ରାଷ୍ଟ୍ରପତିଙ୍କ ଗସ୍ତ ପୂର୍ବରୁ ଏମ୍‌ସରେ ସୁରକ୍ଷା ବ୍ୟବସ୍ଥାର ସମୀକ୍ଷା

ଖଣ୍ଡଗିରି: ଆସନ୍ତା ୧୪ ତାରିଖ(ସୋମବାର) ଦିନ ରାଷ୍ଟ୍ରପତି ଦେ୍ୗପଦୀ ମୁର୍ମୁ ଏମ୍‌ସ ଭୁବନେଶ୍ବରର ପଞ୍ଚମ ସମାବର୍ତ୍ତନ ଉତ୍ସବରେ ଯୋଗଦେବେ। ଏନେଇ ପ୍ରଶାସନ ପକ୍ଷରୁ ଏମ୍‌ସ ପରିସରରେ ସୁରକ୍ଷା ବ୍ୟବସ୍ଥାର ସମୀକ୍ଷା କରାଯାଇଛି। କେନ୍ଦ୍ର ଗୃହ ମନ୍ତ୍ରଣାଳୟର ଅଧିକାରୀମାନଙ୍କ ସହ ମୁଖ୍ୟ ଶାସନ ସଚିବ ମନୋଜ ଆହୁଜା, ରାଜ୍ୟ ଆରକ୍ଷୀ ମହାନିର୍ଦ୍ଦେଶକ ଯୋଗେଶ ବାହାଦୁର ଖୁରାନିଆ ପ୍ରମୁଖ ଏମ୍‌ସ ପରିଦର୍ଶନ କରିଛନ୍ତି। ଅଧିକାରୀମାନେ ସୁରକ୍ଷା ବ୍ୟବସ୍ଥା ସଂକ୍ରାନ୍ତରେ ବିସ୍ତୃତ ଭାବେ ସମୀକ୍ଷା କରିବା ସହ ଏମ୍‌ସ କାର୍ଯ୍ୟନିର୍ବାହୀ ନିର୍ଦ୍ଦେଶକ ଡା. ଆଶୁତୋଷ ବିଶ୍ବାସଙ୍କ ସହିତ ଆଲୋଚନା କରିଛନ୍ତି।

ଭୁବନେଶ୍ୱର-କଟକ ପୋଲିସ କମିସନର ଏସ୍‌ ଦେବଦତ୍ତ ସିଂହ କହିଛନ୍ତି, ସୁରକ୍ଷା, ଟ୍ରାଫିକ୍‌, ରୁଟ୍‌ଲାଇନିଂ ଓ ପ୍ରୋଟୋକଲ୍‌ ଅନୁଯାୟୀ ପଦକ୍ଷେପ ନିଆଯିବ। ୫୦ ପ୍ଲାଟୁନ୍‌ ପୁଲିସ ନିୟୋଜିତ ରହିବେ। ୮ଜଣ ଡିସିପି ପାହ୍ୟାର ଅଧିକାରୀ, ୧୧ଜଣ ଅତିରିକ୍ତ ଡିସିପି ପାହ୍ୟାର ଅଧିକାରୀ, ୩୧ଜଣ ଏସିପି ପାହ୍ୟାର ଅଧିକାରୀ, ୪୪ଜଣ ଇନିସ୍ପେକ୍ଟର୍‌ ଓ ୧୮୦ଜଣ ଏସ୍‌ଆଇ ଓ ଏଏସ୍‌ଆଇ ନିୟୋଜିତ ହେବେ। ଏହିଦିନ କଟକରେ ମଧ୍ୟ ରାଷ୍ଟ୍ରପତିଙ୍କ ବିଭିନ୍ନ କାର୍ଯ୍ୟକ୍ରମ ରହିଥିବାରୁ ଆବଶ୍ୟକ ସୁରକ୍ଷା ବ୍ୟବସ୍ଥା କରାଯିବ। ଆସନ୍ତାକାଲିଠାରୁ କାର୍‌କେଡ୍‌ ରହର୍ସାଲ୍‌ ଆରମ୍ଭ ହେବ ବୋଲି ଶ୍ରୀ ସିଂହ କହିଛନ୍ତି। ଅତିରିକ୍ତ ପୁଲିସ କମିସନର ନରସିଂହ ଭୋଳ, ଡିସିପି ଜଗମୋହନ ମୀନା, ଜୋନ୍‌-୩ ଏସିପି ତାପସ ପ୍ରଧାନ ଓ ଖଣ୍ଡଗିରି ଥାନାଧିକାରୀ ଅଭିମନ୍ୟୁ ଦାସଙ୍କ ସମେତ ବିଏମ୍‌ସିର ଅଧିକାରୀ ଓ ଏମ୍‌ସର ବରିଷ୍ଠ ଅଧିକାରୀ ଉପସ୍ଥିତ ଥିଲେ।