ଭୁବନେଶ୍ୱର: ଗାଡ଼କଣ ଓ ସୈନିକ ସ୍କୁଲ ଅଞ୍ଚଳରେ ବର୍ଜ୍ୟବସ୍ତୁକୁ ନେଇ ବହୁଦିନରୁ ଲାଗି ରହିଥିବା ସମସ୍ୟା ସବୁଦିନ ପାଇଁ ଦୂର ହେବ। ଭୁବନେଶ୍ବର ମହାନଗର ନିଗମ(ବିଏମ୍‌ସି)ରୁ ନିର୍ଗତ ସିଂହଭାଗ ବର୍ଜ୍ୟବସ୍ତୁର ଦୀର୍ଘସ୍ଥାୟୀ ପରିଚାଳନା ତଥା ପ୍ରକ୍ରିୟାକରଣ ହେବ। ଆବର୍ଜନାମୁକ୍ତ ପରିବେଶ ସହ ବର୍ଜ୍ୟବସ୍ତୁରୁ ରାଜସ୍ବ ବୃଦ୍ଧି କରାଯିବ। ଏହି ଲକ୍ଷ୍ୟରେ ଆରମ୍ଭ ହୋଇଥିଲା ପଳାଶୁଣୀ ମେଗା ବର୍ଜ୍ୟ ପରିଚାଳନା ପ୍ରକଳ୍ପ(ଏମ୍ଆରଏଫ୍)। ଏ ଭିତରେ ଦୁଇବର୍ଷ ଅତିକ୍ରାନ୍ତ ହେଲାଣି, ପ୍ରକଳ୍ପ ବାବଦରେ ୩୨.୦୭ କୋଟି ଟଙ୍କା ଖର୍ଚ୍ଚ ସରିଲାଣି। କିନ୍ତୁ ଅଦ୍ୟାବଧି ପ୍ରକଳ୍ପ କାର୍ଯ୍ୟକ୍ଷମ ହୋଇପାରିନି। ଗତ ଜୁନ୍ ଶେଷ ସୁଦ୍ଧା ଏହି ପ୍ରକଳ୍ପ ଶୁଭାରମ୍ଭ ହେବ ବୋଲି ବିଏମ୍‌ସି କର୍ତ୍ତୃପକ୍ଷ କହିଥିଲେ। କେତେବେଳେ ଜାନୁଆରି ତ’ କେତେବେଳେ ମେ’ରେ ଆରମ୍ଭ ହେବ କହି ଭୁବନେଶ୍ବର ବିଏମ୍‌ସି ବାରମ୍ବାର ଭଣ୍ଡାଇ ଚାଲିଛି।
ବିଏମ୍‌ସି କର୍ତ୍ତୃପକ୍ଷଙ୍କ ତଥ୍ୟ ମୁତାବକ, ୬୭ଟି ୱାର୍ଡରୁ ଦୈନିକ ପ୍ରାୟ ୮୦୦ ମେଟ୍ରିକ ଟନ୍ ବର୍ଜ୍ୟ ବାହାରୁଛି। ଏଥିରୁ ପ୍ରାୟ ୧୯୪ ମେଟ୍ରିକ୍ ଟନ୍ ଓଦା ବର୍ଜ୍ୟ ବିଏମ୍‌ସି ଅଞ୍ଚଳରେ ଥିବା ୩୭ଟି ଏମ୍‌ସିସି (ମାଇକ୍ରୋ କମ୍ପୋଷ୍ଟିଂ ସେଣ୍ଟର)ରେ ପ୍ରକ୍ରିୟାକରଣ ହେଉଛି। ସେହିଭଳି ୧୨୦ ମେଟ୍ରିକ୍ ଟନ୍ ଶୁଖିଲା ବର୍ଜ୍ୟବସ୍ତୁ ୨୨ଟି ଏମ୍ଆର୍‌ଏଫ୍ (ମ୍ୟାଟେରିଆଲ୍ ରିକଭରି ଫାସିଲିଟି)ରେ ପ୍ରକ୍ରିୟାକରଣ ହେଉଛି। ସମୁଦାୟ ବର୍ଜ୍ୟରୁ ନିର୍ଗତ ୧୪୬ ଟନ୍ ଆର୍‌ଡିଏଫ୍ (ରିଫ୍ୟୁଜ୍‌ଡ ଡିରାଇଭ୍‌ଡ ଫୁଏଲ୍) ବିଭିନ୍ନ ସିମେଣ୍ଟ କାରଖାନାକୁ ପଠାଯାଉଛି। ଟିଟିଏସ୍ (ଟେମ୍ପରାରି ଟ୍ରାନ୍‌ଜିଟ୍ ଷ୍ଟେସନ୍)ରେ ୩୪୦ ମେଟ୍ରିକ୍ ଟନ୍ ଆବର୍ଜନାର ପ୍ରକ୍ରିୟାକରଣ ହେଉଛି। ପ୍ରତି ଶନିବାର ଇ-ଵେଷ୍ଟ ସଂଗ୍ରହ ଓ ଏହାର ପୁନଃଚକ୍ରଣ ହେଉଛି। କିନ୍ତୁ ଗାଡ଼କଣ ଓ ସୈନିକ ସ୍କୁଲ ପାଖରେ ଆବର୍ଜନା ଭାର ବିଏମ୍‌ସିର ମୁଣ୍ଡବ୍ୟଥାର କାରଣ ପାଲଟିଛି। ଆବର୍ଜନା ଆଖପାଖ ଅଞ୍ଚଳରେ ଦୁର୍ଗନ୍ଧମୟ ପରିବେଶ ସହ ସଂକ୍ରମଣର ବାତାବରଣ ସୃଷ୍ଟି କରୁଛି। 

Advertisment

ଗାଡ଼କଣ, ସୈନିକ ସ୍କୁଲ ଟିଟିଏସ୍ ଆବର୍ଜନାକୁ କେନ୍ଦ୍ର କରି ବିଧାନସଭା ହୁଲସ୍ତୁଲ ସହ ତୀବ୍ର ଆନ୍ଦୋଳନ ମୁଣ୍ଡ ଟେକିବା ପରେ ସ୍ଥାୟୀ ପ୍ରତିକାର ପାଇଁ ପଳାଶୁଣୀଠାରେ ପ୍ରାୟ ୧୦ ଏକର ଜାଗାରେ ମେଗା ବର୍ଜ୍ୟ ପରିଚାଳନା ପ୍ରକଳ୍ପ(ଏମ୍ଆରଏଫ୍) ଯୋଜନା ହେଲା। ଯୋଜନା ରୂପରେଖ ଅନୁଯାୟୀ, ଏହି ପ୍ରକଳ୍ପ ଜରିଆରେ ଦୈନିକ ସହରରୁ ନିର୍ଗତ ୧୫୦ ଟନ୍ ଶୁଖିଲା ବର୍ଜ୍ୟ ପ୍ରକ୍ରିୟାକରଣ ହେବ। ଦୁଇଟି ପର୍ଯ୍ୟାୟରେ ଏହି ପ୍ରକିୟାକରଣ କରାଯିବ। ୧୦ ହଜାର ନଡ଼ିଆର କତା ପ୍ରକ୍ରିୟାକରଣ କରି ସେଥିରୁ ଦୈନିକ ଦଉଡ଼ି, ପା’ପୋଛ ଆଦି ଉତ୍ପାଦ ପ୍ରସ୍ତୁତ ହେବ। ଦୈନିକ ୨୦ ମେଟ୍ରିକ୍ ଟନ୍ ସବୁଜ ବର୍ଜ୍ୟ ପ୍ରକ୍ରିୟାକରଣ କରାଯାଇ ସେଥିରୁ ବ୍ରିକେଟ୍ (ଦାହ୍ୟ ପଦାର୍ଥ) ପ୍ରସ୍ତୁତ ପାଇଁ ବ୍ୟବସ୍ଥା ହେବ। ଘଣ୍ଟାପ୍ରତି ୫୦୦ କିଲୋଗ୍ରାମ ପ୍ଲାଷ୍ଟିକ (ନିମ୍ନମାନ) ପ୍ରକ୍ରିୟାକରଣ କରି ସେଥିରୁ ପେଭର୍‌ବ୍ଲକ ପ୍ରସ୍ତୁତ କରିବାର ବ୍ୟବସ୍ଥା ବି କରାଯିବ। ବିକାଶମୂଳକ କାମ ତଥା ଭବିଷ୍ୟତ ଯୋଜନା ପାଇଁ ଆଉ କିଛି ସ୍ଥାନ ସଂରକ୍ଷିତ ରଖାଯାଇଛି। ଏ ଭିତରେ ପ୍ରକଳ୍ପ ନିର୍ମାଣ ଓ ଯନ୍ତ୍ରାଂଶ ସ୍ଥାପନରେ ୩୨.୦୭ କୋଟି ଖର୍ଚ୍ଚ ହୋଇଥିବାବେଳେ କେବଳ କୋଠା ଓ ଅନ୍ୟାନ୍ୟ ନିର୍ମାଣ ବାବଦରେ ୨୩.୨୬ କୋଟି ଟଙ୍କା ଖର୍ଚ୍ଚ ସରିଲାଣି। ବିଭିନ୍ନ ଯନ୍ତ୍ରାଂଶ କ୍ରୟ ଓ ଅନ୍ୟାନ୍ୟ ମେକାନିକାଲ୍ କାମରେ ୮.୮୧ କୋଟି ଟଙ୍କା ଖର୍ଚ୍ଚ ସରିଲାଣି। ବିଏମ୍‌ସିର ଜଣେ ଅଧିକାରୀ କହିଛନ୍ତି, ଚଳିତ ମାସରେ ଏହି ପ୍ରକଳ୍ପର ଶୁଭାରମ୍ଭ ଲକ୍ଷ୍ୟ ରଖାଯାଇଛି। ଯେହେତୁ ଏହା ଏକ ମେଗା ପ୍ରକଳ୍ପ, ମୁଖ୍ୟମନ୍ତ୍ରୀଙ୍କ ସହ ମନ୍ତ୍ରୀ ଓ ଅନ୍ୟ ମାନ୍ୟଗଣ୍ୟ ଅତିଥିଙ୍କ ଉପସ୍ଥିତିରେ ଏହାର ଶୁଭାରମ୍ଭ ଯୋଜନା କରାଯାଉଛି।