ଭୁବନେଶ୍ବର: ପଶ୍ଚିମବଙ୍ଗରୁ ଭାୟା ଜଳେଶ୍ବର ଦେଇ ରାଜଧାନୀ ଓ ଆଖପାଖ ଅଞ୍ଚଳରେ ବ୍ରାଉନ୍‌ସୁଗାର୍‌ ଯୋଗାଉଥିବା ଜଣେ କୁଖ୍ୟାତ ନିଶାମାଫିଆଙ୍କୁ କମିସନରେଟ୍‌ ପୁଲିସ ସ୍ପେସାଲ୍‌ କ୍ରାଇମ୍‌ ୟୁନିଟ୍‌(ଏସ୍‌ସିୟୁ) ଗିରଫ କରିଛି। ସେ ହେଲା ଜଙ୍କିଆ ଥାନା ଡମଣଭୂମି ଅଞ୍ଚଳର ରଶ୍ମିରଂଜନ ଭୋଳ ଓରଫ ରଶ୍ମି(୩୪)। ପୁଲିସ ତା ନିକଟରୁ ୨୬୫ ଗ୍ରାମ ବ୍ରାଉନ୍‌ସୁଗାର୍‌, ୩୧ ହଜାର ଟଙ୍କା, ମୋବାଇଲ୍‌ ଓ ବାଇକ୍ ଜବତ କରିଛି। ଜବତ ବ୍ରାଉନ୍‌ସୁଗାର୍‌ର ବଜାର ମୂଲ୍ୟ ୨୫ଲକ୍ଷ ଟଙ୍କାରୁ ଅଧିକ ହେବ ବୋଲି ଜଣାପଡ଼ିଛି। 
ପୁଲିସ ସେବାଭବନରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ପୁଲିସ କମିସନର ସୁରେଶ ଦେବଦତ୍ତ ସିଂ ଓ ଅତିରିକ୍ତ ପୁଲିସ କମିସନର ନରସିଂହ ଭୋଳ ସୂଚନା ଦେଇ କହିଛନ୍ତି ଯେ ବହୁଦିନ ହେବ ରଶ୍ମି ସେକ୍‌ ଜାଭେଦ୍‌ ନାମକ ଜଣେ ନିଶାମାଫିଆ ମାଧ୍ୟମରେ ପଶ୍ଚିମବଙ୍ଗରୁ ବ୍ରାଉନ୍‌ସୁଗାର୍‌ ଆଣି ରାଜଧାନୀ, କଟକ, ପୁରୀ, ଖୋର୍ଦ୍ଧାରେ ଥିବା ଖୁଚୁରା ବ୍ୟବସାୟୀଙ୍କ ସହ କିଛି ଏଜେଣ୍ଟ ଓ ଗ୍ରାହକଙ୍କୁ ଯୋଗାଉଥିଲା। ହେଲେ ଜାଭେଦ୍‌ ଗିରଫ ହେବା ପରେ ପଶ୍ଚିମବଙ୍ଗର ନିଶାମାଫିଆଙ୍କ ସହ ସିଧାସଳଖ ଯୋଗାଯୋଗ କରି ବ୍ୟବସାୟ ଆରମ୍ଭ କରିଥିଲା। ବିଭିନ୍ନ ସମୟରେ ପୁଲିସ କବ୍‌ଜାରୁ ଖସିଯାଇଥିଲା। ତେବେ ରବିବାର ଦିନ ରାଜଧାନୀର ଜଣେ ବ୍ୟବସାୟୀଙ୍କୁ ବ୍ରାଉନ୍‌ସୁଗାର୍‌ ଯୋଗାଇବା ପାଇଁ ଡିଲ୍‌ ସରିଥିଲା। ଯାହାର ଖବର ଏସ୍‌ସିୟୁ ହାତରେ ଲାଗିଥିଲା। ଯୋଜନା ମୁତାବକ ଏସ୍‌ସିୟୁର ଏକ ଟିମ୍‌ ରଶ୍ମିର ଗତିବିଧି ଉପରେ ନଜର ରଖିଥିଲା। ସେ ରାଜଧାନୀ ମୁହାଁ ବେଳେ ଜଟଣୀ ଗେଟ୍‌ ନିକଟରେ ଏସ୍‌ସିୟୁ ଟିମ୍‌ ତାକୁ କାବୁ କରିଥିଲା। ଯାଞ୍ଚ ବେଳେ ତା ନିକଟରୁ ବ୍ରାଉନ୍‌ସୁଗାର୍‌ ଓ ଟଙ୍କା ଜବତ କରାଯାଇଥିଲା। ଥାନାକୁ ଆଣି ଜେରା ବେଳେ ସେ ସବୁ ସତ ମାନିଥିଲା। ଜେରା ପରେ ଆଜି ତାକୁ କୋର୍ଟ ଚାଲାଣ କରାଯାଇଛି।
ଅନ୍ୟପଟେ ତଦନ୍ତ ବେଳେ ଜଣାପଡ଼ିଛି ଯେ ରଶ୍ମି ନିଶାକାରବାର କରି ଲକ୍ଷ ଲକ୍ଷ ଟଙ୍କା ରୋଜଗାର କରୁଥିଲା। ତାର କେତେକ ଆକାଉଣ୍ଟ ଯାଞ୍ଚ ବେଳେ ସେ କିଛି ମାଫିଆଙ୍କ ସହ  ବିପୁଳ ପରିମାଣର ଟଙ୍କା ଦେଣନେଣ ହୋଇଥିବା ଜଣାପଡ଼ିଛି। ତେବେ ସେ ଯେଉଁମାନଙ୍କୁ ପଠାଉଥିଲା ସେମାନଙ୍କୁ ଚିହ୍ନଟ ପାଇଁ ପୁଲିସ ପ୍ରୟାସ ଆରମ୍ଭ କରିଛି। ଖାଲି ସେତିକି ନୁହେଁ ସେ କେବଳ ନିଶାକାରବାର ପାଇଁ ଟଙ୍କା ପଠାଉନଥିଲା। ବନ୍ଧୁକ କାରବାରରେ ସାମିଲ୍‌ ଥିବା ନେଇ ମଧ୍ୟ ପୁଲିସକୁ ସୂଚନା ମିଳିଛି। ଏହାଛଡ଼ା ଖୋର୍ଦ୍ଧା ଅଞ୍ଚଳରେ ଥିବା ତାର ଜଣେ ଘନିଷ୍ଠ ସହଯୋଗୀକୁ ମଧ୍ୟ ପୁଲିସ ଚିହ୍ନଟ କରିଛି। ତେଣୁ ରୢାକେଟ୍‌ର ରଶ୍ମିକୁ ରିମାଣ୍ଡରେ ଆଣି ଜେରା କରାଯିବ ବୋଲି ଜଣେ ଅଧିକାରୀ କହିଛନ୍ତି।