ଭୁବନେଶ୍ବର: ପ୍ରଯୁକ୍ତି କ୍ଷେତ୍ରର ବହୁ ବଡ଼ ବଡ଼ କମ୍ପାନି ରାଜ୍ୟରେ ସେମାନଙ୍କ ୟୁନିଟ୍ ସ୍ଥାପନ କରିବାକୁ ଆଗ୍ରହ ପ୍ରକାଶ କରିଛନ୍ତି। ସେମାନଙ୍କୁ ଏକ ଉପଯୁକ୍ତ ସ୍ଥାନ ଯୋଗାଇବା ଲାଗି ଡମଣା ଛକ ନିକଟରେ ଏକ ଟେକ୍ ପାର୍କ ସ୍ଥାପନ କରିବା ଉପରେ ରାଜ୍ୟ ସରକାର ବିଚାର କରୁଛନ୍ତି। ସେଥିପାଇଁ ୨୫ ଏକର ଜମି ଦେବାକୁ ଇଲେକ୍ଟ୍ରୋନିକ୍ସ ଓ ଆଇଟି ବିଭାଗ ପକ୍ଷରୁ ସାଧାରଣ ପ୍ରଶାସନ ବିଭାଗକୁ ଚିଠି‌ ଲେଖାଯାଇଛି। ଆଇଟି ବିଭାଗ ଜଣାଇଛି ଯେ ଭୁବନେଶ୍ବର ଆଇଟି, ଇଲେକ୍ଟ୍ରୋନିକ୍ସ ଓ ସେମିକଣ୍ଡକ୍ଟର ହବ୍ ଭାବେ ଉଭା ହେଉଥିବା ବେଳେ ଗୁଣାତ୍ମକ ସ୍ଥାନ ଯୋଗାଇ ଦିଆଗଲେ ତାହା ରାଜ୍ୟର ଆଇଟି ଅଭିବୃଦ୍ଧିକୁ ବଢ଼ାଇବ। ଏକ ଉତ୍ସର୍ଗୀକୃତ ବ୍ୟବସ୍ଥା ବିକାଶ କରାଗଲେ ତାହା ସ୍ଥାନାଭାବ ସମସ୍ୟାକୁ ଦୂର କରିପାରିବ। ଜମି ସମସ୍ୟାର ସମାଧାନ କରିବା ଲାଗି ପଟିଆ ପାଖରେ ଥିବା ୨୫ ଏକର ଜାଗା ଦେବାକୁ ଆଇଟି ବିଭାଗ ଅନୁରୋଧ କରିଛି। ସେହି ଜମି ପୂର୍ବରୁ ଭୁବନେଶ୍ବର ଉନ୍ନୟନ କର୍ତ୍ତୃପକ୍ଷ (ବିଡିଏ)କୁ ଆବଣ୍ଟନ କରାଯାଇଥିଲା। କିନ୍ତୁ ଏପର୍ଯ୍ୟନ୍ତ ସେଠାରେ କୌଣସି କାମ ହୋଇନାହିଁ।

Advertisment

ଇନ୍‌ଫୋଭାଲି ଅଞ୍ଚଳରେ ଥିବା ଖାଲି ଜାଗାକୁ ଅଣ ସୂଚନା ପ୍ରଯୁକ୍ତି କ୍ଷେତ୍ରର କମ୍ପାନିଗୁଡ଼ିକୁ ଆବଣ୍ଟନ କରାଯିବାକୁ ନେଇ ଆଇଟି ବିଭାଗ ଅସନ୍ତୋଷ ଜାହିର କରିଥିଲା। ଯେଉଁମାନେ ଜମି ନେଇ ଦୀର୍ଘଦିନ ଧରି କିଛି କାମ କରୁନାହାନ୍ତି, ସେମାନଙ୍କ ଆବଣ୍ଟନ ବାତିଲ କରିବା ଏବଂ ଖାଲି ଜାଗାକୁ କେବଳ ଆଇଟି ଓ ତତ୍‌ ସଂକ୍ରାନ୍ତୀୟ କମ୍ପାନିଗୁଡ଼ିକୁ ଆବଣ୍ଟନ କରିବାକୁ ବିଭାଗ ଦାବି କରିଥିଲା। ଇତି ମଧ୍ୟରେ ରାଜ୍ୟ ସରକାର ଦେଶ ବିଦୋର ବହୁ ଆଇଟି, ଇଲେକ୍ଟ୍ରୋନିକ୍ସ, ସେମିକଣ୍ଡକ୍ଟର, ଇଲେକ୍ଟ୍ରୋନିକ୍ସ ସିଷ୍ଟମ୍ ଡିଜାଇନ୍‌ ଓ ମାନୁଫାକ୍‌ଚରିଂ (ଇଏସ୍‌ଡିଏମ୍‌) ନିବେଶ ହାସଲ କରିଛି। ସେମାନଙ୍କ ପାଇଁ ଗୁଣାତ୍ମକ ଆଇଟି ପାର୍କ ବିକାଶ ଏବେ ବଡ଼ ଆହ୍ବାନ ଭାବେ ଉଭା ହୋଇଛି।

ସରକାର ଜାଗା ଦେଇପାରୁ ନଥିବାରୁ ଡେ‌ଲଏଟ୍‌, କଗ୍ନିଜାଣ୍ଟ ଓ କନସେଣ୍ଟ୍ରିକ୍ସ ଭଳି ସଂସ୍ଥା ଭଡ଼ାରେ ନିଜର ୟୁନିଟ୍ ସ୍ଥାପନ କରିଛନ୍ତି। ନିକଟରେ ଶେଷ ହୋଇଥିବା ଉତ୍କର୍ଷ ଓଡ଼ିଶା: ମେକ୍ ଇନ୍ ଓଡ଼ିଶା କନ୍‌କ୍ଲେଭ୍‌ ୨୦୨୫ରେ ରାଜ୍ୟ ସରକାର ଆଇଟି, ଇଲେକ୍ଟ୍ରୋନିକ୍ସ ଓ ସେମିକଣ୍ଡକ୍ଟର ଶିଳ୍ପ ପାଇଁ ୨୦,୯୦୦ କୋଟି ଟଙ୍କାର ନିବେଶ ପ୍ରସ୍ତାବ ହାସଲ କରିଛନ୍ତି। କିନ୍ତୁ ପୁଞ୍ଜିନିବେଶ ଘୋଷଣା କରିଥିବା କିନ୍ତୁ ବାସ୍ତବତା ହେଉଛି ସିକ୍‌ସେମ୍, ଆର୍‌ଆଇଆର୍‌ ପାୱାର ଓ ହେଟେରୋଜିନିଅସ୍ ଭଳି କମ୍ପାନି ଏବେବି ଜମି ଆବଣ୍ଟନ ଅପେକ୍ଷାରେ ରହିଛନ୍ତି। ଜୋରୋ, ଏମ୍‌ଭି ଫଟୋଭୋଲ୍‌ଟାଇକ୍ ପାୱାର, କାଏନିସ୍ ଭଳି କମ୍ପାନି ରାଜ୍ୟରେ ନିବେଶ କରିବକୁ ଚାହୁଛନ୍ତି।