ଖଣ୍ଡଗିରି ଓ ଉଦୟଗିରିରେ ମକ୍ଡ୍ରିଲ୍: ଶିଖିଲେ ପ୍ରାକୃତିକ ବିପର୍ଯ୍ୟୟରୁ ଉଦ୍ଧାର କୌଶଳ
ଭୁବନେଶ୍ବର: ପ୍ରାକୃତିକ ବିପର୍ଯ୍ୟୟ ବେଳେ ପାହାଡ଼ରେ ଫସିଥିବା ପର୍ଯ୍ୟଟକଙ୍କୁ ଉଦ୍ଧାର କରିବା ପାଇଁ ଆଜି ଖଣ୍ଡଗିରି ଓ ଉଦୟଗିରିରେ ମକଡ୍ରିଲ୍ କରାଯାଇଛି। ଏନ୍ଡିଆର୍ଏଫ୍, ଓଡ୍ରାଫ୍, ଅଗ୍ନିଶମ ଓ ପ୍ରଶମନ ବିଭାଗ, ସିଭିଲ ଡିଫେନ୍ସ ଏବଂ ନେହରୁ ଯୁବକେନ୍ଦ୍ର ସଂଗଠନ ମିଳିତ ଭାବେ ଏହି ଅଭ୍ୟାସ କରିଛନ୍ତି। ପଥର ତଳେ ଚାପି ହୋଇ ରହିଥିବା ପର୍ଯ୍ୟଟକଙ୍କୁ ଉଦ୍ଧାର, ଭୂମିକମ୍ପରେ ଫସିଥିବା ଲୋକଙ୍କୁ ସୁରକ୍ଷିତ ଭାବେ ବାହାରକୁ ଆଣିବା ଏବଂ ଭୂ-ସ୍ଖଳନ ଭଳି ପ୍ରାକୃତିକ ବିପର୍ଯ୍ୟୟରେ ଲୋକଙ୍କୁ ଉଦ୍ଧାର କରିବାର କୌଶଳ ଶିଖା ଯାଇଥିଲା। ଏହାବ୍ୟତୀତ ରୋପ୍-ୱେ ସହାୟତାରେ ବିପନ୍ନଙ୍କୁ ଉଦ୍ଧାର ଏବଂ ଶୀଘ୍ର ଡାକ୍ତରଖାନାରେ ଭର୍ତ୍ତି କରାଯିବାର କୌଶଳ ମଧ୍ୟ ପ୍ରଦର୍ଶନ କରାଯାଇଥିଲା। ମକ୍ଡ୍ରିଲ୍ ସମୟରେ ଯେପରି ପର୍ଯ୍ୟଟକଙ୍କ ଯାତାୟାତରେ କୌଣସି ସମସ୍ୟା ନ ଉପୁଜିବ, ସେଥିପାଇଁ ସ୍ବତନ୍ତ୍ର ବ୍ୟବସ୍ଥା ମଧ୍ୟ କରାଯାଇଥିଲା। ପ୍ରତିଟି ବିଭାଗର ପ୍ରାୟ ୨୦ଜଣ ସଦସ୍ୟ, ମୋଟ ୧୦୦ ସଦସ୍ୟ ଏହି ମକ୍ଡ୍ରିଲ୍ରେ ଭାଗ ନେଇଥିଲେ। ପ୍ରାୟ ୩ରୁ ୪ଘଣ୍ଟା ଧରି ଚାଲିଥିବା ଏହି ମକ୍ଡ୍ରିଲ୍ରେ ସ୍ଥାନୀୟ ଖଣ୍ଡଗିରି ଥାନା ପୁଲିସ ଉପସ୍ଥିତ ଥିଲା।