ହାଇକୋର୍ଟରେ ପିଟିସନ ଦାଖଲ : ପ୍ରତି ୨ ୱାର୍ଡରେ କୋଭିଡ୍ କ୍ଲିନିକ୍ ପ୍ରତିଷ୍ଠା ହେଉ
କଟକ : ଦ୍ବୈତନଗରୀ ଅଞ୍ଚଳରେ କରୋନା ମୁକାବିଲା ପାଇଁ ଗ୍ରହଣ କରାଯାଉଥିବା ପଦକ୍ଷେପ ଯଥେଷ୍ଟ ନୁହେଁ। ଏହି ଦୁଇ ସହରରେ ଏବେ ସଂକ୍ରମିତଙ୍କ ସଂଖ୍ୟା ବଢ଼ିଚାଲିଛି। ଏପରି ସ୍ଥିତିରେ ପ୍ରତି ଦୁଇଟି ୱାର୍ଡ ପାଇଁ ଅତି କମ୍ରେ ଗୋଟିଏ କୋଭିଡ କ୍ଲିନିକ୍ ପ୍ରତିଷ୍ଠା କରାଯାଉ ବୋଲି ହାଇକୋର୍ଟରେ ପିଟିସନ୍ ଦାଖଲ ହୋଇଛି।
Sambad is now on WhatsApp
Join and get latest news updates delivered to you via WhatsApp
ଆଇନଜୀବୀ ବିଜୟ ରଗଡ଼ଙ୍କ ପକ୍ଷରୁ ଦାୟର ଆବେଦନରେ ଦର୍ଶାଯାଇଛି ଯେ କଟକ ଓ ଭୁବନେଶ୍ବରରେ ସଂକ୍ରମଣ ହାର ଏବେ ବହୁ ଅଧିକ। ଏବେ ପରିସ୍ଥିତି ଗମ୍ଭୀର ହୋଇପଡ଼ିଥିବା ବେଳେ ଆଗକୁ ଆଉ ଅଧିକ ଗୁରୁତର ରୂପ ଧାରଣ କରିବ। ଏପରି ପରିସ୍ଥିତିରେ ସିଏମସି ଓ ବିଏମସିକୁ ପ୍ରତି ଦୁଇଟି ୱାର୍ଡ଼ ପାଇଁ ଗୋଟିଏ କୋଭିଡ କ୍ଲିନିକ୍ ପ୍ରତିଷ୍ଠା ସହ ଏଥିଲାଗି ଆବଶ୍ୟକ ଡାକ୍ତର ଓ ସ୍ବାସ୍ଥ୍ୟକର୍ମୀଙ୍କୁ ନିଯୁକ୍ତି ପାଇଁ ନିର୍ଦ୍ଦେଶ ଦିଆଯାଉ। ଏପରି କ୍ଲିନିକରେ ମଧ୍ୟ କରୋନା ଭୂତାଣୁ ପରୀକ୍ଷା ପାଇଁ ସ୍ବାବ ନିଆଯାଇପାରିବ। ପ୍ରାଥମିକ ଚିକିତ୍ସା ପ୍ରଦାନ କରାଯାଇ ପାରିବ।
ଆବେଦନକାରୀ ଦର୍ଶାଇଛନ୍ତି ଯେ ସିଏମସି ଓ ବିଏମସିରେ ନିର୍ବାଚିତ ପ୍ରତିନିଧି ନଥିବା ବେଳେ ଲୋକମାନେ ସେମାନଙ୍କ ସମସ୍ୟା କାହାକୁ ଜଣାଇବେ ତାକୁ ନେଇ ପ୍ରଶ୍ନ ଉଠିଛି। ସବୁ ୱାର୍ଡ ସାନିଟାଇଜ କରାଯାଉ ନାହିଁ। ଫଳରେ ସଂକ୍ରମଣ ଆଶଙ୍କା ସବୁବେଳେ ରହୁଛି। ତେଣୁ ସବୁ ୱାର୍ଡ ପାଇଁ ଆଡଭୋକେଟ କମିସନର ନିଯୁକ୍ତ କରାଯାଉ। ଏଥିସହିତ ଆଡଭୋକେଟ କମିସନରଙ୍କୁ ସିଧାସଳଖ କୋର୍ଟରେ ରିପୋର୍ଟ ଦାଖଲ କରିବା ପାଇଁ ନିର୍ଦ୍ଦେଶ ଦିଆଯାଉ ବୋଲି ଆବେଦନରେ ଦର୍ଶାଯାଇଛି। କରୋନା ମୁକାବିଲା ପାଇଁ ଆଡଭୋକେଟ କମିସନରଙ୍କ ରିପୋର୍ଟ ସହାୟକ ହେବ ବୋଲି ଆବେଦନକାରୀ ଦର୍ଶାଇଛନ୍ତି।