ଦୁର୍ଘଟଣାରୁ ଅଳ୍ପକେ ବର୍ତ୍ତିଲା ସ୍କୁଲ ବସ୍‌: ବାଲିପାଟଣା ବଜାର-ସରିପୁର ରାସ୍ତା ପାଲଟିଛି ମରଣଯନ୍ତା

ବାଲିପାଟଣା: ବାଲିପାଟଣା ବଜାରରୁ ସରିପୁର ଗ୍ରାମକୁ ସଂଯୋଗ କରୁଥିବା ଗ୍ରାମ୍ୟ ଉନ୍ନୟନ ରାସ୍ତା ଏବେ ମରଣଯନ୍ତା ପାଲଟିଛି। ଆଜି ସକାଳୁ ସ୍କୁଲ୍‌ ପିଲାମାନଙ୍କୁ ନେଇ ଯାଉଥିବା ଏକ ସ୍କୁଲବସ୍ ବଡ଼ ଦୁର୍ଘଟଣାରୁ ଅଳ୍ପକେ ବର୍ତ୍ତି ଯାଇଛି। ଆଜି ସକାଳ ପ୍ରାୟ ୬ଟା ସମୟରେ ମେଳଣ ପଡିଆ ନିକଟରେ ନିର୍ମାଣାଧୀନ ଏକ ଦୋକାନଗୃହ ପୋତିବା ପାଇଁ ରାସ୍ତା କଡ଼ରେ ମାଟି ଗଦା ହୋଇଥିଲା। ମେସିନ ସାହାଯ୍ୟରେ ମାଟି ପୋତା କାମ ମଧ୍ୟ ଚାଲିଥିଲା। ସେହି ସମୟରେ ଖେଳପଡ଼ିଆ ପଟୁ ବିଜେଇଏମ୍ ସ୍କୁଲର ଏକ ବସ୍ ଛୋଟ ପିଲାମାନଙ୍କୁ ନେଇ ବଜାର ଆଡ଼କୁ ଆସୁଥିଲା। ରାସ୍ତା କଡ଼ରେ ଜେସିବି ମେସିନ୍‌କୁ ଅତିକ୍ରମ କରିବା ସମୟରେ ଗାଡ଼ିର ଡାହାଣ ପଟ ଦୁଇ ଚକା ତଳକୁ ଖସି ଯାଇଥିଲା ଓ ବାମ ପଟର ଚକା ଉପରକୁ ଅଳ୍ପ ଉଠି ଯାଇଥିଲା। ତେବେ ବସ୍ ଡ୍ରାଇଭର ଜଣକ କୌଣସି ମତେ ବସ୍‌କୁ ନିୟନ୍ତ୍ରଣ କରି ତୁରନ୍ତ ପିଲାମାନଙ୍କୁ ଓହ୍ଲାଇ ଦେଇଥିଲେ। ପାଖରେ ଜେସିବି ମେସିନ୍‌ ଥିବାରୁ ସ୍ଥାନୀୟ ଲୋକଙ୍କ ସହାୟତାରେ କୌଣସି ପ୍ରକାରେ ବସ୍‌କୁ ଟାଣି ଟାଣି ମୁଖ୍ୟ ରାସ୍ତାକୁ ଅଣାଯାଇଥିଲା। 

ଦୈନିକ ବହୁ ସଂଖ୍ୟକ ହାଇୱ‌ା ଏହି ଅଣଓସାରିଆ ରାସ୍ତାରେ ଯାତାୟାତ କରିବା ଫଳରେ ରାସ୍ତାର ଅବସ୍ଥା ଦିନକୁ ଦିନ ଅଧିକ ଶୋଚନୀୟ ହେବାରେ ଲାଗିଛି। ହେଲେ ପରିତାପର ବିଷୟ ଖେଳପଡିଆଠାରୁ ମେଲଣ ପଡ଼ିଆ ପ୍ରାୟ ୫ଶହ ମିଟର ରାସ୍ତାର ଦୁଇପଟେ ଗାର୍ଡ ୱାଲ୍ ନଥିବାରୁ ବର୍ଷାରେ ମାଟି ଧୋଇହୋଇ ଖାଲ ହୋଇ ଯାଇଛି। ଏମିତିକି ରାସ୍ତା ଉପରେ ଏକ ବାଇକ୍‌ ରହିଗଲେ ତାକୁ ଓଭରଟେକ୍‌ କରି ଚାରିଚକିଆ ଯାନ ଯିବା ଅସମ୍ଭବ। ବଡ ବଡ ରାଜନୈତିକ ସଭା ସମିତି ଏହି ଖେଳପଡିଆ ନଚେତ୍ ମେଳଣ ପଡ଼ିଆରେ ହୁଏ। ମାତ୍ର ରାସ୍ତା ପ୍ରତି ସମସ୍ତେ ଆଖି ବନ୍ଦ କରିଦେଇଛନ୍ତି। ତେବେ ଆଜିର ଘଟଣା ସମସ୍ତ ବୁଦ୍ଧିଜୀବୀଙ୍କୁ ଏଥିପାଇଁ ଚିନ୍ତା କରିବାକୁ ଏକ ରକମ ବାଧ୍ୟ କରିଛି। ମାତ୍ର ୩୦୦ ମିଟର ଦୂରରେ ବାଲିପାଟଣା ବ୍ଲକ୍‌ କାର୍ଯ୍ୟାଳୟ, ଥାନା, ତହସିଲ, କଲେଜ, ସ୍କୁଲ ରହିଛି। ରାସ୍ତା ଉପରେ ସମସ୍ତେ ନିର୍ଭର କରୁଥିଲେ ମଧ୍ୟ ଏହାର ମରାମତି ପାଇଁ କେହି ଯତ୍ନବାନ୍‌ ‌ହେଉନାହାନ୍ତି। ଯଦି ବସ୍‌ଟି ଦୁର୍ଘଟଣାଗ୍ରସ୍ତ ହୋଇଥାନ୍ତା, ତାହେଲେ କିଏ ଦାୟୀ ରହିବ ବୋଲି ପ୍ରଶ୍ନବାଚୀ ସୃଷ୍ଟି ହୋଇଛି। ତେଣୁ ଯୁଦ୍ଧକାଳୀନ ଭିତ୍ତିରେ ଏହି ରାସ୍ତା ନିର୍ମାଣ କରିବାକୁ ସ୍ଥାନୀୟ ବାସିନ୍ଦା ଦାବି କରିଛନ୍ତି।