ଭୁବନେଶ୍ୱର: ଓଡ଼ିଶାର ସମୃଦ୍ଧ ପାରମ୍ପରିକ ବ୍ୟଞ୍ଜନ ଓ ଖାଦ୍ୟ ପ୍ରସ୍ତୁତି ଶୈଳୀକୁ ଜାତୀୟସ୍ତରରେ ଲୋକପ୍ରିୟ କରିବାକୁ ରାଜ୍ୟ ପର୍ଯ୍ୟଟନ ବିଭାଗ ପକ୍ଷରୁ ଏକ ଅଭିନବ ପ୍ରୟାସ କରାଯାଇଛି। ସୋନି ଟିଭି ଚ୍ୟାନେଲ୍‌ରେ ପ୍ରସାରିତ ‘ସେଲେବ୍ରିଟି ମାଷ୍ଟରସେଫ୍‌’ର ବିଶେଷ କାର୍ଯ୍ୟକ୍ରମରେ ପ୍ରତିଯୋଗୀମାନେ ଏଥର ସ୍ୱତନ୍ତ୍ର ଓଡ଼ିଶା ଖାଦ୍ୟ ପ୍ରସ୍ତୁତ ଓ ପରିବେଷଣ କରିବେ। ପ୍ରଥମ ଥର ପାଇଁ ଓଡ଼ିଆଙ୍କ ପ୍ରିୟ ପଖାଳ ଥାଳି ଏବଂ ମନ୍ଦିର ଖାଦ୍ୟକୁ ପରିବେଷଣ କରି ଏହି କାର୍ଯ୍ୟକ୍ରମ ମାଧ୍ୟମରେ ଓଡ଼ିଆ ଖାଦ୍ୟ ପରମ୍ପରାକୁ ଜାତୀୟ ଓ ଅନ୍ତର୍ଜାତୀୟସ୍ତରର ଦର୍ଶକଙ୍କ ନିକଟରେ ଉପସ୍ଥାପନ କରାଯିବ।

Advertisment

ଏହି ପରିପ୍ରେକ୍ଷୀରେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ସୋନି ଟିଭିରେ ପ୍ରସାରିତ ସେଲେବ୍ରିଟି ମାଷ୍ଟରସେଫ୍‌ ଇଣ୍ଡିଆର ଓଡ଼ିଶା ଖାଦ୍ୟ ଚ୍ୟାଲେଞ୍ଜ ସହିତ ଫାଇନାଲରେ ପହଞ୍ଚିଥିବା ସମସ୍ତ ପ୍ରତିଭାବାନ ସେଲେବ୍ରିଟି ସେଫ୍‌କୁ ଅଭିନନ୍ଦନ ଜଣାଇଛନ୍ତି। ଓଡ଼ିଆ ଖାଦ୍ୟଶୈଳୀକୁ ବିଶ୍ୱସ୍ତରରେ ଏକ ଅନନ୍ୟ ପରିଚୟ ପ୍ରଦାନ କରିବା ସହ ଗର୍ବର ସହ ଓଡ଼ିଆ ଖାଦ୍ୟର ସ୍ୱାଦକୁ ନିଜ ସମ୍ପ୍ରଦାୟରେ ବାଣ୍ଟିବା ପାଇଁ ଉପମୁଖ୍ୟମନ୍ତ୍ରୀ ଶ୍ରୀମତୀ ପରିଡ଼ା ଭାରତ ତଥା ବିଶ୍ୱର ଥିବା ସମସ୍ତ ପ୍ରବାସୀ ଓଡ଼ିଆମାନଙ୍କୁ ଅନୁରୋଧ କରିଛନ୍ତି।

ଏହି କାର୍ଯ୍ୟକ୍ରମରେ ସେଫ୍‌ମାନେ ଓଡ଼ିଶାର ଦୁଇଟି ପ୍ରମୁଖ ଖାଦ୍ୟ ପରମ୍ପରା ‘ଓଡ଼ିଆ ଖାଦ୍ୟ ଥାଳି’ ଏବଂ ‘ଓଡ଼ିଶା ପ୍ରସାଦ ଖାଦ୍ୟ ସଂସ୍କୃତି’ ପ୍ରଦର୍ଶନ କରିବେ। ପ୍ରଥମ ଚ୍ୟାଲେଞ୍ଜରେ ବିଭିନ୍ନ ପ୍ରକାର ପଖାଳ ଯଥା, ଦହି ପଖାଳ, ଛୁଙ୍କ ପଖାଳ, ଘିଅ ପଖାଳ ସହିତ ଚିଙ୍ଗୁଡି ଛେଚା, କଖାରୁ ଫୁଲ ଭଜା, ବଡ଼ି ଚୂରା ଓ ମାଛ ଭଜା ଆଦି ପ୍ରସ୍ତୁତ କରିବେ। ଦ୍ବିତୀୟ ଚ୍ୟାଲେଞ୍ଜରେ ଓଡ଼ିଆ ପ୍ରସାଦ ସଂସ୍କୃତି ତଥା ମହାପ୍ରଭୁ ଶ୍ରୀଜଗନ୍ନାଥ ମନ୍ଦିରର ମହାପ୍ରସାଦ ଦ୍ୱାରା ଅନୁପ୍ରାଣିତ ହୋଇ ସେଫ୍‌ମାନେ ମନ୍ଦିର ଖାଦ୍ୟର ସାତ୍ତ୍ୱିକ ନୀତିକୁ ପାଳନ କରି କାନିକା, ଡାଲମା, ଆମ୍ବୁଲ ଖଟା, ମହୁର ଏବଂ କ୍ଷୀର ଗଇଣ୍ଠା ଭଳି ପାରମ୍ପରିକ ଖାଦ୍ୟ ପରିବେଷଣ କରିବେ। ସାରା ଦେଶର ଖାଦ୍ୟ ପ୍ରେମୀମାନେ ୨୬ରୁ ୨୮ ମାର୍ଚ୍ଚ ପର୍ଯ୍ୟନ୍ତ ସେଲେବ୍ରିଟି ମାଷ୍ଟରସେଫ୍‌ରେ ଯୋଗ ଦେଇ ଓଡ଼ିଶାର ପାରମ୍ପରିକ ଖାଦ୍ୟର ମଜା ନେବା ପାଇଁ ପର୍ଯ୍ୟଟନ ବିଭାଗ ତରଫରୁ ଅନୁରୋଧ କରାଯାଉଛି।