ଦୁଇ କରତ କଳରେ ଚଢ଼ଉ : ୨୦ଲକ୍ଷ ଟଙ୍କାର ଯନ୍ତ୍ରାଂଶ ଓ କାଠଗଣ୍ଡି ଜବତ
ବାଲିଅନ୍ତା : ଖୋର୍ଧା ଜିଲ୍ଲା ବନଖଣ୍ଡ ଓ ଦୁର୍ନୀତି ନିବାରଣ ବିଭାଗର ମିଳିତ ଟିମ୍ ଆଜି ପୂର୍ବାହ୍ନରେ ବାଲିପାଟଣା ଫରେଷ୍ଟ ରେଞ୍ଜ ଅଞ୍ଚଳରେ ଥିବା ଦୁଇଟି କରତକଳ ଉପରେ ଚଢ଼ଉ କରି ବିପୁଳ ପରିମାଣର କାଠଗଣ୍ଡି ଓ ଯନ୍ତ୍ରାଂଶ ଜବତ କରିଛନ୍ତି। ଜବତ ସାମଗ୍ରୀର ମୂଲ୍ୟ ୨୦ ଲକ୍ଷ ଟଙ୍କାରୁ ଅଧିକ ହେବ ବୋଲି ସହକାରୀ ବନ ସଂରକ୍ଷକ ଦିଲ୍ଲୀପ କୁମାର ରାଉତ ସୂଚନା ଦେଇଛନ୍ତି। ସେହିପରି କରତ କଳ ଭିତରୁ ବିଭିନ୍ନ ମୂଲ୍ୟବାନ ଜିନିଷପତ୍ର, ଗୋଟିଏ ଟ୍ରାକ୍ଟର ଓ ସାଇଜ କାଠପଟା ଜବତ ହୋଇଥିଲା। କିନ୍ତୁ ଏକାଧିକ ବଡ଼ ଜେନେରେଟର୍କୁ ଅଧିକାରୀମାନେ ଜବତ କରିନାହାନ୍ତି। ଗୁରୁତ୍ୱପୂର୍ଣ୍ଣ କଥା ହେଲା, ଚଢ଼ଉ ବେଳେ ଶତାଧିକ ବନ କର୍ମଚାରୀ ଓ ପୁଲିସ ଫୋର୍ସ ସାମ୍ନାରେ କରତକଳ କର୍ମଚାରୀଙ୍କ ସମେତ କାଠ ମିସ୍ତ୍ରି ଓ ମାଲିକ ଖସି ପଳାଇଥିଲେ ହେଁ ପୁଲିସ ସେମାନଙ୍କୁ ଗିରଫ କରିପାରିନଥିଲା। ଏହାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ, ବାଲିପାଟଣା ଫରେଷ୍ଟ ରେଞ୍ଜ ଅଧୀନ ବାଲିଅନ୍ତା, ବାଲିପାଟଣା ଓ ପିପିଲିରେ ୨୦ରୁ ଅଧିକ ବେଆଇନ କରତକଳ ଦୀର୍ଘ ଦିନ ଧରି ଚାଲିଛି। ସେଥିମଧ୍ୟରୁ ସେଥିମଧ୍ୟରୁ ଆଜି କେବଳ ବାଲିଅନ୍ତା ବ୍ଲକ ଅଧୀନ ବାଳକାଟି ଭାର୍ଗବୀ ନଦୀପଠା ଓ ଝିଣ୍ଟିରେ ଥିବା ମାତ୍ର ଦୁଇଟି କରତକଳ ଉପରେ ଚଢ଼ଉ ହୋଇଥିଲା। କିନ୍ତୁ ଚଢ଼ଉ ସତ୍ତ୍ବେ ସଂଧ୍ୟାରେ କେତେଜଣ ସ’ମିଲ ମାଲିକ କାଠ ପେଡ଼ା ଜାରି ରଖିଥିବା ସୂଚନା ମିଳିଛି।