍ତରୀଣ ସୁରକ୍ଷା ପାଇଁ  ବିପଦ। ଏଥିପାଇଁ କେନ୍ଦ୍ର ଓ ରାଜ୍ୟ ସରକାର ସେମାନଙ୍କୁ ବିତାଡିତ କରିବାକୁ ଯୋଜନା ପ୍ରସ୍ତୁତ କରିଛନ୍ତି। ଆଇନ ପ୍ରସ୍ତୁତ କରୁଥିବା ସମୟରେ ମେୟର ଏକ ସାମ୍ବିଧାନିକ ପଦରେ ରହି ଭାରତ ବିରୋଧରେ ଷଡଯନ୍ତ୍ର କରୁଥିବା ବାଂଲାଦେଶୀଙ୍କୁ ସମର୍ଥନ କରିବା ନିନ୍ଦନୀୟ ଓ ରାଷ୍ଟ୍ର ବିରୋଧୀ। ତେଣୁ ମେୟର  ତୁରନ୍ତ ନିଜ ପଦବିରୁ ଇସ୍ତଫା ଦିଅନ୍ତୁ। ଏଥିସହ ଦେଶବାସୀଙ୍କ ନିକଟରେ ନିସର୍ତ୍ତ କ୍ଷମା ପ୍ରାର୍ଥନା କରନ୍ତୁ ବୋଲି ଶ୍ରୀ ପ୍ରଧାନ ଦାବି କରିଛନ୍ତି।