ରମାଦେବୀ ମହିଳା ବିଶ୍ୱବିଦ୍ୟାଳୟ ପରୀକ୍ଷା ଫଳ : ପାସ୍ହାର ୮୯.୭୭%, ସୌରଞ୍ଜିତା ଟପର୍, ୯୦%ରୁ ଅଧିକ ନମ୍ବର ରଖିଲେ ୪ ଛାତ୍ରୀ
ଭୁବନେଶ୍ୱର : ରମାଦେବୀ ମହିଳା ବିଶ୍ୱବିଦ୍ୟାଳୟର ଯୁକ୍ତ୩ ପରୀକ୍ଷା ଫଳ ପ୍ରକାଶ ପାଇଛି। ବିଶ୍ୱବିଦ୍ୟଳୟର ପ୍ରଥମ ଯୁକ୍ତ୩ ବ୍ୟାଚ୍ ତଥା ଚଏସ୍ ବେସ୍ଡ କ୍ରେଡିଟ୍ ସିଷ୍ଟମ(ସିବିସିଏସ୍)ରେ ପରୀକ୍ଷା ଦେଇଥିବା କଳା, ବିଜ୍ଞାନ ଓ ବାଣିଜ୍ୟ ବିଭାଗ ଛାତ୍ରୀଙ୍କ ପାସ୍ହାର ୮୯.୭୭% ରହିଛି। ଗତଥର ପାସ୍ହାର ୮୭.୫୧% ଥିଲା। କଳା ବିଭାଗରେ ସର୍ବାଧିକ ପାସ୍ହାର ୯୦.୮୨% ରହିଥିବା ବେଳେ ବାଣିଜ୍ୟରେ ୮୯.୭୫% ଓ ବିଜ୍ଞାନରେ ୮୫.୮୩% ହୋଇଛି। ବିଜ୍ଞାନ ବିଭାଗର ପ୍ରାଣୀ ବିଜ୍ଞାନ ବିଷୟ ଛାତ୍ରୀ ସୌରଞ୍ଜିତା ମାଝୀ ସର୍ବାଧିକ ନମ୍ବର ରଖି ଯୁକ୍ତ୩ରେ ବିଶ୍ୱବିଦ୍ୟାଳୟ ଟପର୍ ହୋଇଛନ୍ତି। ସେ ୩ ବର୍ଷରେ ମୋଟ ୨୪୦୦ ନମ୍ବରରୁ ୨୧୫୦ ନମ୍ବର ରଖି ଶେଷ୍ଠତ୍ୱ ପ୍ରତିପାଦନ କରିଛନ୍ତି। କଳା, ବିଜ୍ଞାନ, ବାଣିଜ୍ୟ ବିଭାଗର ୧୯ଟି ବିଷୟ ମଧ୍ୟରୁ ୩ଟିରେ ଶତ ପ୍ରତିଶତ ରେଜଲ୍ଟ ହୋଇଛି। ଇଂରାଜୀ, ଉଦ୍ଭିଦ ବିଜ୍ଞାନ ଓ ପ୍ରାଣୀ ବିଜ୍ଞାନ ବିଷୟରେ ପରୀକ୍ଷା ଦେଇଥିବା ସମସ୍ତ ଛାତ୍ରୀ ପାସ୍ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
କଳା ବିଭାଗରେ ମୋଟ ୪୫୭ ଜଣ ଛାତ୍ରୀ ପରୀକ୍ଷା ଦେଇଥିବା ବେଳେ ୪୦୬ ଜଣ ପାସ୍ କରିଛନ୍ତି। ୩ ଜଣ କପି କରି ଏମ୍ପି ଓ ୭ ଜଣ ପରୀକ୍ଷାର୍ଥୀଙ୍କ ପରୀକ୍ଷା ଫଳ ସ୍ଥଗିତ ରହିଛି। ବିଜ୍ଞାନ ବିଭାଗରେ ପରୀକ୍ଷା ଦେଇଥିବା ୧୨୮ ଜଣ ଛାତ୍ରୀଙ୍କ ମଧ୍ୟରୁ ୧୦୩ ଜଣ ପାସ୍, ୨ ଜଣ ଏମ୍ପି ଓ ୬ ଜଣ ଛାତ୍ରୀଙ୍କ ପରୀକ୍ଷା ଫଳ ସ୍ଥଗିତ ରହିଛି। ବାଣିଜ୍ୟରେ ପରୀକ୍ଷା ଦେଇଥିବା ୨୧୧ ଜଣ ଛାତ୍ରୀଙ୍କ ମଧ୍ୟରୁ ୧୮୪ ଜଣ ପାସ୍ କରିଛନ୍ତି। ୬ ଜଣଙ୍କ ପରୀକ୍ଷା ଫଳ ସ୍ଥଗିତ ରଖାଯାଇଛି।
ରସାୟନ ବିଜ୍ଞାନ ବିଷୟରେ ଦୁଇ ଜଣ, କମ୍ପ୍ୟୁଟର୍ ସାଇନ୍ସ ଓ ଜୀବ ବିଜ୍ଞାନ ବିଷୟରେ ଜଣେ ଲେଖାଏ ଛାତ୍ରୀ ଡିଷ୍ଟିଂସନ୍ ସହ ୯୦%ରୁ ଅଧିକ ନମ୍ବର ରଖି ପାସ୍ କରିଛନ୍ତି। ୮୦ରୁ ୮୯% ମଧ୍ୟରେ ୪୨ ଜଣ ଛାତ୍ରୀ ଥିବା ବେଳେ ୧୩୫ ଜଣ ଡିଷ୍ଟିଙ୍ଗସନ୍ ସହ ୭୦ରୁ ୭୯% ମାର୍କ ପାଇଛନ୍ତି। ୩୭ ଜଣ ୭୦ରୁ ୭୯% ମାର୍କ ରଖିଛନ୍ତି। ଡିଷ୍ଟିଙ୍ଗସନ ସହ ୬୦ରୁ ୬୯% ନମ୍ବର ଛାତ୍ରୀଙ୍କ ସଂଖ୍ୟା ୧୪୧ ରହିଛି। କେବଳ ୬୦ରୁ ୬୯% ନମ୍ବର ରଖିଥିବା ପରୀକ୍ଷାର୍ଥୀଙ୍କ ସଂଖ୍ୟା ୯୪ ଥିବା ବେଳେ ୫୮ ଜଣ ୪୫%ରୁ ଅଧିକ ନମ୍ବର ରଖିବା ସହ ଡିଷ୍ଟିଙ୍ଗସନ୍ ପାଇଛନ୍ତି। ୧୬୯ ଜଣ ଛାତ୍ରୀ ୪୫%ରୁ ଅଧିକ ନମ୍ବର ରଖି କୃତକାର୍ଯ୍ୟ ହୋଇଛନ୍ତିି। ୭ ଜଣ ଛାତ୍ରୀ ବିନା ଅନର୍ସରେ ପାସ୍ କରିଛନ୍ତି। ମୋଟ ୭୯୬ ଜଣ ପରୀକ୍ଷା ଦେଇଥିବା ବେଳେ ୬୯୩ ଜଣ ପାସ୍ କରିଛନ୍ତି। ୧୯ ଜଣଙ୍କ ପରୀକ୍ଷା ଫଳ ସ୍ଥଗିତ ରହିଛି। ୫ ଜଣ ଏମ୍ପି ହୋଇଛନ୍ତି। ପାସ୍ହାର ୮୯.୭୭% ହୋଇଛି। ବିଶ୍ୱବିଦ୍ୟାଳୟ ଅଧୀନରେ ଥିବା ଅନ୍ୟ ମହିଳା କଲେଜଗୁଡ଼ିକର ଯୁକ୍ତ୩ ପରୀକ୍ଷା ଫଳ ଖୁବ୍ଶୀଘ୍ର ପ୍ରକାଶ ପାଇବ ବୋଲି ପରୀକ୍ଷା ନିୟନ୍ତ୍ରକ ସୂଚନା ଦେଇଛନ୍ତି।