ଭୁବନେଶ୍ବର: ସ୍ପେସାଲ ସ୍କ୍ବାଡ୍‌ କବ୍‌ଜାରେ ଦେହ ବ୍ୟବସାୟର ରାଣୀ ମହୁମାଛି। ଭୁବନେଶ୍ବର ଉପକଣ୍ଠ ପିପିଲି ଅଞ୍ଚଳରୁ ସଂପୃକ୍ତ ମହିଳାଙ୍କୁ ଉଠାଇ ଆଣିଛି ସ୍ପେସାଲ ସ୍କ୍ବାଡ୍‌। ବାଂଲାଦେଶୀ ଯୁବତୀଙ୍କୁ ଦେହ ବ୍ୟବସାୟରେ ଲିପ୍ତ ରଖିବା ଅଭିଯୋଗର ତାଙ୍କୁ ମହିଳା ଥାନାରେ ଅଟକ ରଖି ପୁଲିସ ପଚରାଉଚରା ଚଳାଇଛି। ବାଂଲାଦେଶରୁ ଓଡ଼ିଶା ପର୍ଯ୍ୟନ୍ତ ଏହି ଦେହ ବ୍ୟବସାୟର ନେଟ୍‌ଵର୍କ ରହିଥିବା ନେଇ ତନାଘନା ଚଳାଇଛି ସ୍ବତନ୍ତ୍ର ଟିମ୍। ଏହି ରାଣୀ ମହୁମାଛି‌ ଚାକିରି ନାଁରେ ଯୁବତୀଙ୍କୁ ବାଂଲାଦେଶରୁ ଓଡ଼ିଶାକୁ ଆଣି ଦେହ ବ୍ୟବସାୟରେ ଲିପ୍ତ କରୁଥିବାରୁ ଏହି ମାମଲାର ପରବର୍ତ୍ତୀ ପର୍ଯ୍ୟାୟରେ ଜାତୀୟ ତଦନ୍ତକାରୀ ଏଜେନ୍ସି ଏନ୍‌ଆଇଏ ଜେରା କରିପାରେ ବୋଲି ବିଶ୍ବସ୍ତ ସୂତ୍ରରୁ ଜଣାପଡ଼ିଛି। କିଛିବର୍ଷ ତଳେ କ୍ରାଇମ୍‌ବ୍ରାଞ୍ଚ ଏସ୍‌ଟିଏଫ୍ ଏହି ରାଣୀ ମହୁମାଛି‌ ସମେତ ତାର ପୂରା ସାମ୍ରାଜ୍ୟ ଉପରେ ଚଢ଼ଉ କରିଥିଲା। ଏହି ଚଢ଼ଉରେ ରାଣୀ ମହୁମାଛି‌ ସମେତ ୧୧ଜଣ ଦେହଜୀବୀ ଧରାପଡ଼ିଥିଲେ। ପରେ ତା’ର ସ୍ବାମୀ ମଧ୍ୟ ଧରାପଡ଼ିଥିଲା।
ସୂଚନା ଅନୁସାରେ ଏହି ରାଣୀ ମହୁମାଛିଙ୍କ ପ୍ରକୃତ ଘର ବାଂଲାଦେଶରେ। ସେ ବର୍ତ୍ତମାନ ପିପିଲି ଅଞ୍ଚଳରେ ରହୁଛନ୍ତି। ବାଂଲାଦେଶରେ ରହୁଥିବା ନିଜ ଉଭଣୀର ସହଯୋଗରେ ସେ ବାଂଲାଦେଶୀ ଯୁବତୀମାନଙ୍କୁ ଭାରତକୁ ଆଣିଥାଏ। ପଶ୍ଚିମବଙ୍ଗ-ବାଂଲାଦେଶ ସୀମାରେ ଜଣେ ଦଲାଲ ୨୦ହଜାରରୁ ୩୦ ହଜାର ଟଙ୍କା ନେଇ ସେମାନଙ୍କୁ କୋଲକାତାକୁ ଆଣିଥାଏ। ପରେ ଦଲାଲ କୋଲକାତାରେ ନକଲି ଆଧାରକାର୍ଡ ସହ  ଅନ୍ୟ ଡକ୍ୟୁମେଣ୍ଟ ତିଆରି କରିଥାଏ। ସେଠାରେ କିଛିଦିନ ବିତାଇବା ପରେ ସେମାନଙ୍କୁ ଓଡ଼ିଶା ପଠାଯାଇଥାଏ। ଏହି ଲେଡି କିଙ୍ଗ୍‌ପିନ୍‌ ରାଜଧାନୀର ପ୍ରମୁଖ ଅଞ୍ଚଳରେ ଏମାନଙ୍କୁ ରଖି ଦେହ ବ୍ୟବସାୟର କାୟା ବିସ୍ତାର କରିଥାଏ। ଏକାଧିକ ଦଲାଲଙ୍କ ଜରିଆରେ ଗ୍ରାହକ ଯୋଗାଡ଼ କରି ଏହି ବ୍ୟବସାୟ ଚଳାଉଥିବା ଅଭିଯୋଗ ହୋଇଛି। ବାଂଲାଦେଶୀ ଯୁବତୀଙ୍କୁ ଦେହ କାରବାରରେ ନିୟୋଜିତ କରାଯାଇଥିବା ନେଇ ବିଶେଷସୂତ୍ରରୁ ଖବର ପାଇ ସ୍ପେସାଲ୍‌ ସ୍କ୍ବା‌ଡ୍‌ ଗତକାଲି ବିଳମ୍ବିତ ରାତିରେ ଚଢ଼ଉ କରି ଲେଡି କିଙ୍ଗ୍‌ପିନ୍‌ଙ୍କୁ ଉଠାଇ ଆଣିଛି। ସେହିପରି ବାଂଲାଦେଶୀ ‌ରୂପଜୀବୀଙ୍କୁ ଧରିବା ଲାଗି ପୁଲିସ ବିଭିନ୍ନ ସ୍ଥାନରେ ଚଢ଼ଉ ଆରମ୍ଭ କରିଛି। ଏହି ଘଟଣାରେ ସଂପୃକ୍ତି ଅଭିଯୋଗରେ ଖଣ୍ଡଗିରି ଥାନା ଅଞ୍ଚଳରୁ ଜଣେ ଦଲାଲଙ୍କୁ ପୁଲିସ ଉଠାଇ ଆଣିଥିବା ଚର୍ଚ୍ଚାହେଉଛି।
ସୂଚନାଯୋଗ୍ୟ, ନିକଟରେ କଟକ ଅଞ୍ଚଳରେ ଜଣେ ବାଂଲାଦେଶୀ ନାବାଳିକାଙ୍କୁ ଦେହ ବ୍ୟବସାୟ ପାଇଁ ଓଡ଼ିଶାକୁ ଚାଲାଣ ହୋଇଥିଲା। ଦଲାଲ ପ୍ରଥମେ ତାଙ୍କୁ କୋଲକାତା ପରେ ଭୁବନେଶ୍ବର ଓ ବାରିପଦାରେ ଦେହ ବ୍ୟବସାୟରେ ଲଗାଇଥିଲେ। କଟକରେ ଏଣେତେଣେ ବୁଲୁଥିବା ଅବସ୍ଥାରେ ଏକ ଅନୁଷ୍ଠାନ ତାଙ୍କୁ ଠାବ କରିବା ପରେ କଟକ କମିସନରେଟ୍‌ ପୁଲିସ ମାମଲା ରୁଜୁ କରି ତଦନ୍ତ କରିଥିଲା। ଏହି ମାମଲାରେ ଏକାଧିକ ଦଲାଲ ଧରାପଡ଼ିଥିଲେ।