ଭୁବନେଶ୍ବର: ଭୁବନେଶ୍ବର ବିମାନବନ୍ଦର ସମେତ ରାଜ୍ୟର ବିଭିନ୍ନ ବିମାନବନ୍ଦରରୁ ଏବେ ଦେଶର ଅନେକ ସ୍ଥାନକୁ ବିମାନ ଉଡ଼ାଣ କରୁଥିବାବେଳେ ଭୁବନେଶ୍ବରରୁ ୩ଟି ଦେଶକୁ ବିମାନ ଉଡ଼ାଣ କରୁଛି। ଆଗାମୀ ଦିନରେ ଯେପରି ଅଧିକରୁ ଅଧିକ ବିମାନ ସେବା ପ୍ରଦାନକାରୀ କମ୍ପାନି ଓଡ଼ିଶାରୁ ବିମାନ ଉଡ଼ାଣ ଆରମ୍ଭ କରିବାକୁ ଆଗ୍ରହୀ ହେବେ ସେଥିପାଇଁ ରାଜ୍ୟ ସରକାର ଭୁବନେଶ୍ବର ଅନ୍ତର୍ଜାତୀୟ ବିମାନବନ୍ଦରରେ ରାଜ୍ୟର ପ୍ରଥମ ବିମାନ ରକ୍ଷଣାବେକ୍ଷଣ, ମରାମତି ଓ ପୁନଃସ୍ଥାପନ (ଏମ୍ଆର୍ଓ) ପ୍ରତିଷ୍ଠା ପାଇଁ ସମସ୍ତ ପ୍ରସ୍ତୁତି ଶେଷ କରିଛନ୍ତି। ଏହାଦ୍ବାରା ବିମାନ ଚଳାଚଳ ପାଇଁ ଏକ ଆର୍ଥିକ ଇକୋସିଷ୍ଟମ ସୃଷ୍ଟି କରିବ।
ପରିବହନ ବିଭାଗ ପକ୍ଷରୁ କୁହାଯାଇଛି ଯେ ‘ନୂତନ ଗନ୍ତବ୍ୟ ନୀତି’ ଦ୍ବାରା ୧୩ଟି ଘରୋଇ ଓ ଅନ୍ତର୍ଜାତୀୟ ରୁଟ୍ରେ ବିମାନ ଚଳାଚଳ କରୁଛି। ଏହାଦ୍ବାରା ବାଣିଜ୍ୟ, ପର୍ଯ୍ୟଟନ ଏବଂ ଆଞ୍ଚଳିକ ଏକୀକରଣ ପାଇଁ ନୂଆ କରିଡର ଖୋଲିଛି। ଆଗକୁ ଓଡ଼ିଶାରୁ ବିମାନ ଉଡ଼ାଣ ସଂଖ୍ୟା ଆହୁରି ବଢ଼ିବ। ସେହିପରି ପ୍ରସ୍ତାବିତ ପୁରୀ ବିମାନ ବନ୍ଦର ପ୍ରକଳ୍ପ ନୋକାସ୍ ୨.୦ ଇଣ୍ଟରାକ୍ଟିଭ୍ କଲର କୋଡେଡ୍ ଜୋନିଂ ମ୍ୟାପ୍ (ସିସିଜେଡ୍ଏମ୍)ର ଶୁଭାରମ୍ଭ ସହିତ ଏକ ପ୍ରମୁଖ ମାଇଲଖୁଣ୍ଟ ହାସଲ କରିଛି। ଏହି ପରିବର୍ତ୍ତନଶୀଳ ଡିଜିଟାଲ ଉପକରଣ ଅନଲାଇନ୍ ଉଚ୍ଚତା କ୍ଲିଅରାନ୍ସ ପ୍ରକ୍ରିୟାକରଣକୁ ସକ୍ଷମ କରିଥାଏ। ଯାହା ସୁନିଶ୍ଚିତ କରେ ଯେ ବିମାନ ଚଳାଚଳ ଯୋଜନା ନିରାପଦ ସହରାଞ୍ଚଳ ବିକାଶ, ନିୟନ୍ତ୍ରିତ ଭିତ୍ତିଭୂମି ଅଭିବୃଦ୍ଧି ଏବଂ ପରିବେଶ ସୁରକ୍ଷା ସହିତ ସମନ୍ୱିତ। ସେହିପରି ରାଜ୍ୟ ସରକାର ଖୁବ୍ ଶୀଘ୍ର ଏକ ଡ୍ରୋନ୍ ନୀତି ପ୍ରଣୟନ କରିବାକୁ ଯାଉଥିବାବେଳେ ବିମାନବନ୍ଦର ଭିତ୍ତିଭୂମି ପାଇଁ ଜମି ଆବଣ୍ଟନ ପ୍ରକ୍ରିୟାକୁ ତ୍ବରାନ୍ବିତ କରିବାକୁ ଯୋଜନା କରୁଛନ୍ତି।
Advertisment

Sambad is now on WhatsApp
Join and get latest news updates delivered to you via WhatsApp