‘ନିମ୍ନସ୍ତରର ଲୋକଙ୍କୁ ସ୍ୱାବଲମ୍ୱୀ କରିବା ହିଁ ପ୍ରକୃତ ବିକାଶ’

ଭୁବନେଶ୍ୱର: ବର୍ତ୍ତମାନ ଶିକ୍ଷା ଓ ସ୍ୱାସ୍ଥ୍ୟ ସେବା ବିରାଟ ସମସ୍ୟା ଦେଇ ଗତି କରୁଛି। ବିଶେଷ କରି ପ୍ରାଥମିକ ଶିକ୍ଷାର ସ୍ଥିତି ଦୁର୍ବଳ ହୋଇଗଲାଣି। ଯୁବପିଢ଼ି ଆଇଟି କୁଲି ଭାବରେ ବାହାରକୁ ରୋଜଗାର ପାଇଁ ଯାଉଛନ୍ତି। ତେଣୁ ଏହି ସମସ୍ୟାର ସମାଧାନ ପାଇଁ ନାଗରିକ ସମାଜକୁ ସକ୍ରିୟ ହେବାକୁ ପଡ଼ିବ। ସମାଜର ବିକାଶରେ ନାଗରିକ ସମାଜର ଦାୟିତ୍ୱ ଅଧିକ। ତେଣୁ କାର୍ଯ୍ୟରତ ଅନୁଷ୍ଠାନ ତଥା ଏନ୍‌ଜିଓମାନେ ନକାରାତ୍ମକ ମନ୍ତବ୍ୟକୁ ଆହ୍ୱାନ ଭାବି କାର୍ଯ୍ୟ କରିବା ଉଚିତ ବୋଲି ଇଷ୍ଟର୍ଣ୍ଣ ମିଡିଆ ଲିମିଟେଡ୍‌ର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ସୌମ୍ୟରଂଜନ ପଟ୍ଟନାୟକ କହିଛନ୍ତି। 

ସାମାଜିକ ଅନୁଷ୍ଠାନ ‘ବାଣୀ’ ଓ ‘ସିଵାଇଏସ୍‌ଡି’ର ମିଳିତ ଆନୁକୁଲ୍ୟରେ ସିଵାଇଏସ୍‌ଡି ସମ୍ମିଳନୀ କକ୍ଷରେ ଆୟୋଜିତ ‘ଓଡ଼ିଶାରେ ନାଗରିକ ସମାଜର ସଶକ୍ତୀକରଣ’ ଶୀର୍ଷକ ଆଲୋଚନାଚକ୍ରରେ ମୁଖ୍ୟଅତିଥି ଭାବେ ଯୋଗଦେଇଶ୍ରୀ ପଟ୍ଟନାୟକ କହିଛନ୍ତି ଯେ ସମ୍ପଦ ବହୁଳ ଏହି ରାଜ୍ୟର ନିମ୍ନସ୍ତରର ଲୋକଙ୍କୁ ସ୍ୱାବଲମ୍ୱୀ କରିବା ହିଁ ପ୍ରକୃତ ବିକାଶ ବୋଲି ସେ  କହିଛନ୍ତି। ଅନ୍ୟତମ ଅତିଥି ଭାବେ ସିଵାଇଏସ୍‌ଡିର ସହପ୍ରତିଷ୍ଠାତା ଜଗଦାନନ୍ଦ କହିଛନ୍ତି ଯେ ନାଗରିକ ସମାଜ ହେଉଛି ରାଷ୍ଟ୍ରନିର୍ମାଣର ସୂତ୍ରଧର। ନାଗରିକ ସମାଜ ତଥା ଏନ୍‌ଜିଓ ବିଗତ ତିନି ଦଶନ୍ଧି ଧରି ତୃଣମୂଳସ୍ତର ବିକାଶ ପାଇଁ କାର୍ଯ୍ୟ କରୁଛନ୍ତି। କୋଭିଡ୍‌ ମହାମାରୀ , ପ୍ରାକୃତିକ ବିପର୍ଯ୍ୟୟ, ତୃଣମୂଳସ୍ତରରେ ବିକାଶ ପାଇଁ ନାଗରିକ ସମାଜ କରୁଥିବା ବହୁ କାର୍ଯ୍ୟକ୍ରମକୁ ମଧ୍ୟ ସରକାର ଗ୍ରହଣ କରିବା ସହିତ ଏହାକୁ ଆଗକୁ ବଢ଼ାଇଛନ୍ତି। ତେଣୁ ଏହି ସମାଜ ରାଜ୍ୟର ବିକାଶ ପାଇଁ ଆହୁରି ସକ୍ରିୟ ହେବା ସହିତ ଏଥିରେ ଯୁବପିଢ଼ି  ଯୋଗଦେବାକୁ ଆହ୍ବାନ ଦେଇଛନ୍ତି।

ଅନ୍ୟତମ ଅତିଥି ଭାବେ ସାମାଜିକ ସଂଗଠନ ‘ବାଣୀ’ର ସିଇଓ ହର୍ଷ ଜଇତିଲ ଯୋଗଦେଇ ସମାଜ ମଧ୍ୟରେ ଭିନ୍ନତାର ଦୂରୀକରଣ, ସୁସମ୍ପର୍କ ସ୍ଥାପନ ଓ ସୁସ୍ଥ ଜୀବନ ପାଇଁ ପରିବେଶ ସୃଷ୍ଟି କରିବା ନାଗରିକ ସମାଜର ଦାୟିତ୍ୱ ବୋଲି କହିଥିଲେ। ଏଥିସହିତ ନାଗରିକ ସମାଜ ତଥା ଏନ୍‌ଜିଓଗୁଡ଼ିକ ସାମ୍ନା କରୁଥିବା ପ୍ରତିବନ୍ଧକଗୁଡ଼ିକ ଉପରେ ସେ ବିସ୍ତୃତ ଆଲୋଚନା କରିଥିଲେ। ନାଗରିକ ସମାଜ ଉନ୍ନତ କାର୍ଯ୍ୟଗୁଡ଼ିକୁ ବିଭିନ୍ନ ମାଧ୍ୟମରେ ପ୍ରକାଶ କରାଗଲେ ସେମାନେ ଆହୁରି ଉତ୍ସାହିତ ହେବେ ବୋଲି ସେ କହିଥିଲେ।ଏହି ଅବସରରେ ପ୍ରଶ୍ନୋତ୍ତର କାର୍ଯ୍ୟକ୍ରମ ମଧ୍ୟ ଅନୁଷ୍ଠିତ ହୋଇଥିଲା। କାର୍ଯ୍ୟକ୍ରମରେ ରାଜ୍ୟର ବିଭିନ୍ନ ଜିଲ୍ଲାରୁ ବହୁ ସ୍ୱେଚ୍ଛାସେବୀ ଅନୁଷ୍ଠାନର କାର୍ଯ୍ୟକର୍ତ୍ତା ଯୋଗଦେଇ ଆଗାମୀ ଆହ୍ୱାନ ଓ ନୂତନ କାର୍ଯ୍ୟପନ୍ଥା ନିର୍ଦ୍ଧାରଣ ଉପରେ ଆଲୋଚନା କରିଥିଲେ।