ଭୁବନେଶ୍ବର: ନିର୍ମାତା ତଥା ନିର୍ଦ୍ଦେଶକ ଅନୁପମ ପଟ୍ଟନାୟକଙ୍କ ନେତୃତ୍ୱରେ ‘ମନ୍ତ୍ରମୁଗ୍ଧ’ ଚଳଚ୍ଚିତ୍ରର ସୁଟିଂ ଭୁବନେଶ୍ୱର ସିମ୍ଫୋନି ମଲ୍‌ରେ ଆରମ୍ଭ ହୋଇଛି। ସୁଟିଂ ଆରମ୍ଭ ହେବା ପୂର୍ବରୁ ଚଳଚ୍ଚିତ୍ରର ପୂରା ଟିମ୍‌ ପୁରୀ ଯାଇ ପ୍ରଭୁ ଶ୍ରୀଜଗନ୍ନାଥଙ୍କ ଆଶୀର୍ବାଦ ନେଇଛନ୍ତି। ଏହା ଏକ ରୋମାଞ୍ଚ ଓ ହାସ୍ୟରସାତ୍ମକ ସିନେମା ଭାବେ ଓଡ଼ିଆ ସିନେମାର କାହାଣୀରେ ନୂଆ ଫର୍ଦ୍ଦ ଯୋଡ଼ିବାକୁ ଯାଉଛି। ଅମୀୟ ପଟ୍ଟନାୟକ ପ୍ରଡକ୍ସନ ବ୍ୟାନରରେ ବର୍ଷା ପଟ୍ଟନାୟକ ଏହାର ପ୍ରଯୋଜନା ଭାର ସମ୍ଭାଳିଛନ୍ତି। ପ୍ରଥମ ଥର ପାଇଁ ଭୂମିକା ଦାଶ ପ୍ରଯୋଜନା ସଂସ୍ଥା ସହ ଯୋଡ଼ି ହୋଇଥିବା ବେଳେ ‘କର୍ମ’ରେ ନିଜର ଅଭିନୟର ଯାଦୁ ଦେଖାଇଥିବା ଅଭିନେତ୍ରୀ ସୂର୍ଯ୍ୟମୟୀ ମହାପାତ୍ର ଏଥିରେ ଦମ୍‌ଦାର୍‌ ଭୂମିକାରେ ଆସିବେ। କାହାଣୀ ଅନୁପମ ଓ ରୋଶନ ବିଶୋଇ ଲେଖିଥିବା ବେଳେ ଏହାକୁ ଚିତ୍ରନାଟ୍ୟରେ ସଜାଇଛନ୍ତି ରୋହିତ ଗେହ୍‌ଲଟ ଓ ଅନୁପମ। ଅଭିନେତା ଦ୍ବୀପନ୍ବିତ ଦାଶ ମହାପାତ୍ରଙ୍କ ସହ ‘କର୍ମ’ ଚଳଚ୍ଚିତ୍ରରେ ନିଜ ଅଭିନୟର ଯାଦୁ ଦେଖାଇଥିବା ଅଭିନେତା ସନୋଜ କୁମାର ଓ ମନ୍ମୟ ଦେଙ୍କ ଉପରେ ପୁଣି ଥରେ ଭରସା କରିଛନ୍ତି ଅନୁପମ। ଅନ୍ୟ ପ୍ରମୁଖ କଳାକାରଙ୍କ ମଧ୍ୟରେ ହର ରଥ, ଚୌଧୁରୀ ଜୟପ୍ରକାଶ ଦାସ, ନିଶାନ୍ତ ମାଜିଥିଆ, ସୋମା ହୋତା ଓ ଭକ୍ତି ଦାସ ରହିଛନ୍ତି। ଟେଲି ଅଭିନେତ୍ରୀ ପିହୁ ମହାପାତ୍ର ଓ ଡିଜିଟାଲ କ୍ରିଏଟର୍‌ ମିଷ୍ଟର ରାଉତ ବି ସିନେମାରେ ନଜର ଆସିବେ। ଚିତ୍ରନାଟ୍ୟ ଓ ସଂଳାପର ଅତିରିକ୍ତ ଦାୟିତ୍ବରେ ଅଛନ୍ତି ନିଶାନ୍ତ ମାଜିଠିଆ। ଆଶିଷ ପ୍ରଧାନ, ଅନୁରାଗ ପଟ୍ଟନାୟକ, ସଂଗୀତ ପଟ୍ଟନାୟକ, ଅନୁରାଗ ପଣ୍ଡା ଓ ରୌମ୍ୟରାଜ ପ୍ରଧାନ ପ୍ରମୁଖ ୫ ଜଣ ସଙ୍ଗୀତ ନିର୍ଦ୍ଦେଶକ ଏଥିରେ ସଙ୍ଗୀତ ନିର୍ଦ୍ଦେଶନା ଦେଇଛନ୍ତି। ଚଳଚ୍ଚିତ୍ରର ସିନେମାଟୋଗ୍ରାଫର ଅଛନ୍ତି ଦୀପକ କୁମାର। ରଶ୍ମିରଞ୍ଜନ ଦାଶ ସମ୍ପାଦନାରେ ଥିବା ବେଳେ ସାଉଣ୍ଡ ଡିଜାଇନର ଦାୟିତ୍ୱ ନିର୍ବାହ କରିଛନ୍ତି ଶକ୍ତି ସ୍ୱରୂପ ଦ୍ବିବେଦୀ। ସଂଳାପ ରଚନା କରିଛନ୍ତି ପ୍ରଣବ ରଥ।