ଖଣ୍ଡଗିରି: ୧୨ ତାରିଖରୁ ନିଖୋଜ ହୋଇଯାଇଥିବା ଜଣେ ମହିଳାଙ୍କ ଗଳିତ ଶବକୁ ଆଜି ସକାଳେ ଇନ୍‌ଫୋଭ୍ୟାଲି ଥାନା ପୁଲିସ କାଇମାଟିଆ ଗାଁ ସଂଲଗ୍ନ ଜଙ୍ଗଲରୁ ଜବତ କରିଛି। ଗଛରୁ ଝୁଲନ୍ତା ଅବସ୍ଥାରେ ମିଳିଥିବା ମହିଳାଙ୍କ ମୃତଦେହ କାଇମାଟିଆପାଟଣା ଗ୍ରାମର ସସ୍ମିତା ପୃଷ୍ଟି(୫୧)ଙ୍କର ବୋଲି ସ୍ପଷ୍ଟ ହୋଇଛି। ପାରିବାରିକ କଳହକୁ କେନ୍ଦ୍ରକରି ସେହିଦିନ ସନ୍ଧ୍ୟାରେ ସସ୍ମିତା ଘରୁ ପଳାଇବା ପରେ ବେକରେ ନିଜ ଶାଢ଼ି ବାନ୍ଧି ଏକ ଗଛରେ ଝୁଲି ଆତ୍ମହତ୍ୟା କରିଥିବା ଅନୁମାନ କରାଯାଉଛି। ପୁଲିସ ଅପମୃତ୍ୟୁ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି।
ସସ୍ମିତା ଓ ତାଙ୍କ ସ୍ବାମୀ ବିଦ୍ୟାଧର ପୃଷ୍ଟିଙ୍କର ଗୋଟିଏ ପୁଅ ଓ ଗୋଟିଏ ଝିଅ ଅଛନ୍ତି। ଝିଅ ପୂର୍ବରୁ ବାହା ହୋଇ ସାରିଛନ୍ତି। ୪ମାସ ତଳେ ପୁଅ କମଳଲୋଚନ ପୃ‌ଷ୍ଟି ପ୍ରେମ ବିବାହ କରିଥିଲେ। ସେବେଠାରୁ ଘରେ ଅଶାନ୍ତି ଲାଗି ରହିଥିଲା। ୧୨ତାରିଖ  ଅର୍ଥାତ୍ ଶନିବାର ଅପରାହ୍ନରେ କୌଣସି କଥାକୁ ନେଇ ଘରେ ପୁଣି ଝଗଡ଼ା ଲାଗିଥିଲା। ଏହାପରେ ସସ୍ମିତା କାହାକୁ କିଛି ନ ଜଣାଇ ଘର ଛାଡ଼ି ପଳାଇଥିଲେ। ପଡ଼ିଶାଘରକୁ ଯାଇଥିବା ଭାବି ଘରଲୋକ ଏହାକୁ ଗୁରୁତ୍ବ ଦେଇନଥିଲେ। ମାତ୍ର ସନ୍ଧ୍ୟା ସୁଦ୍ଧା ସସ୍ମିତା ନ ଫେରିବାରୁ ଘରଲୋକମାନେ ଖୋଜାଖୋଜି କରିଥିଲେ। ବିଳମ୍ବିତ ରାତି ସୁଦ୍ଧା ତାଙ୍କ ପତ୍ତା ନ ମଳିବାରୁ ପୁଅ କମଳଲୋଚନ ଇନ୍‌ଫୋଭ୍ୟାଲି ଥାନାରେ ନିଖୋଜ ଅଭିଯୋଗ କରିଥିଲେ। ଆଜି ସକାଳେ ସ୍ଥାନୀୟ ଅଞ୍ଚଳର କିଛି ଲୋକ ଜାଳେଣି କାଠ ସଂଗ୍ରହ କରିବାକୁ ନିକଟସ୍ଥ ଜଙ୍ଗଲକୁ ଯାଇଥିବା ବେଳେ ଏକ ଗଛରେ ସସ୍ମିତାଙ୍କ ମୃତଦେହ ଝୁଲୁଥିବା ଦେଖିବାକୁ ପାଇଥିଲେ।