ଗୋଆ ଆଇଏଫ୍ଏଫ୍‌ଆଇରେ ‘ରଂଗଶୁର’ ଟ୍ରେଲର୍‌

ଭୁବନେଶ୍ବର: ଏଇ କିଛିଦିନ ହେବ ଓଡ଼ିଆ ଚଳଚିତ୍ର ପ୍ରତି ଲୋକଙ୍କର ରୁଚି ବଢିବା ସହିତ ଏହା ଭଲ ବ୍ୟବସାୟ ବି କରୁଛି। ଏବେ ଭିନ୍ନ ଓ ବାସ୍ତବବାଦୀ କାହାଣୀ ପ୍ରତି ଉଭୟ ଦର୍ଶକ ଓ ନିର୍ମାତାମାନଙ୍କର ରୁଚି ବଢ଼ୁଛି। ଆଗକୁ ଆହୁରି ଭଲ ଭଲ ଓଡ଼ିଆ ଫିଲ୍ମ ମୁକ୍ତିଲାଭ କରିବାକୁ ଯାଉଥିବେ ବେଳେ ଅନ୍ତର୍ଜାତୀୟ ସ୍ତରରେ ପ୍ରଶଂସା ସାଉଁଟୁଛି ନୂଆ ଓଡ଼ିଆ ଫିଲ୍ମ ‘ରଂଗଶୁର’ର ଟ୍ରେଲର୍‌। ନିକଟରେ ଗୋଆରେ ଆୟୋଜନ ହୋଇଥିବା ଆଇଏଫ୍‌ଏଫ୍‌ଆଇ, ଫିଲ୍ମ ଵଜାର୍‌ ଓ ଆଇଏମ୍‌ପିପିଏ ମହୋତ୍ସବରେ ରିଲିଜ୍‌ କରାଯାଇଛି ‘ରଂଗଶୁର’ର ଟ୍ରେଲର୍‌। ଟ୍ରେଲର୍‌ଟି ଫିଲ୍ମ ଓ ରାଜନୀତି କ୍ଷେତ୍ରର ବହୁ ବିଶିଷ୍ଟ ବ୍ୟକ୍ତିଙ୍କ ପାଖରୁ ଢେର୍‌ ପ୍ରଶଂସା ସାଉଁଟିଛି। ଏବେ ମୁନ୍‌ ଟିଭି, ପ୍ରକାଶ ଫିଲ୍ମ୍ସ ଓ ମ୍ୟାକ୍ସିମିଆ ଫିଲ୍ମର ମିଳିତ ପ୍ରୟାସରେ ତିଆରି ହୋଇଥିବା ଏ ଫିଲ୍ମଟିକୁ ଅନ୍ତର୍ଜାତୀୟ ସ୍ତରରେ ରିଲିଜ୍‌ କରିବାଲାଗି ଉଦ୍ୟମ କରାଯାଉଛି। ଗୋଆରେ ଟ୍ରେଲର୍‌ ରିଲିଜ୍‌ ଅବସରରେ ଫିଲ୍ମର ପ୍ରଯୋଜକ ପ୍ରଶାନ୍ତ ବେହେରା, ସୁନୀଲ ଯାଦବ ଓ ନିର୍ଦ୍ଦେଶକ ପ୍ରତାପ ରାଉତ ଉପସ୍ଥିତ ଥିଲେ। ପ୍ରକାଶ ଫିଲ୍ମ ତରଫରୁ ‘ତୁଝା ଆଇଲା’ ନାମକ ମରାଠୀ ଫିଲ୍ମର ମଧ୍ୟ ଶୁଭ ଉନ୍ମୋଚନ କରାଯାଇଛି। ଫିଲ୍ମଟି ଆସନ୍ତା ମକର ସଂକ୍ରାନ୍ତି ଉପଲକ୍ଷେ ରିଲିଜ୍‌ ହେବବୋଲି ସୂଚନା ମିଳିଛି।