ଭୁବନେଶ୍ୱର: ଅଶୀଦଶକର ଲୋକପ୍ରିୟ ନାଟ୍ୟକାର ସ୍ୱର୍ଗତ ପୂର୍ଣ୍ଣଚନ୍ଦ୍ର ଦାସଙ୍କ ବହୁଚର୍ଚ୍ଚିତ ନାଟକାବଳୀକୁ ନେଇ ପ୍ରସ୍ତୁତ ‘ନାଟ୍ୟକାର ପୂର୍ଣ୍ଣଚନ୍ଦ୍ର ଦାସଙ୍କ ଚର୍ଚ୍ଚିତ ନାଟକ ସମଗ୍ର’ ଲୋକାର୍ପିତ ହୋଇଯାଇଛି। ଚଳିତ ଗୁରୁପୂର୍ଣ୍ଣିମା ଦିନ ନାଟ୍ୟକାର ସ୍ବର୍ଗତ ଦାସଙ୍କ ପ୍ରଥମ ଶ୍ରାଦ୍ଧବାର୍ଷିକୀରେ ଆୟୋଜିତ ଏକ  ସ୍ମୃତିଚାରଣ ସମାରୋହରେ ଏହି ନାଟକ ସଂକଳନଟିକୁ ସୂଚନା ଓ ଲୋକସମ୍ପର୍କ ବିଭାଗର ନିର୍ଦ୍ଦେଶକ ଅନୁଜ କୁମାର ଦାସ ପଟ୍ଟନାୟକ, ଓଡ଼ିଶା ନାଟ୍ୟ ସଂଘର ସଭାପତି ମନୋଜ ପଟ୍ଟନାୟକ, ସଂଗୀତ ମହାବିଦ୍ୟାଳୟର ନାଟକ ବିଭାଗ ଅବସରପ୍ରାପ୍ତ ମୁଖ୍ୟ ଦେବାନନ୍ଦ ନାୟକ, ନାଟ୍ୟକାରଙ୍କ ପତ୍ନୀ ବୀଣା ଦାସ, କନ୍ୟା ସୂଚନା ଓ ଲୋକସମ୍ପର୍କ ବିଭାଗର ଉପନିର୍ଦ୍ଦେଶିକା ସୁଚେତା ପ୍ରିୟଦର୍ଶିନୀ ଏବଂ ପ୍ରକାଶକ ଚିତ୍ତରଞ୍ଜନ ପାତ୍ର ପ୍ରମୁଖ ଯୋଗଦେଇ ପୁସ୍ତକଟିକୁ ଲୋକାର୍ପିତ କରିଥିଲେ। 
କଟକର ‘ଆମ ଘର’ ପବ୍ଲିକେସନ୍‌ ଦ୍ୱାରା ପ୍ରକାଶିତ ଏହି ପୁସ୍ତକ ନାଟ୍ୟପ୍ରେମୀ ଓ ନାଟ୍ୟାନୁଷ୍ଠାନମାନଙ୍କ ଦ୍ୱାରା ପୁନଃଆଦୃତ ହେବ ବୋଲି ଆଶା କରିବା ସହ ସ୍ବର୍ଗତ ନାଟ୍ୟକାରଙ୍କ ପ୍ରତି ଏକ ଶ୍ରେଷ୍ଠ ଶ୍ରଦ୍ଧାଞ୍ଜଳି ବୋଲି ଅତିଥିମାନେ ମତବ୍ୟକ୍ତ କରିଥିଲେ। ଏହି ଅବସରରେ କବି ସୂର୍ଯ୍ୟ ମିଶ୍ର, କବି ରକ୍ଷକ ନାୟକ, ନାଟ୍ୟକାରଙ୍କ କନିଷ୍ଠ ଭ୍ରାତା ଡ. ପ୍ରତାପ ଚନ୍ଦ୍ର ଦାସ, ଇଂ. ପ୍ରଭାସ ଚନ୍ଦ୍ର ଦାସଙ୍କ ସମେତ ପରିବାରବର୍ଗ, ଶୁଭେଚ୍ଛୁ ଏବଂ ବହୁ ନାଟ୍ୟପ୍ରେମୀ ଓ ସାହିତ୍ୟପ୍ରେମୀ ଉପସ୍ଥିତ ଥିଲେ। ଏହି ନାଟ୍ୟପୁସ୍ତକ ସଂକଳନରେ ନାଟ୍ୟକାରଙ୍କ ସର୍ବାଧିକ ଲୋକପ୍ରିୟ ନାଟକ ‘ମହାନଗରୀରେ ବନ୍ୟା’, ‘ଆହତ ଅରଣ୍ୟ’, ‘ସେ ଏବଂ ଆମେ’, ‘ନିଷିଦ୍ଧ ନଗରୀ’, ‘ଶେଷ ପାହାଚ’ ଏବଂ ଅନୁବାଦ ନାଟକ ‘ସମ୍ରାଟ ଚନ୍ଦ୍ରଗୁପ୍ତ’ ସ୍ଥାନ ପାଇଛି। ଅଶୀ ଓ ନବେ ଦଶକର ଏହି ନାଟକଗୁଡ଼ିକ ଓଡ଼ିଶାର ପ୍ରାୟ ସମସ୍ତ ସହରରେ ବହୁବାର ମଞ୍ଚସ୍ଥ ହୋଇ ବହୁ ପ୍ରଶଂସା ଓ ସ୍ୱୀକୃତି ପାଇଥିଲା। ଆଗ୍ରହୀ ନାଟ୍ୟପ୍ରେମୀ ପାଠକମାନେ କଟକ ଏକେ. ମିଶ୍ର ପବ୍ଲିକେସନ୍‌ ସଂସ୍ଥା ଅଥବା ‘ଆମ ଘର’ ପବ୍ଲିକେସନ୍‌ ସହ ଯୋଗାଯୋଗ କଲେ ଏହି ସଂକଳନ ପାଇପାରିବେ ବୋଲି ପ୍ରକାଶକ ଚିତ୍ତରଞ୍ଜନ ପାତ୍ର ସୂଚନା ଦେଇଛନ୍ତି।