ଭଅଁରା ଜଙ୍ଗଲରୁ ଯୁବକଙ୍କ ମୃତଦେହ ଜବତ, ୨୨ ଦିନ ହେଲା ନିଖୋଜ ଥିଲେ
ବାଲିପାଟଣା : ୨୨ ଦିନ ହେଲା ନିଖୋଜ ଥିବା ଜଣେ ଯୁବକଙ୍କ ମୃତଦେହକୁ ସୋମବାର ଦିନ ସ୍ଥାନୀୟ ଭଅଁରାଗଡ଼ ଜଙ୍ଗଲରୁ ଜବତ କରାଯାଇଛି। ମୃତକ ହେଲେ ସ୍ଥାନୀୟ ଦେଉଳିଧରପୁର ଭାଲିଆଦଣ୍ଡା ଗାଁର ଧନେଶ୍ବର ବେହେରାଙ୍କ ପୁଅ ଆଶିଷ୍ କୁମାର ବେହେରା (୩୫)। ବାଲିପାଟଣା ଥାନା ପୁଲିସ ଗଳିତ ଶବକୁ ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲକୁ ପଠାଇଛି।
Sambad is now on WhatsApp
Join and get latest news updates delivered to you via WhatsApp
ଆଶିଷ ଗତ ଜାନୁଆରି ୨୩ରୁ ନିଖୋଜ ହୋଇଯାଇଥିଲେ ବୋଲି ପରିବାର ପକ୍ଷରୁ ଅଭିଯୋଗ ହୋଇଥିଲା। ପରିବାର ଲୋକେ ୨୪ ତାରିଖରେ ବାଲିପାଟଣା ଥାନାରେ ଲିଖିତ ଅଭିଯୋଗ କରିବା ପରେ ତାଙ୍କୁ ଠାବ କରିବାକୁ ପୁଲିସ ବିଭିନ୍ନ ପଦକ୍ଷେପ ଗ୍ରହଣ କରିଥିଲା। କିନ୍ତୁ ଆଜି ଅପରାହ୍ନରେ ଭଅଁରାଗଡ ଜଙ୍ଗଲରେ ଜାଳେଣି କାଠ ସଂଗ୍ରହ କରୁଥିବା କିଛି ଲୋକ ଏହି ଗଳିତ ମୃତଦେହକୁ ଦେଖିଥିଲେ। ପ୍ରବଳ ଦୁର୍ଗନ୍ଧ ହେବାରୁ ସେମାନେ ଘଟଣାସ୍ଥଳକୁ ଯାଇ ମୃତଦେହ ପଡ଼ିଥିବା ଦେଖିବାକୁ ପାଇଥିଲେ। ସେମାନଙ୍କଠାରୁ ଖବର ପାଇ ପୁଲିସ ସେଠାରେ ପହଞ୍ଚିଥିଲା। ବ୍ୟବଛେଦ ରିପୋର୍ଟ ମିଳିବା ପରେ ଆଶିଷଙ୍କ ମୃତ୍ୟୁର କାରଣ ଜଣାପଡ଼ିବ। ତେବେ କୌଣସି ବିଷଧର ସର୍ପ ଦଂଶନରୁ ତାଙ୍କ ମୃତ୍ୟୁ ହୋଇଥିବା ଅନୁମାନ କରାଯାଉଛି।