ଭୁବନେଶ୍ବର: ମୁନ୍ଲାଇଟ୍ ୟୁଥ୍ କ୍ଲବ୍ ଆନୁକୂଲ୍ୟରେ ବିଜେବି କଲେଜ ପଡ଼ିଆରେ ଗୁରୁବାରଠୁ ଆରମ୍ଭ ହୋଇଛି ଷଷ୍ଠ ନବ ଦାସ ଓ ଦ୍ବିତୀୟ ପ୍ରଶାନ୍ତ ମହାପାତ୍ର ସ୍ମାରକୀ ଟ୍ବେଣ୍ଟି-୨୦ କ୍ରିକେଟ୍ ପ୍ରତିଯୋଗିତା। ପ୍ରଥମ ଦିନରେ ଜ୍ୟୋତି ମୋଟର୍ସ ଓ ରାମେଶ୍ବର ସ୍ପୋର୍ଟିଂ ବିଜୟୀ ହୋଇଛନ୍ତି। ପ୍ରଥମ ମ୍ୟାଚ୍ରେ ଜ୍ୟୋତି ମୋଟର୍ସ ୬ ୱିକେଟ୍ରେ ଏମ୍ସିସିକୁ ପରାସ୍ତ କରିଛି। ଏମ୍ସିସି ରୋନକ ବାଣୁଆଙ୍କ ୩୯ ଓ ରବି ରାଜଙ୍କ ୨୩ ରନ୍ ସହାୟତାରେ ୭ ୱିକେଟ୍ ବିନିମୟରେ ୧୩୧ ରନ୍ କରିଥିଲା। ଅବଦୁଲ ଖାନ୍ ଓ ରଶିରଂଜନ ସାହୁ ୨ ୱିକେଟ୍ ଲେଖାଏଁ ନେଇଥିଲେ। ଜବାବରେ ଇଲୁ ଗୋଚ୍ଛାୟତ (୬୧) ଓ ଗୌରବ ରାଉତ (୫୧)ଙ୍କ ଅର୍ଦ୍ଧଶତକୀୟ ପାଳି ବଳରେ ଜ୍ୟୋତି ମୋଟର୍ସ ୧୭ ଓଭରରେ ମ୍ୟାଚ୍ ଜିତିଥିଲା।
Sambad is now on WhatsApp
Join and get latest news updates delivered to you via WhatsApp
ଦ୍ବିତୀୟ ମ୍ୟାଚ୍ରେ ରାମେଶ୍ବର ସ୍ପୋର୍ଟିଂ ୨ ୱିକେଟ୍ରେ ପାରାମାଉଣ୍ଟକୁ ହରାଇଛି। ପାରାମାଉଣ୍ଟ ୭ ୱିକେଟ୍ ବିନିମୟରେ ୧୧୫ ରନ୍ କରିଥିଲା। ସୁଦର୍ଶନ ସ୍ବାଇଁ ସର୍ବାଧିକ ୩୪ ରନ୍ କରିଥିଲା ବେଳେ ବିଶ୍ବଜିତ ମଲ୍ଲିକ ୩ ଓ ଓମ୍ ମୁଣ୍ଡେ ୨ ୱିକେଟ୍ ନେଇଥିଲେ। ରାମେଶ୍ବର ସ୍ପୋର୍ଟିଂ ସମ୍ବିତ ବରାଳଙ୍କ ୪୨ ରନ୍ ସହାୟତାରେ ଶେଷ ବଲ୍ରେ ମ୍ୟାଚ୍ ଜିତିଥିଲା। ପ୍ରଥମ ମ୍ୟାଚ୍ରେ ଇଲୁ ଗୋଚ୍ଛାୟତଙ୍କୁ ପୂର୍ବତନ କ୍ରିକେଟର ଜିତୁ ମହାପାତ୍ର ଓ ଦ୍ବିତୀୟ ମ୍ୟାଚ୍ରେ ବିଶ୍ବଜିତ ମଲ୍ଲିକଙ୍କୁ ପ୍ରଭଞ୍ଜନ ମଲ୍ଲିକ ଶ୍ରେଷ୍ଠ ଖେଳାଳି ଭାବେ ପୁରସ୍କୃତ କରିଥିଲେ।