ତେହରାନ: ମୋର ନିଶ ନ ଥିଲେ କ’ଣ ହେଲା, ମୋ ମାଧିଆ ଭାଇର ନିଶ ଅଛି- ଏହିପରି ଏକ ବୟାନ ଦେଇଛି ଇରାନ। ଇରାନର ଜଣେ ବରିଷ୍ଠ ଅଧିକାରୀ ଦାବି କରିଛନ୍ତି ଯେ ଯଦି ଇସ୍ରାଏଲ ଇରାନ ବିରୋଧରେ ପରମାଣୁ ଅସ୍ତ୍ର ବ୍ୟବହାର କରେ ତେବେ ପାକିସ୍ତାନ ଇସ୍ରାଏଲ ଉପରେ ପରମାଣୁ ଆକ୍ରମଣ କରିବ। ଆଇଆରଜିସି କମାଣ୍ଡର ତଥା ଇରାନର ଜାତୀୟ ନିରାପତ୍ତା ପରିଷଦର ସଦସ୍ୟ ଜେନେରାଲ ମୋହସେନ ରେଜାଇ ଇରାନର ସରକାରୀ ଟେଲିଭିଜନରେ ଏପରି ବୟାନ ଦେଇଛନ୍ତି। ତେବେ ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖୱାଜା ମହମ୍ମଦ ଆସିଫ୍ ଏହି ଦାବିକୁ ଖଣ୍ଡନ କରି କହିଛନ୍ତି ଯେ ଇସଲାମାବାଦ ଏଭଳି କୌଣସି ପ୍ରତିଶ୍ରୁତି ଦେଇନାହିଁ।
ଏକ୍ସରେ ଏକ ପୋଷ୍ଟରେ ଆସିଫ୍ ସତର୍କ କରାଇ ଦେଇ କହିଛନ୍ତି, ଇସ୍ରାଏଲ ପରମାଣୁ ଅସ୍ତ୍ରଶସ୍ତ୍ର ପ୍ରୟୋଗ କରିବାକୁ ଘୋଷଣା କରି ନ ଥିବା ବେଳେ ଇରାନର ଏପରି ବୟାନ ଏହାକୁ ଅଧିକ ଆକ୍ରମଣାତ୍ମକ କାର୍ଯ୍ୟ କରିବାକୁ ଉତ୍ସାହିତ କରିପାରେ - ଯାହା ଏକ ବ୍ୟାପକ ଆଞ୍ଚଳିକ ସଂଘର୍ଷର ଆଶଙ୍କା ବଢାଇପାରେ। ଆଣବିକ ପ୍ରତିଶୋଧ ନେଇ ଇସଲାମାବାଦ ତେହେରାନର କଥାକୁ ପ୍ରତ୍ୟାଖ୍ୟାନ କରିଥିବା ବେଳେ ଇସ୍ରାଏଲ ସହ ବ୍ୟାପକ ସଂଘର୍ଷରେ ଇରାନକୁ ଖୋଲା ସମର୍ଥନ ଜଣାଇଛି। ତେହେରାନ ଉପରେ ଆକ୍ରମଣ ପରେ ପାକିସ୍ତାନ ଇରାନ ପଛରେ ଛିଡ଼ା ହେବ ବୋଲି ପ୍ରତିଶ୍ରୁତି ଦେବା ସହ ଇସ୍ରାଏଲ ବିରୋଧରେ ମୁସଲମାନ ଏକତା ପାଇଁ ଆହ୍ୱାନ ଦେଇଥିଲା।
ଜୁନ୍ ୧୪ରେ ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖୱାଜା ଆସିଫ୍ ନ୍ୟାସନାଲ ଆସେମ୍ବ୍ଲିକୁ କହିଥିଲେ ଯେ ମୁସଲମାନ ରାଷ୍ଟ୍ରମାନେ ଇସ୍ରାଏଲ ବିରୋଧରେ ଏକଜୁଟ ହେବା ଉଚିତ। ନ ହେଲେ ଇରାନ ଓ ପାଲେଷ୍ଟାଇନ ଭଳି ସମାନ ଦଶା ଭୋଗିବାକୁ ପଡ଼ିପାରେ। ଇସ୍ରାଏଲ ଇରାନ, ୟେମେନ ଓ ପାଲେଷ୍ଟାଇନକୁ ଟାର୍ଗେଟ କରିଛି। ଯଦି ଏବେ ମୁସଲମାନ ରାଷ୍ଟ୍ରମାନେ ଏକାଠି ନ ହୁଅନ୍ତି, ତେବେ ସମସ୍ତଙ୍କ ଭାଗ୍ୟ ସମାନ ହେବ ବୋଲି ଆସିଫ୍ କହିଛନ୍ତି। ଇସ୍ରାଏଲ ସହ କୂଟନୈତିକ ସମ୍ପର୍କ ରଖିଥିବା ମୁସଲମାନ ରାଷ୍ଟ୍ରମାନଙ୍କୁ ସମ୍ପର୍କ ଛିନ୍ନ କରିବାକୁ ଅନୁରୋଧ କରିବା ସହ ଅର୍ଗାନାଇଜେସନ୍ ଅଫ୍ ଇସଲାମିକ୍ କୋଅପରେସନ୍ (ଓଆଇସି)ର ଏକ ବୈଠକ ଡକାଇ ଇହୁଦୀ ରାଷ୍ଟ୍ର ବିରୋଧରେ ମିଳିତ ରଣନୀତି ପ୍ରସ୍ତୁତ କରିବାକୁ ସେ ଆହ୍ୱାନ ଦେଇଛନ୍ତି। ତେବେ ଇସ୍ରାଏଲ ପରମାଣୁ ଅସ୍ପଷ୍ଟତା ନୀତି ଅନୁସରଣ କରୁଛି, ପରମାଣୁ ଅସ୍ତ୍ର ଅଛି କି ନାହିଁ ତାହା ନିଶ୍ଚିତ କିମ୍ବା ଅସ୍ୱୀକାର କରିବାକୁ ମନା କରିଛି। ସରକାରୀ ନିରବତା ସତ୍ତ୍ୱେ ଇହୁଦୀ ରାଷ୍ଟ୍ର ପରମାଣୁ ଅସ୍ତ୍ରଶସ୍ତ୍ର ବିକଶିତ କରିଛି ଏବଂ ଶତ୍ରୁପକ୍ଷଙ୍କୁ ସମାନ କ୍ଷମତା ହାସଲ କରିବାରୁ ରୋକିବାକୁ ଚାହୁଛି ବୋଲି ବିଶ୍ବାସ କରାଯାଉଛି।
Advertisment

Sambad is now on WhatsApp
Join and get latest news updates delivered to you via WhatsApp