ଭୁବନେଶ୍ବର: ମୌସୁମୀକୁ ସ୍ବାଗତ କରି ଗଛ ଲଗାଇବା ନିମନ୍ତେ ଜନସାଧାରଣଙ୍କୁ ଆହ୍ବାନ ଦେବା ଉଦ୍ଦେଶ୍ୟରେ ପ୍ରେରଣା ଇଣ୍ଟରନ୍ୟାସନାଲ ଗ୍ରିନ୍ ଆର୍ମି ପକ୍ଷରୁ ‘ଗଛ ଲଗାଇବାର ଋତୁ ଆସିଲା’ରେ ନାମକ ଏକ ଅଭିଯାନ ଆରମ୍ଭ ହୋଇଯାଇଛି। ଏହି ଅବସରରେ ଶୋଭାଯାତ୍ରା କରାଯିବା ସହ ଚିତ୍ରାଙ୍କନ ପ୍ରତିଯୋଗିତା କରାଯାଇଥିଲା। ଶୋଭାଯାତ୍ରାକାରୀମାନେ ରାଜଧାନୀର ବିଭିନ୍ନ ଟ୍ରାଫିକ୍‌ ଛକ ନିକଟରେ ପ୍ଲାକାର୍ଡ ପ୍ରଦର୍ଶନ କରିଥିଲେ। ଗ୍ରିନ୍‌ ଆର୍ମିର କମାଣ୍ଡାଣ୍ଟ-ଇନ୍‌-ଚିଫ୍‌ ଦିଲ୍ଲୀପ ଶ୍ରୀଚନ୍ଦନ କାର୍ଯ୍ୟକ୍ରମରେ ସଭାପତିତ୍ବ କରି କହିଲେ, ବ୍ୟାପକ ବୃକ୍ଷରୋପଣ ହିଁ ଉତ୍ତପ୍ତ ପୃଥିବୀକୁ ଶୀତଳ କରିପାରିବ। ଅନ୍ୟମାନଙ୍କ ମଧ୍ୟରେ ଅଜୟ ସ୍ବାଇଁ, ଡ. ପ୍ରକାଶ ଶ୍ରୀଚନ୍ଦନ, ଅନୁପମା ଚମ୍ପତ୍ତିରାୟ, ବନୋଜ ତ୍ରିପାଠୀ ଓ ବିଭିନ୍ନ ସ୍କୁଲର ଛାତ୍ରଛାତ୍ରୀ ସାମିଲ ହୋଇଥିଲେ।