୪ନମ୍ବର ବଜାରକୁ ନାକ ଟେକୁଛନ୍ତି: ‌ଡ୍ରେନ୍‌ରେ ଗଦା ହୋଇଛି ଜୈବିକ ବର୍ଜ୍ୟ

ଭୁବନେଶ୍ୱର: ଏକ ନମ୍ୱର ହାଟ ପରେ ରାଜଧାନୀର ଅନ୍ୟତମ ବଡ଼ ନିତ୍ୟବ୍ୟବହାର୍ଯ୍ୟ ସାମଗ୍ରୀର କେନ୍ଦ୍ର ୟୁନିଟ୍‌-୪ ବଜାର ବର୍ତ୍ତମାନ ଶୋଚନୀୟ ସ୍ଥିତିରେ ପଡ଼ିରହିଛି। ଦିନେ ଏହା କେବଳ ବଡ଼ ମାଛ ହାଟର ପରିଚୟ ‌ବହନ କରୁଥିଲା। ଏବେ କିନ୍ତୁ ଏହା ମାଛ, ପରିବାଠାରୁ ଆରମ୍ଭ କରି ତେଜରାତି ଦୋକାନ ଖୋଲିଲାଣି। ଦିନକୁ ଦିନ ଚାହିଦା ଓ ଗହଳି ବଢ଼ୁଥିଲେ ମଧ୍ୟ ବଜାରର ମୂଳ ସମସ୍ୟା ସୁଧୁରିବାର ନାଁ ଧରୁନି। ବଜାରରେ ଜବରଦଖଲ ବଢ଼ିବାରେ ଲାଗିଛି। ଏହାକୁ ହଟାଇବା ପାଇଁ ବଜାର ଚାରିପଟେ ନିର୍ମିତ ପାଚେରି ଅଧପନ୍ତରିଆ ହୋଇ ପଡ଼ିରହିଛି। ପୁଣି ପାର୍କିଂ ଜନିତ ସମସ୍ୟା ଥିବାରୁ ଲୋକେ ରାସ୍ତାରେ ଗାଡ଼ି ରଖିବାକୁ ବାଧ୍ୟ ହେଉଛନ୍ତି। 

ଆମିଷ ପାଇଁ ବଜାରର ଚାହିଦା ଅଧିକ ରହୁଥିବାରୁ ପ୍ରତିଦିନ ଲୋକଙ୍କ ଗହଳିଚହଳି ଲାଗି ରହୁଛି। ହେଲେ ଜୈବିକ ବର୍ଜ୍ୟ ନିଷ୍କାସନ ପାଇଁ ବିଶେଷ ବ୍ୟବସ୍ଥା ନଥିବାରୁ ବଜାରର ପରିମଳ ବ୍ୟବସ୍ଥା ଭୁଶୁଡ଼ି ପଡ଼ିଛି। ଆମିଷ ପାଣି ରାସ୍ତା ଉପରେ ବହୁଛି। ମାଛ କାତି, କୁକୁଡ଼ା ପର ଓ ଚିଙ୍ଗୁଡ଼ି ଖୋଳ ଦିନସାରା ଗଦା ହୋଇ ରହୁଛି। ପରେ ସେଗୁଡ଼ିକୁ ଡ୍ରେନ୍‌କୁ ପକାଇ ଦିଆଯାଉଛି। ଯେଉଁଥିପାଇଁ ଡ୍ରେନ୍‌ର ଜଳ ନିଷ୍କାସିତ ହୋଇପାରୁନାହିଁ। ଫଳରେ ଦୁର୍ଗନ୍ଧ ଯୋଗୁ ହାଟ ଭିତରେ ଠିଆ ହେବା ଅସମ୍ଭବ ହୋଇପଡ଼ୁଛି। 

ପରିମଳ ବିପର୍ଯ୍ୟସ୍ତ, ପାର୍କିଂ ବ୍ୟବସ୍ଥା ନାହିଁ
ଅଚଳ ପଡ଼ିଛି ଭ୍ରାମ୍ୟମାଣ ଶୌଚାଳୟ

ସେହିପରି ମାର୍କେଟକୁ ଏଜି କଲୋନି, ରବୀନ୍ଦ୍ର ମଣ୍ଡପ ଆଦିକୁ ସଂଯୋଗ କରୁଥିବା ରାସ୍ତା ଖରାପ ହୋଇପଡ଼ିଛି। ମାର୍କେଟକୁ ଏଜି କଲୋନି ସହିତ ସଂଯୋଗ କରୁଥିବା ରାସ୍ତା ଉପରେ ନିର୍ମିତ ଡ୍ରେନ୍‌ର ଉଚ୍ଚତା ରାସ୍ତାର ଉଚ୍ଚତାଠାରୁ ଅଧିକ ହୋଇଥିବାରୁ ଦୁର୍ଘଟଣା ଘଟୁଛି। ଡ୍ରେନ୍‌ କାମର ନିର୍ମାଣ ବର୍ଜ୍ୟ ରାସ୍ତାରେ ଗଦା ହୋଇରହିଛି। ମାର୍କେଟ ମଧ୍ୟରେ ଥିବା ଭ୍ରାମ୍ୟମାଣ ଶୌଚାଳୟ ଅଚଳ ପଡ଼ିଛି। ତେବେ ଏନେଇ ବ୍ୟବସାୟୀ ସଂଘର ସମ୍ପାଦକ ବଦ୍ରି ନାରାୟଣ ମିଶ୍ର କହିଛନ୍ତି, ମାର୍କେଟ ପରିମଳ ସ୍ଥିତି ଓ ଜବରଦଖଲ ହଟାଇବା ପାଇଁ ବାରମ୍ୱାର ବିଏମ୍‌ସିକୁ ଜଣାଯାଇଥିଲେ ସୁଦ୍ଧା ଏଯାବତ୍‌ ସ୍ଥିତି ସୁଧୁରିଲା ନାହିଁ। କର୍ପୋରେଟର ଅଲିଅଳି ମଲ୍ଲିକ କହିଛନ୍ତି, ହାଟରୁ ଅଳିଆ ହଟାଯାଉଛି। ତଥାପି ନୂତନ ଏଜେନ୍ସି ଦାୟିତ୍ୱ ନେଲେ ଆଉ ପରିମଳ ସମସ୍ୟା ରହିବ ନାହିଁ। ସେହିପରି ଏଜି କଲୋନି ସମ୍ମୁଖ ରାସ୍ତାର କାମ ପାଇଁ ଖୁବ୍‌ଶୀଘ୍ର ଟେଣ୍ଡର ହେବ ବୋଲି ସେ ମତ ଦେଇଛନ୍ତି। ସେହିପରି ବଜାର ଭିତରେ ପାର୍କିଂ ବ୍ୟବସ୍ଥା ପାଇଁ ଆଗାମୀ କର୍ପୋରେସନ୍‌ ବୈଠକରେ ପ୍ରସ୍ତାବ ଦିଆଯିବ।