ଭୁବନେଶ୍ବର: ଆଜି ରାଜଧାନୀରେ ‘ପ୍ରବାସୀ ଓଡ଼ିଆ ଭବନ’ ଉଦ୍ଘାଟିତ ହୋଇଯାଇଛି। ୟୁନିଟ୍-୨ ସ୍ଥିତ ଭିଆର୍ ୩/୨ରେ ଏହି ଭବନ କାର୍ଯ୍ୟ କରିବ। ଏହା ଦ୍ବାରା ଦେଶ ବିଦେଶରୁ ଆସୁଥିବା ଓଡ଼ିଆ ଲୋକମାନେ ବିଶେଷ ଉପକୃତ ହେବେ। ବାହାରୁ ଆସୁଥିବା ଓଡ଼ିଆମାନେ ଭୁବନେଶ୍ବରରେ ପହଞ୍ଚିବା ପରେ ବିଭିନ୍ନ ସମସ୍ୟାରେ ପଡ଼ୁଥିବାରୁ ଏହି ଭବନ ସେମାନଙ୍କୁ ରହଣି ଓ ନିଜ ଘରେ ପହଞ୍ଚାଇବାରେ ସହଯୋଗ କରିବ। ବିଶେଷକରି ବିଦେଶରୁ ଆସୁଥିବା ଓଡ଼ିଆମାନେ ଭୁବନେଶ୍ବରରେ ପହଞ୍ଚିଲା ପରେ ଯେମିତି କୌଣସି ଅସୁବିଧାର ସମ୍ମୁଖୀନ ନ ହୁଅନ୍ତି, ସେଥିପ୍ରତି ଓଡ଼ିଆ ଭବନ ସ୍ବତନ୍ତ୍ର ଧ୍ୟାନ ଦେବ।
Sambad is now on WhatsApp
Join and get latest news updates delivered to you via WhatsApp
ଦିଲ୍ଲୀସ୍ଥିତ ଓଡ଼ିଆ ମହାମଞ୍ଚ ୨୦୧୯ ମସିହାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିକଟରେ ଏହି ଦାବି କରିଥିଲେ। ତେଣୁ ଆଜି ଓଡିଆ ମହାମଞ୍ଚର କର୍ମକର୍ତ୍ତା ମନୋଜ କୁମାର ନାୟକ ଓ ଗୋବର୍ଦ୍ଧନ ଧଳଙ୍କ ଅଧ୍ୟକ୍ଷତାରେ ଏହି ଉଦ୍ଘାଟନ କାର୍ଯ୍ୟ ସମ୍ପାଦିତ ହୋଇଛି। ଏହି କାର୍ଯ୍ୟକ୍ରମରେ ମନ୍ତ୍ରୀ ଅରୁଣ କୁମାର ସାହୁ, ମନ୍ତ୍ରୀ ସୁଶାନ୍ତ ସିଂ, ଚାନ୍ଦବାଲି ବିଧାୟକ ବ୍ୟୋମକେଶ ରାୟ, ବିଧାୟକ ଅନନ୍ତ ନାରାୟଣ ଜେନା ଓ ବରୀ ବିଧାୟିକା ସୁନନ୍ଦା ଦାସ ପ୍ରମୁଖ ଯୋଗ ଦେଇଥିଲେ। ବରିଷ୍ଠ ସାମ୍ବାଦିକ ତଥା ଏନ୍ଏନ୍ଏସର ସମ୍ପାଦକ ଶ୍ରୀରାମ ଦାସ, ଭାଷା ଆନ୍ଦୋଳନ ଓଡ଼ିଶାର ଆବାହକ ପବିତ୍ର ମହାରଥା, ତନ୍ମୟ ସ୍ବାଁଇ ଓ ଉମାଶଙ୍କର ପଣ୍ଡା ପ୍ରମୁଖ ଉପସ୍ଥିତ ଥିଲେ।