ରଜରେ ବିକିଲେ ଗୋଧି ମାଂସ, ଚମଡ଼ା; ୨ ଗିରଫ, ୮ ଜୀବନ୍ତ ଗୋଧି ଉଦ୍ଧାର
ଲୋକେ ଧରିଲେ, ଘଟଣାସ୍ଥଳରେ ଉତ୍ତେଜନା
ଭୁବନେଶ୍ବର : ରଜ ଭଳି ପର୍ବରେ ରାଜଧାନୀରେ ବିକ୍ରି ହେଉଥିଲା ଗୋଧି ମାଂସ ଓ ଚମଡ଼ା। ଚୀନ ଓ ଥାଇଲାଣ୍ଡ ଭଳି ସ୍ପଷ୍ଟ ଦିବାଲୋକରେ ଏଭଳି କାରବାର ହେଉଥିବା ଦେଖି ସ୍ଥାନୀୟ ଲୋକେ ଆଶ୍ଚର୍ଯ୍ୟ ହୋଇ ଯାଇଥିଲେ। ତେବେ ସକାଳଠୁ ଏହି ବେପାର ଚାଲିଲେ ମଧ୍ୟ ପୁଲିସ କି ବନ ବିଭାଗ କାହାରି ଆଖିରେ ପଡ଼ିଲାନି। ଏହାକୁ ନେଇ ଘଟଣାସ୍ଥଳରେ ଉତ୍ତେଜନା ମଧ୍ୟ ଦେଖାଦେଇଥିଲା। ଶେଷରେ ସନ୍ଧ୍ୟା ବେଳକୁ ଲୋକେ ଦୁଇ ଜଣଙ୍କୁ ଅଟକ ରଖି ପୁଲିସକୁ ଖବର ଦେଇଥିଲେ। ପୁଲିସ ସେମାନଙ୍କୁ ବନ ବିଭାଗକୁ ହସ୍ତାନ୍ତର କରିବା ପରେ ଉଭୟଙ୍କୁ ଗିରଫ କରାଯାଇଛି। ଗିରଫ ଦୁଇ ଜଣ ହେଉଛନ୍ତି ଲକ୍ଷ୍ମୀସାଗର ତାରିଣୀ ବସ୍ତି ଅଞ୍ଚଳର ଜି. କ୍ରିଷ୍ଣା ଓ ମଞ୍ଚେଶ୍ବର ଅଞ୍ଚଳର ଜି. ରାଘବ ପ୍ରଧାନ। ସେମାନଙ୍କ ନିକଟରୁ ୮ଟି ଜୀବନ୍ତ ଗୋଧି ଉଦ୍ଧାର କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ, ସୋମବାରସକାଳୁ ସକାଳୁ ଝାରପଡ଼ାରୁ ଜଗନ୍ନାଥ ନଗର ପ୍ରବେଶ ରାସ୍ତା ପୋଲ ନିକଟରେ ଗୋଧି ମାଂସ ବିକ୍ରି ହେଉଥିବା ଖବର ଲୋକଙ୍କ କାନରେ ବାଜିଥିଲା। କିନ୍ତୁ କେହି ସେଠାକୁ ଯାଇ ନ ଥିଲେ। ତେବେ ସନ୍ଧ୍ୟାରେ ମଧ୍ୟ ସେଠାରେ କିଛି ଲୋକ ସନ୍ଦିଗ୍ଧ ଅବସ୍ଥାରେ ଠିଆ ହୋଇଥିବା ଦେଖି ସ୍ଥାନୀୟ ଲୋକ ପହଞ୍ଚିଥିଲେ। ସେମାନେ ଏକ ଘର ଭିତରେ ଦୁଇଟି ବସ୍ତାରେ ଗୋଧି ରଖାଯାଇଥିବା ଦେଖିବାକୁ ପାଇଥିଲେ। ଦୁଇଟି ଗୋଧି ତଳେ ବନ୍ଧା ଯାଇଥିବାବେଳେ ପାଖରେ ରକ୍ତ ଛିଟା, କିଛି ମାଂସ ଖଣ୍ଡ ମଧ୍ୟ ପଡ଼ିଥିବା ସ୍ଥାନୀୟ ଲୋକ କହିଥିଲେ। ଏହା ଦେଖି କିଛି ଲୋକ ସେଠାରୁ କଟା ଯାଇଥିବା ମାଂସକୁ ଅଖାରେ ଭର୍ତ୍ତି କରି ପଳାଇଥିଲେ। ଧୀରେ ଧୀରେ ଲୋକ ରୁଣ୍ଡ ହେବା ପରେ ପୁଲିସ କଣ୍ଟ୍ରୋଲ ରୁମକୁ ଖବର ଯାଇଥିଲା। ପିସିଆର ଭ୍ୟାନ୍ ପହଞ୍ଚି କ୍ରିଷ୍ଣା ଓ ରାଘବକୁ ଧରିବା ସହ ୮ଟି ଜୀବନ୍ତ ଗୋଧି ଉଦ୍ଧାର କରିଥିଲା। ଏହା ପରେ ସିଟି ଫରେଷ୍ଟ ଡିଭିଜନକୁ ଖବର ଦିଆଯାଇଥିଲା। ବନ କର୍ମଚାରୀମାନେ ଲକ୍ଷ୍ମୀସାଗର ଥାନାରେ ପହଞ୍ଚିବା ପରେ ଅଟକ ଦୁଇ ଜଣଙ୍କୁ ଓ ଜୀବନ୍ତ ଗୋଧି ହସ୍ତାନ୍ତର କରାଯାଇଥିଲା।
ଜଣେ ବ୍ୟକ୍ତିଙ୍କ କହିବା ଅନୁସାରେ, ସୋମବାର ସକାଳୁ ଏହି ଗୋଧି ମାଂସ ଓ ଚମଡ଼ା ବେପାର ଆରମ୍ଭ ହୋଇଥିଲା। କିଲୋ ୫ ଶହରୁ ଅଧିକ ଟଙ୍କାରେ ମାଂସ ବିକ୍ରି ହେଉଥିବା ବେଳେ ଚମଡ଼ା ୮ଶହରୁ ୧ ହଜାର ଟଙ୍କାରେ ବିକ୍ରି କରାଯାଉଥିଲା। କେତେକ ଲୋକ ମାଂସ ଓ ଚମଡ଼ା ନେଇଛନ୍ତି। ଆଉ କେତେକ ଲୋକ ନେବା ପାଇଁ ଛିଡ଼ା ହୋଇଥିଲେ। କିନ୍ତୁ ପୁଲିସ ଆସିବା ଦେଖି ସେମାନେ ପଳାଇ ଯାଇଥିଲେ। ଅଭିଯୁକ୍ତଙ୍କ ଘର ନିକଟରେ ରହୁଥିବା ଜଣେ ସମ୍ପର୍କୀୟ କହିଛନ୍ତି, ଘରର ପୁରୁଷ ଲୋକ କାମକୁ ଯାଇଥିଲେ। ସେଇଠି କିଛି ଗୋଧି ପାଇଲେ। ଆମେ ବାପ, ଅଜା ଅମଳରୁ ଗୋଧି ଖାଉଛୁ। ବର୍ଷା ଦିନ ବୋଲି ଗୋଧି ବାହାରିଥିବାରୁ ଧରିକି ନେଇ ଆସିଲେ। ଆମେ ମିଳିମିଶି ରୋଷେଇ କରି ଖାଇଥାନ୍ତୁ।