ଖଣ୍ଡଗିରି: ବିଏମ୍‌ସି ୫୦ ନମ୍ବର ୱାର୍ଡ ଅନ୍ତର୍ଗତ ବରମୁଣ୍ଡା ଗ୍ରାମ ମହିମା ମିଶ୍ର ଲେନ୍‌ରୁ ନୀଳକଣ୍ଠେଶ୍ବର ମନ୍ଦିର ରାସ୍ତା ବିପର୍ଯ୍ୟସ୍ତ ହୋଇପଡ଼ିଛି। ଫଳରେ ଗତ ୩ ମାସ ହେବ ଲୋକ ବିଭିନ୍ନ ସମସ୍ୟା ଦେଇ ଗତି କରୁଛନ୍ତି। ପ୍ରଥମେ ୨ ମାସ ହେଲା ରାସ୍ତାକାମ ଚାଲୁଥିବାରୁ ଲୋକେ ହଇରାଣ ହେଉଥିବା ବେଳେ ଏବେ ମାସେ ହେବ କାମ ମନ୍ଥର ଗତିରେ ଚାଲିଥିବ‌ା ଅଭିଯୋଗ ହେଉଛି। ଅନ୍ୟପଟେ ରାସ୍ତା‌ରେ ଗତ ୭ଦିନ ହେଲା ଗଛ, ଡାଳ, ପତ୍ର, ଅଳିଆ ପଡ଼ି ରହିଛି। ଏହାକୁ ସଫା କରିବାକୁ ବିଏମ୍‌ସିକୁ ବାରମ୍ବାର ଅଭିଯୋଗ ହେଉଥିଲେ ‌ହେଁ ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇନାହିଁ। ଫଳରେ ରାସ୍ତା ସଂକୁଚିତ ହେଉଛି। 

Advertisment

ବିପର୍ଯ୍ୟସ୍ତ ଅବସ୍ଥାରେ ମହିମା ମିଶ୍ର ଲେନ୍‌-ନୀଳକଣ୍ଠେଶ୍ବର ମନ୍ଦିର ରାସ୍ତା
ମନ୍ଥର ଗତିରେ ଚାଲିଛି ରାସ୍ତା କାମ

ଏ ‌ନେଇ ସ୍ଥାନୀୟ ଜଣେ ବାସିନ୍ଦା କହିଛନ୍ତି, ବିଦ୍ୟୁତ୍‌ ବିଭାଗ କିଛିଦିନ ତଳେ ଡାଳ କାଟି ରାସ୍ତାରେ ପକାଇ ଦେଇଥିଲା। ହେଲେ ସେହିଦିନଠାରୁ ଡାଳ ସେମିତି ପଡ଼ି ରହିଛି। ‌ଏହାବାଦ୍‌ ଘର ଆଗରୁ ଅଳିଆ ଉଠୁନାହିଁ। ଏହା ଏବେ ରାସ୍ତା ତଳେ ଥିବା ପାଣି ପାଇପ୍‌କୁ ପ୍ରଭାବିତ କରିବା ଆରମ୍ଭ କଲାଣି। ଯଦି ବିଏମ୍‌ସି ପକ୍ଷରୁ ପ୍ରତିଦିନ ରାସ୍ତା ସଫେଇ ନହୁଏ ତେବେ ଅଞ୍ଚଳରେ ବିଭିନ୍ନ ସଂକ୍ରାମକ ରୋଗ ବ୍ୟାପିବା ଭୟ ରହୁଛି।

ସ୍ଥାନୀୟ କର୍ପୋରେଟର ରାମ ରଣସିଂହ କହିଛନ୍ତି, ଡ୍ରେନ୍‌ କାମ ଚାଲିଛି। ରାସ୍ତାକାମ ପ୍ରାୟ ସରିଗଲାଣି। ଆଉ ୧୦୦ ମିଟର ବାକିଅଛି। ପେଭର ବ୍ଲକ୍ କାମ ଆଉ ୧୫ ଦିନରେ ସରିଯିବ। ବର୍ଷା ବାଧକ ସାଜିଥିବାରୁ କାମରେ ବିଳମ୍ବ ହେଉଛି। ତେବେ ଘର ଆଗରୁ ସବୁ ଦିନ ଅଳିଆ ଉଠୁଛି। ଘରର ଅନ୍ୟ ସବୁଜ ଆବର୍ଜନା ପାଇଁ ଲୋକଙ୍କୁ ‘ସଫା ଆପ୍‌’ରେ ଆବେଦନ କରି ସଫା କରାଇବାକୁ ହେବ। ହେଲେ ଲୋକେ ତାହା କରୁନାହାନ୍ତି। ଏ ନେଇ ଅଭିଯୋଗ ପରେ ଖୁବ୍‌ଶୀଘ୍ର ସ୍ଥାୟୀ ସମାଧାନ କରାଯିବାକୁ ଯୋଜନା ହୋଇଛି।