ଖୋଲିଲା ଓୟୁଏଟି ଚିକେନ୍ ଫ୍ରେସ୍
ଭୁବନେଶ୍ବର : ଗତ ୧ମାସ ଧରି ବନ୍ଦ ରହିଥିବା ଓୟୁଏଟି ନିକଟସ୍ଥ ଚିକେନ୍ ଫ୍ରେସ୍ ଆଜିଠାରୁ ଖୋଲିଛି। ରାଜଧାନୀରେ ଏବେ ଆଉ ବାର୍ଡ-ଫ୍ଲୁ ଭୟ ନଥିବାରୁ ପ୍ରାଣୀ ସଂପଦ ବିଭାଗର ନିର୍ଦ୍ଦେଶକ୍ରମେ ଏହି ଆଉଟଲେଟ୍କୁ ଖୋଲା ଯାଇଛି। ଫଳରେ ରାଜଧାନୀର ସମସ୍ତ ଚିକେନ୍ ଫ୍ରେସ୍ ଆଉଟଲେଟ୍ ଏବେ ପୂର୍ବଭଳି କାର୍ଯ୍ୟ କରିଛି।
Sambad is now on WhatsApp
Join and get latest news updates delivered to you via WhatsApp
ଗତ ମାସ ୨୫ ତାରିଖରେ ଓୟୁଏଟିର କୁକୁଡ଼ା ଫାର୍ମରେ ବାର୍ଡ-ଫ୍ଲୁ ଦେଖାଦେବା ପରେ ଏହାର ୧କିମି ବ୍ୟାସାର୍ଧ ଅଧୀନରେ କୁକୁଡ଼ା ଓ ବତକମରା ଅଭିଯାନ ହୋଇଥିଲା। ଫଳରେ ଓୟୁଏଟି ନିକଟସ୍ଥ ଚିକେନ୍ ଫ୍ରେସ୍କୁ ପ୍ରତିଷେଧକ ବ୍ୟବସ୍ଥା ପାଇଁ ବନ୍ଦ ରଖାଯାଇଥିଲା। ଫଳରେ ସ୍ଥାନୀୟ ଲୋକମାନେ ଚିକେନ୍ ଫ୍ରେସ୍ର ଚିକେନ୍ ଓ ଅଣ୍ଡା କିଣିପାରୁ ନ ଥିଲେ। ଏହାସହ ରାଜଧାନୀରେ ଓପୋଲଫେଡ୍ର ଥିବା ୬୦ରୁ ଅଧିକ ବୁଥ୍କୁ ଓୟୁଏଟି ଚିକେନ୍ ଫ୍ରେସ୍କୁ ଚିକେନ୍ ଓ ଅଣ୍ଡା ଯୋଗାଣ ବନ୍ଦ ରହିଥିଲା।
ତେବେ ଦୁଇଦିନ ତଳେ ରାଜ୍ୟ ପ୍ରାଣୀ ସଂପଦ ବିଭାଗ ପକ୍ଷରୁ ରାଜଧାନୀରେ ଆଉ ବାର୍ଡ-ଫ୍ଲୁର କୌଣସି ଭୟ ନ ଥିବା କୁହାଯାଇଥିଲା। ଫଳରେ ଆଜିଠାରୁ ଏହା ପୁଣିଥରେ ଖୋଲିଛି। ଲୋକମାନେ ଏଠାରୁ ପୂର୍ବଭଳି ଚିକେନ୍ ଓ ଅଣ୍ଡା କିଣିପାରିବେ ବୋଲି ଓପୋଲଫେଡ୍ ପକ୍ଷରୁ ସୂଚନା ଦିଆଯାଇଛି।