ଭୁବନେଶ୍ବର: ଅଙ୍କୁର ଫାଉଣ୍ଡେସନ୍ ତରଫରୁ ଲୁପ୍ତପ୍ରାୟ ଛାୟା କଣ୍ଢେଇ ନାଟକ ‘ରାବଣ ଛାୟା’ ର ପ୍ରଚାର ଓ ସଂରକ୍ଷଣ ପାଇଁ ଏକ ସ୍ବତନ୍ତ୍ର କର୍ମଶାଳା ବୁଦ୍ଧମନ୍ଦିର ପରିସରରେ ଆୟୋଜିତ ହୋଇଯାଇଛି। କର୍ମଶାଳାରେ ‘ରାବଣ ଛାୟା’ ନାଟକର ବିଶିଷ୍ଟ ଗୁରୁ ଗୌରାଙ୍ଗ ଚରଣ ଦାଶ ବିଭିନ୍ନ ବିଦ୍ୟାଳୟରୁ ଆସିଥିବା ଶିକ୍ଷକଙ୍କୁ ଏହି ଲୁପ୍ତପ୍ରାୟ କଳା ସମ୍ପର୍କରେ ତାଲିମ ଦେଇଥିଲେ।
Sambad is now on WhatsApp
Join and get latest news updates delivered to you via WhatsApp
ଏଥିରେ ଭାଷା , ସାହିତ୍ୟ ଓ ସଂସ୍କୃତି ବିଭାଗ ମନ୍ତ୍ରୀ ଅଶ୍ୱିନୀ କୁମାର ପାତ୍ର ମୁଖ୍ୟ ଅତିଥି, ବିଏମ୍ସି ମେୟର୍ ସୁଲୋଚନା ଦାସ, ସଂସ୍କୃତି ବିଭାଗର ଅତିରିକ୍ତ ସଚିବ ମଧୁସୂଦନ ଦାସ ଏବଂ ଶିକ୍ଷାବିତ୍ ସୌରୀନ୍ଦ୍ର ମହାପାତ୍ର ପ୍ରମୁଖ ସମ୍ମାନିତ ଅତିଥି ଭାବେ ଯୋଗଦେଇ ଏ ପ୍ରକାର କଳା ଆମ ସାମାଜିକ ଜୀବନର ଅଂଶ ହୋଇ ରହୁ ବୋଲି କହିଥିଲେ। ଶିକ୍ଷା ଓ କଳାର ସମ୍ପର୍କକୁ ନେଇ ବିଜୟ ଭାରତୀ ଶର୍ମା, ଚିନ୍ମୟୀ ସାହୁ ଏବଂ ଚନ୍ଦନ କୁମାର ସିଂହ ଆଲୋଚନା କରିଥିଲେ। କର୍ମଶାଳାକୁ ଆହୁରି ବ୍ୟାପକ କରିବା ସହ ଆଗାମୀ ଦିନରେ ସ୍କୁଲ୍ ପିଲାଙ୍କ ମଧ୍ୟରେ ଓଡ଼ିଶାର କଳା ଓ ସଂସ୍କୃତି ସମ୍ପର୍କରେ ଅଧିକ ସଚେତନତା ସୃଷ୍ଟି ପାଇଁ ଅଙ୍କୁର ଫାଉଣ୍ଡେସନ ତରଫରୁ ଉଦ୍ୟମ ଜାରି ରହିବ ବୋଲି ସମ୍ପାଦିକା ଚିନ୍ମୟୀ ପଣ୍ଡା କହିଛନ୍ତି। ଏଥିରେ ଖମାର ଗ୍ରାମର ରାବଣ ଛାୟା କଳାକାରମାନେ ଛାୟା ନାଟକ ପରିବେଷଣ କରିଥିଲେ।