ପୁଷ୍ପୁନି ଭେଟ୍
ଭୁବନେଶ୍ବର : ମଞ୍ଚରୁ ଶୁଭୁଥିଲା କଂସଙ୍କର ଦମ୍ଦାର୍ ସଂଳାପ। ସମ୍ପୂର୍ଣ୍ଣ ପାରମ୍ପରିକ ରାଜାରାଜୁଡ଼ା ପୋଷାକରେ ସଜେଇ ହୋଇ ମଂଚକୁ ଓହ୍ଲାଇଥିଲେ ରାଜା କଂସ ଓ ମନ୍ତ୍ରିମଣ୍ଡଳ। ବିଶ୍ବପ୍ରସିଦ୍ଧ ଧନୁଯାତ୍ରାର ଏକ ଛୋଟ କିୟଦଂଶକୁ ନେଇ ମଞ୍ଚରେ ପରିବେଷିତ ମାମୁଁ କଂସ ଓ ଭଣଜା କାହ୍ନାଙ୍କର ଏହି ନାଟକ ଦର୍ଶକଙ୍କୁ ବେଶ୍ ଆମୋଦିତ କରିଥିଲା। ଅବସର ଥିଲା ପଶ୍ଚିମ ଓଡ଼ିଶାର ପ୍ରମୁଖ ପର୍ବ ପୌଷ ପୂର୍ଣ୍ଣିମା ଉପଲକ୍ଷେ ‘ପୁଷ୍ପୁନି ଭେଟ୍-୨୦୧୯’ର। ‘ପଶ୍ଚିମ କିରନ୍’ ଓ ‘ବଲାଙ୍ଗିରର ଶତାବ୍ଦୀ ଯୁବକ ସଂଘ’ର ମିଳିତ ଆନୁକୂଲ୍ୟରେ ଉତ୍କଳ ମଣ୍ଡପ ମୁକ୍ତ ମଞ୍ଚରେ ଆୟୋଜିତ ଏହି ପୁଷ୍ପୁନି ଭେଟ୍ର ପ୍ରଥମ ସଂସ୍କରଣ ଆୟୋଜିତ ହୋଇଥିଲା।
Sambad is now on WhatsApp
Join and get latest news updates delivered to you via WhatsApp
କାର୍ଯ୍ୟକ୍ରମରେ ପଦ୍ମଶ୍ରୀ ହଳଧର ନାଗଙ୍କ କବିତା ଆବୃତ୍ତି ସହ କଣ୍ଠଶିଳ୍ପୀ ଅସୀମା ପଣ୍ଡା ଓ ଉମାକାନ୍ତ ବାରିକଙ୍କ ସୁରିଲା ସଙ୍ଗୀତ ଶୁଣିବାକୁ ମିଳିଥିଲା। ପରେ ହାସ୍ୟ କଳାକାର ଯୋଗେଶ୍ ଜୋଜୋଙ୍କ ହାସ୍ୟାଭିନୟ ଦର୍ଶକ ଉପଭୋଗ କରିଥିଲେ। କାର୍ଯ୍ୟକ୍ରମରେ ଶ୍ରମମନ୍ତ୍ରୀ ସୁଶାନ୍ତ ସିଂହ, ପଦ୍ମଶ୍ରୀ ଜିତେନ୍ଦ୍ରୀୟ ହରିପାଲ୍, କୀର୍ତ୍ତନ ଦାସ, ସବ୍ୟସାଚୀ ମହାପାତ୍ର, ଶତ୍ରୁଘ୍ନ ଲୁହା ଓ ଭବାନୀ ଭୋଇ ପ୍ରମୁଖଙ୍କୁ ‘କିରନ ସମ୍ମାନ’ରେ ସମ୍ମାନିତ କରାଯାଇଥିଲା। କାର୍ଯ୍ୟକ୍ରମରେ ମନ୍ତ୍ରୀ ଶ୍ରୀ ସିଂହଙ୍କ ସମେତ ସୁପରଷ୍ଟାର ଅରିନ୍ଦମ ରାୟ ଓ ସମାଜସେବୀ ମୀରା ପରିଡ଼ା ପ୍ରମୁଖ ଅତିଥି ଭାବେ ଯୋଗ ଦେଇଥିଲେ। ପୁଷ୍ପୁନି ଭେଟ୍ର ପରିଚାଳନା କମିଟି କାର୍ଯ୍ୟକାରୀ ସଭାପତି ସଂଗ୍ରାମ କେଶରୀ ପଟ୍ଟନାୟକ, କାର୍ଯ୍ୟକାରୀ ଉପସଭାପତି ଡ. ସ୍ବସ୍ତିକ ଓ କାର୍ଯ୍ୟକାରୀ ସମ୍ପାଦକ ଓମ୍ ସ୍ବରୂପ ପଟ୍ଟନାୟକ ପ୍ରମୁଖ କାର୍ଯ୍ୟକ୍ରମ ପରିଚାଳନା କରିଥିଲେ।