ଭୁବନେଶ୍ବର: ବାଲେଶ୍ବର ଏଫ୍‌ଏମ୍‌ କଲେଜ୍‌ ଛାତ୍ରୀଙ୍କ ଆତ୍ମାହୁତି ମାମଲାକୁ ନେଇ ଗୁରୁବାର ଦିନ କଂଗ୍ରେସ ଓ ମିଳିତ ବିରୋଧୀ ଦଳ ପକ୍ଷରୁ ଓଡ଼ିଶା ବନ୍ଦ ଡାକରା ଦିଆଯାଇଛି। ଏଥିପାଇଁ କମିସନରେଟ୍‌ ପୁଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଛି। ବନ୍ଦ ସମୟରେ ଜାତୀୟ ରାଜପଥ ଅବରୋଧ ଠାରୁ ଆରମ୍ଭ କରି ବିଧାନସଭା, ମୁଖ୍ୟମନ୍ତ୍ରୀ ଓ ଉଚ୍ଚ ଶିକ୍ଷାମନ୍ତ୍ରୀଙ୍କ ବାସଭବନକୁ ବିକ୍ଷୋଭକାରୀମାନେ ଧସେଇ ପଶିବାର ଆଶଙ୍କା ଥିବାରୁ ପୁଲିସ ପ୍ରସ୍ତୁତ ହୋଇ ରହିଛି। 
ବନ୍ଦକୁ ସଫଳ କରିବା ପାଇଁ ବିକ୍ଷୋଭକାରୀମାନେ ସରକାରୀ କାର୍ଯ୍ୟାଳୟ, ସ୍କୁଲ, କଲେଜ୍‌ ଆଦି ବନ୍ଦ କରିବା ସମ୍ଭାବନା ରହିଛି।  ଡିସିପି ଜଗମୋହନ ମୀନା କହିଛନ୍ତି ଯେ ସୁରକ୍ଷାକୁ ଦୃଷ୍ଟିରେ ରଖି ସାରା ସହରରେ ୫୦ ପ୍ଲାଟୁନ୍‌ ଫୋର୍ସ ମୁତୟନ କରାଯିବ। ଡିସିପି, ଆଡିସନାଲ୍‌ ଡିସିପି, ଏସିପି, ଇନ୍‌ସ୍ପେକ୍ଟର ରୢାଙ୍କର ୨୦୦ରୁ ଅଧିକ ଅଧିକାରୀ ସ୍ଥିତି ଉପରେ ନଜର ରଖିବେ। ସେହିପରି କୁଇକ୍‌ ଆକ୍ସନ ଟିମ୍‌, ଏସ୍‌ଟିୟୁ, ଡଗ୍‌ ସ୍କ୍ବାଡ୍‌, ବୋମା ନିଷ୍କ୍ରିୟକାରୀ ଟିମ୍‌, ଟ୍ରାଫିକ୍‌ ଵିଙ୍ଗ୍‌, ସିକ୍ୟୁରିଟି ଵିଙ୍ଗ୍‌, ଇଣ୍ଟେଲିଜେନ୍ସ ଵିଙ୍ଗ୍‌ ଓ ଅଗ୍ନିଶମ ବିଭାଗ ମଧ୍ୟ ଯେକୌଣସି ସ୍ଥିତିର ମୁକାବିଲା ପାଇଁ ପ୍ରସ୍ତୁତ ରହିଛନ୍ତି। ବିଭିନ୍ନ ସ୍ଥାନରେ ଥିବା ସିସିଟିଭି ସହ ଡ୍ରୋନ୍‌ ଆନ୍ଦୋଳନକାରୀଙ୍କ ଉପରେ ନଜର ରଖିବ। ଏଥିପାଇଁ କଣ୍ଟ୍ରୋଲ୍‌ ରୁମ୍‌ରୁ ନିର୍ଦେଶ ଦିଆଯିବ ବୋଲି ଶ୍ରୀ ମୀନା କହିଛନ୍ତି। ରେଳଷ୍ଟେସନ, ବସ୍‌ଷ୍ଟାଣ୍ଡ ଓ ରାଜଧାନୀର ବିଭିନ୍ନ ସମ୍ବେଦନଶୀଳ ଜାଗାରେ ସ୍ବତନ୍ତ୍ର ପୁଲିସ ବଳ ମୁତୟନ କରାଯାଉଛି।