ଭୁବନେଶ୍ୱର: ମାଷ୍ଟରକ୍ୟାଣ୍ଟିନ ମୁଖ୍ୟ ରେଳ ଷ୍ଟେସନ ନବୀକରଣ କାର୍ଯ୍ୟର ସମୀକ୍ଷା କରିଛନ୍ତି ସାଂସଦ ଅପରାଜିତା ଷଡ଼ଙ୍ଗୀ। ପୂର୍ବତଟ ରେଳବାଇ ମହାପ୍ରବନ୍ଧକଙ୍କ ସହ ଆଲୋଚନା କରି ନିର୍ଦ୍ଧାରିତ ସମୟ ସୁଦ୍ଧା ନବୀକରଣ କାର୍ଯ୍ୟ ସାରିବାକୁ ନିର୍ଦ୍ଦେଶ ଦେଇଛନ୍ତି। ନିର୍ମାଣ କାର୍ଯ୍ୟରେ କୌଣସି ଅସୁବିଧା ଥିଲେ ସମାଧାନ ପାଇଁ ସମସ୍ତ ପ୍ରକାରର ସହଯୋଗ କରିବେ ବୋଲି ସେ ପ୍ରତିଶ୍ରୁତି ଦେଇଛନ୍ତି। ସାଧାରଣ ପ୍ରଶାସନ ବିଭାଗ ୧୨ ଏକର ଜମି ପ୍ରଦାନ କରିଛି। ଆବଶ୍ୟକ ଥିବା ଆଉ ୧.୨୩ଏକର ଜମି ପାଇଁ ବିଡିଏକୁ ରେଳବାଇ ପକ୍ଷରୁ ନିବେଦନ କରାଯାଇଛି। ଏହି ଜମି ମଧ୍ୟ ମିଳିଯିବ ବୋଲି ପ୍ରତିଶ୍ରୁତି ଦେଇଛନ୍ତି ସାଂସଦ ଶ୍ରୀମତୀ ଷଡ଼ଙ୍ଗୀ। ଷ୍ଟେସନକୁ ସଂଯୋଗ କରିବା ପାଇଁ ଦୁଇଟି ରାସ୍ତାର ଅନୁମତି ଆବଶ୍ୟକତା ରହିଛି। ବିଡିଏ ଓ ଅନ୍ୟ ବିଭାଗ ସହ ଆଲୋଚନା କରି ଏହାର ସମାଧାନ କରିବାକୁ ଉଦ୍ୟମ ହେବ ବୋଲି ସେ କହିଛନ୍ତି।
୨୦୨୩ ମସିହାରୁ ଆରମ୍ଭ ହୋଇଥିବା ଏହି ନବୀକରଣ କାର୍ଯ୍ୟ ପାଇଁ ୪୧୮ କୋଟି ଟଙ୍କାର ବ୍ୟୟ ଅଟକଳ କରାଯାଇଛି। ବର୍ତ୍ତମାନ ସୁଦ୍ଧା ୨୦୦କୋଟିରୁ ଅଧିକ ଖର୍ଚ୍ଚ ସରିଲାଣି। ଆସନ୍ତା ଅଗଷ୍ଟ ସୁଦ୍ଧା ନୂଆ ଷ୍ଟେସନ ଲୋକାର୍ପଣ କରିବାକୁ ଲକ୍ଷ୍ୟ ରଖାଯାଇଛି। ଏହି ଷ୍ଟେସନ ବର୍ତ୍ତମାନ ଦୈନିକ ୭୦ରୁ ୮୦ ହଜାର ଲୋକଙ୍କୁ ସେବା ଯୋଗାଉଛି। ଏହି ନବୀକରଣ ପରେ କ୍ଷମତା ୧.୪୪ଲକ୍ଷକୁ ବୃଦ୍ଧି ପାଇବ। ଫୁଡ୍ କୋର୍ଟ, ସପିଂ ମଲ୍, ପ୍ରଭୃତି ଅତ୍ୟାଧୁନିକ ସେବା ଉପଲବ୍ଧ ହେବ। ଧାର୍ଯ୍ୟ ସମୟରେ ସାରିବା ପାଇଁ ଆଗକୁ ମଧ୍ୟ ଏଭଳି ସମୀକ୍ଷା ହେବ ବୋଲି ଭୁବନେଶ୍ୱର ସାଂସଦ ଶ୍ରୀମତୀ ଷଡ଼ଙ୍ଗୀ କହିଛନ୍ତି।