ତଦନ୍ତ ପାଇଁ ଯାଉଥିଲେ, ଗାଡ଼ି ଖରାପ ହୋଇଗଲା, ଡହଡହ ଖରାରେ ଚାଲି ଚାଲି ଫେରିଲା ପୁଲିସ

ଭୁବନେଶ୍ବର: ଏକ ମାମଲାର ତଦନ୍ତ କରିବାକୁ ଯାଉଥିଲେ। ବାଟରେ ଗାଡ଼ି ଖରାପ ହୋଇଗଲା ଯେ ଯେତେ ଚେଷ୍ଟା ପରେ ବି ଆଉ ଷ୍ଟାର୍ଟ ହେଲାନି। ତେଣୁ ଗାଡ଼ିକୁ ସେଇଠି ଛାଡ଼ି ୪୧ ଡିଗ୍ରି ଡହଡହ ଖରାରେ ଚାଲି ଥାନାକୁ ଫେରିଲେ ପୁଲିସ୍‌। କ୍ୟାପିଟାଲ ଥାନା ପୁଲିସ୍‌ ଟିମ୍‌ ଆଜି ଏମିତି ହଟହଟା ହୋଇଛି।

ମିଳିଥିବା ସୂଚନାନୁଯାୟୀ, ଆଜି ଦିନ ପ୍ରାୟ ୧୨ଟା ବେଳେ କ୍ୟାପିଟାଲ ଥାନାର ୭ରୁ ୮ଜଣ ପୁଲିସ୍‌ ଏକ ଘଟଣାର ତଦନ୍ତ ପାଇଁ ଯାଉଥିଲେ। ସେମାନେ ଶିଶୁଭବନ ଛକ ପାର୍‌ ହେଉଥିବା ବେଳେ ଭ୍ୟାନ୍‌ଟି ହଠାତ୍‌ ଖରାପ ହୋଇଯାଇଥିଲେ। ଯେତେ ଚେଷ୍ଟା କଲେ ବି ଗାଡ଼ିଟି ଆଉ ଷ୍ଟାର୍ଟ ହୋଇ ନଥିଲା। ତେଣୁ ଅନନ୍ୟୋପାୟ ହୋଇ ପୁଲିସ୍‌ କର୍ମଚାରୀମାନେ ଚାଲି ଚାଲି ଥାନାକୁ ଫେରିଥିଲେ। ପରେ ଗାଡ଼ିଟିକୁ ସଜଡ଼ା ଯାଇଥିଲା। ଏହି ଘଟଣା ଆଜି ଚର୍ଚ୍ଚାର ବିଷୟ ହୋଇଛି। ପୁଲିସ୍‌ ଗାଡ଼ିଗୁଡ଼ିକର ଠିକ୍‌ ଭାବେ ରକ୍ଷଣାବେକ୍ଷଣ କରାଯାଉନଥିବାରୁ ଆଜି ଏଭଳି ପରିସ୍ଥିତି ସୃଷ୍ଟି ହେଲା ବୋଲି କୁହାଯାଉଛି।