ଗ୍ରାହକଙ୍କୁ ଲୁଟୁଛନ୍ତି ସପିଂ ମଲ୍ : ପାର୍କିଂ ଫି’ ଆଦାୟ କରିବାକୁ ନିୟମ ନାହିଁ, ବିଏମ୍ସି କି କମିସନରେଟ୍ ପୁଲିସ କେହି କାର୍ଯ୍ୟାନୁଷ୍ଠାନ ନେଉନାହାନ୍ତି, ରାଜଧାନୀବାସୀଙ୍କ ଜୀବନ ଦୁର୍ବିସହ କଲାଣି ମଲ୍ ସମ୍ମୁଖ ରାସ୍ତା
ଭୁବନେଶ୍ବର : ସପିଂ ମଲ୍ଗୁଡ଼ିକରେ ଯେପରି ପର୍ଯ୍ୟାପ୍ତ ପରିମାଣର ଗାଡ଼ି ପାର୍କିଂ ହୋଇପାରିବ, ଟ୍ରାଫିକ ସମସ୍ୟା ସୃଷ୍ଟି ହେବନି, ସବୁଠି ପର୍ଯ୍ୟାପ୍ତ ପାର୍କିଂ ବ୍ୟବସ୍ଥା ରହିବ ସେଥିପାଇଁ ବିଡିଏ ପକ୍ଷରୁ ସପିଂ ମଲ୍ ନିର୍ମାଣ ସମୟରେ ପାର୍କିଂ ପାଇଁ ନିର୍ମାଣ ହେଉଥିବା ଅଞ୍ଚଳ ବାବଦକୁ କୌଣସି ଫି’ ନିଆଯାଉନି। ଏପରିକି ମଲ୍ର ମୋଟ୍ ନିର୍ମାଣ ହିସାବରେ ପାର୍କିଂ ଅଞ୍ଚଳକୁ ଅତିରିକ୍ତ ଭାବେ ଯୋଡ଼ା ଯାଉଛି। ହେଲେ ରାଜଧାନୀର ସମସ୍ତ ସପିଂ ମଲ୍ ଏବେ ଗ୍ରାହକଙ୍କୁ ଲୁଟିବା ପାଇଁ ଗାଡ଼ି ପାର୍କିଂ ବାବଦକୁ ଫି’ ଆଦାୟ କରୁଛନ୍ତି। ରାଜଧାନୀର ପ୍ରାୟ ୧୦ରୁ ଅଧିକ ସପିଂ ମଲ୍ ଏବେ ଖୋଲାଖୋଲି ସରକାରଙ୍କ ଆଖିରେ ଆଙ୍ଗୁଠି ଗେଞ୍ଜି ଲୁଟୁଥିବାରୁ ଏବେ ରାଜରାସ୍ତାରେ ବେଆଇନ ପାର୍କିଂ ବଢ଼ିବାରେ ଲାଗିଛି।
Sambad is now on WhatsApp
Join and get latest news updates delivered to you via WhatsApp
ରାଜଧାନୀରେ ଯେଉଁଭଳି ରାସ୍ତାର ଓସାର ଅଛି, ଯେତିକି ଗାଡ଼ି ଚଳାଚଳ କରୁଛି ସେଥିରେ କୌଣସି ସ୍ଥାନରେ ଟ୍ରାଫିକ୍ ଜାମ୍ ହେବାର ସମ୍ଭାବନା ନାହିଁ। ହେଲେ ସ୍ଥିତି ଓଲଟା। ଜନପଥରୁ ଆରମ୍ଭ କରି କଟକରୋଡ୍ ପର୍ଯ୍ୟନ୍ତ ସବୁଠି ଅସମ୍ଭାଳ ଟ୍ରାଫିକ ଜାମ୍ ହେଉଛି। ସବୁଠୁ ଅଧିକ ଜାମ୍ ତ ସପିଂ ମଲ୍ ସମ୍ମୁଖରେ ହେଉଛି। ତାହା ପୁଣି ବେଆଇନ୍ ପାର୍କିଂ ପାଇଁ। ଯାହା ରାଜଧାନୀବାସୀଙ୍କ ଜୀବନ ଦୁର୍ବିସହ କରିଦେଲାଣି। ମଲ୍ ସମ୍ମୁଖରେ ୧୦୦ମିଟର ପର୍ଯ୍ୟନ୍ତ ରାସ୍ତାକୁ ଅତିକ୍ରମ କରିବାକୁ ୧୦ରୁ ୧୫ମିନିଟ ଲାଗି ଯାଉଛି। ବେଳେବେଳ ତ ଏହା ଅଧଘଣ୍ଟାରୁ ଅଧିକ ସମୟ ଲାଗୁଛି।
ରାଜଧାନୀବାସୀ ପ୍ରତିଦିନ ଏହିଭଳି ଦହଗଞ୍ଜ ହେଉଛନ୍ତି। ହେଲେ କମିସନରେଟ୍ ପୁଲିସ ନା ବିଏମ୍ସି କେହି ଏଥିପ୍ରତି ତତ୍ପରତା ଦେଖାଉ ନାହାନ୍ତି। ଦୁଇଟି ସଂସ୍ଥା ହାତରେ ଏନଫୋର୍ସମେଣ୍ଟର ଦାୟିତ୍ବ ଥିଲେ ବି ସମସ୍ତେ ହାତ ବାନ୍ଧି ବସି ଯାଇଛନ୍ତି। କାହିଁକି ବିଏମ୍ସି ଓ କମିସନରେଟ୍ ପୁଲିସ ଏ ଦିଗରେ ପଦକ୍ଷେପ ନେଉନାହାନ୍ତି ତାହା ଏବେ ସମସ୍ତଙ୍କର ପ୍ରଶ୍ନ। ହେଲମେଟ୍ ନପିନ୍ଧି ବାଇକ୍ ଚଳାଉଥିବା, ସିଟ୍ ବେଲ୍ଟ ନପିନ୍ଧି କାର୍ ଚଳାଉଥିବା ଲୋକଙ୍କୁ ପୁଲିସ ମାଡ଼ି ବସି ଜରିମାନା ଆଦାୟ କରୁଛି। ଯିଏ ପରିବାରର ଗୁଜୁରାଣ ମେଣ୍ଟାଇବା ପାଇଁ ରାସ୍ତା କଡ଼ରେ ବସି କିଛି ବେପାର କରୁଛି ତାର ଠେଲା ଗାଡ଼ିକୁ ବିଏମ୍ସି ଉଠାଇ ନେଉଛି। ହେଲେ ରାଜରାସ୍ତା ଉପରେ ବେଆଇନ ଭାବେ ପାର୍କିଂ ହେଉଥିବା ଗାଡ଼ି ଉପରେ ବିଏମ୍ସି କି କମିସନରେଟ୍ ପୁଲିସର ନଜର ପଡ଼ୁନି।
ବିଡିଏର ନିୟମ ଅନୁଯାୟୀ, ରାଜଧାନୀରେ ସପିଂ ମଲ୍ ନିର୍ମାଣ ସମୟରେ ବିଡିଏରେ ଯେତେବେଳେ ପ୍ଲାନ୍ ପାଇଁ ସଂସ୍ଥା/ ବ୍ୟକ୍ତିଙ୍କ ପକ୍ଷରୁ ଆବେଦନ କରାଯାଉଛି ସେଥିରେ ପାର୍କିଂ ପାଇଁ ମୋଟ୍ ନିର୍ମାଣର ୫୦% ଜାଗା ଛାଡ଼ିବାକୁ କୁହାଯାଉଛି। ଅର୍ଥାତ୍ ଯେତିକି ଅଞ୍ଚଳରେ ମଲ୍ ଖୋଲିବ ତା’ର ଅଧା ଅଞ୍ଚଳରେ ଗାଡ଼ି ପାର୍କିଂ ପାଇଁ ବ୍ୟବସ୍ଥା ରହିବ। ବ୍ୟାବସାୟିକ ପ୍ରତିଷ୍ଠାନକୁ ସାଧାରଣ ଲୋକ ଆସିବାକୁ ଥିବାରୁ ସେମାନଙ୍କୁ ସେବା ଯୋଗାଇବା ପାଇଁ ଏବଂ ଅଗ୍ନିଶମ ସୁରକ୍ଷା ବ୍ୟବସ୍ଥା ଦୃଷ୍ଟିରୁ ଏହାକୁ କରାଯାଇଛି। ତେଣୁ ବିଡିଏ ଉକ୍ତ କୋଠା ନିର୍ମାଣର ଫ୍ଲୋର୍ ଏରିଆ ରେସିଓ (ଏଫ୍ଏଆର୍) ପାଇଁ ଯେଉଁ ଦେୟ ନିଏ ସେଥିରେ ପାର୍କିଂ ପାଇଁ ନିର୍ମାଣ ହୋଇଥିବା ଅଞ୍ଚଳର ଏଫ୍ଏଆର୍ ବାବଦକୁ ଫି’ ନିଏ ନାହିଁ। ଏପରିକି ଏହା ଅତିରିକ୍ତ ଏଫ୍ଏଆର୍ ହିସାବରେ ଗଣତି ହୁଏ।
ବିଡିଏ ସାଧାରଣ ଲୋକଙ୍କ ସୁବିଧା ପାଇଁ, ରାସ୍ତାରେ ବେଆଇନ ପାର୍କିଂ ନହେବା ପାଇଁ ସପିଂ ମଲ୍ଗୁଡ଼ିକୁ ଲକ୍ଷଲକ୍ଷ ଟଙ୍କା ରାଜସ୍ବ ଛାଡ଼ କରୁଥିବାବେଳେ ଅଧିକ ନିର୍ମାଣ କରିବାକୁ ନିୟମ କରିଛି। ହେଲେ ସପିଂ ମଲ୍ଗୁଡ଼ିକ ଏହି ନିୟମ ମାନୁନାହାନ୍ତି। ସବୁଠି ଲୋକଙ୍କୁ ଶୋଷଣ କରାଯାଉଛି। ଫଳରେ ଲୋକମାନେ ରାସ୍ତା ଉପରେ ବେଆଇନ୍ ପାର୍କିଂ କରୁଛନ୍ତି। ଯାହା ରାଜଧାନୀର ଏକ ବଡ଼ ସମସ୍ୟା ପାଲଟି ଯାଇଛି।
ଆଶ୍ଚର୍ଯ୍ୟର ବିଷୟ ରାଜଧାନୀର ବହୁ ସପିଂ ମଲ୍ର ବେସ୍ମେଣ୍ଟରେ ପାର୍କିଂ ପାଇଁ ଜାଗା ଥିବାବେଳେ ସେଥିରୁ ଅଧିକାଂଶ ଗୋଦାମ ଘର ଭାବେ ବ୍ୟବହାର ହେଉଛି। କେତେକ ସ୍ଥାନରେ ୫୦ଟି କାର୍ ପାର୍କିଂ ପାଇଁ ବ୍ୟବସ୍ଥା ଥିବାବେଳେ ସେଠାରେ ଦୋଷ ଛଡ଼ାଇବା ପାଇଁ ୫ରୁ ୭ଟି କାର୍ ପାର୍କିଂ ପାଇଁ ଜାଗା ଛାଡ଼ି ବାକି ସ୍ଥାନରେ ଗୋଦାମ ଘର କରିଦିଆଯାଇଛି। ଆଉ କିଛି ସ୍ଥାନରେ ଏମିତି ଜାଗା ଛଡ଼ା ଯାଇଛି ଯେ, ଗାଡ଼ି ଥରେ ପୂରାଇଲେ ବାହାର କରିବା କଷ୍ଟକର ହୋଇଯାଉଛି। ଗାଡ଼ି ବାହାର କଲା ବେଳକୁ ଆଗ ପଟ ନଚେତ୍ ପଚ ପଟ ଘଷି ହୋଇ ଭାଙ୍ଗି ଯାଉଛି। ଫଳରେ ଲୋକ ଭୟରେ ଏହା ଭିତରେ ଗାଡ଼ି ପୂରାଉ ନାହାନ୍ତି। ଅଧିକ ପାର୍କିଂ ଫି’ ଏବଂ ଗାଡ଼ି ନଷ୍ଟ ହେବାର ଭୟରେ ଲୋକ ରାସ୍ତା ଉପରେ ଗାଡ଼ି ପାର୍କିଂ କରୁଛନ୍ତି।
ବେଆଇନ ପାର୍କିଂ ନହେବା ପାଇଁ ରାଜଧାନୀର ବିଭିନ୍ନ ହୋଟେଲ, ସିନେମା ହଲ୍ ମାଗଣାରେ କାର୍ ପାର୍କିଂ କରାଉଥିବାବେଳେ ସପିଂ ମଲ୍ଗୁଡ଼ିକ କାହିଁକି ମାଗଣାରେ ପାର୍କିଂ ପାଇଁ ସୁବିଧା ନଯୋଗାଇବେ ବୋଲି ପ୍ରଶ୍ନ ଉଠିଲାଣି। ଭୁବନେଶ୍ବରର ଖାରବେଳ ନଗର, ସହିଦନଗର, ରସୁଲଗଡ଼ ଛକ ନିକଟସ୍ଥ, ଇସ୍କନ୍ ମନ୍ଦିର ନିକଟସ୍ଥ ଏବଂ ପଟିଆ ଅଞ୍ଚଳରେ ଥିବା ବିଭିନ୍ନ ସପିଂ ମଲ୍ ସମ୍ମୁଖରେ ଏବେ ରାସ୍ତା ଉପରେ ଗାଡ଼ି ପାର୍କିଂ ହେଉଥିବାରୁ ଏହି ରାସ୍ତା ଅତିକ୍ରମ କରିବା ଏବେ ଲୋକଙ୍କ ପାଇଁ କଷ୍ଟକର ହୋଇପଡ଼ୁଛି। ଏପରିକି କୌଣସି ଜରୁରୀ କାର୍ଯ୍ୟରେ ଯାଉଥିବା ଲୋକ, ଆମ୍ବୁଲାନ୍ସ, ଅଗ୍ନିଶମ ବିଭାଗ ଗାଡ଼ି ଏଥିରେ ବିଭିନ୍ନ ସମୟରେ ଫସିଯାଉଥିବା ଦେଖିବାକୁ ମିଳୁଛି କିନ୍ତୁ ଏନେଇ କାହାର ନଜର ନାହିଁ।
ରାସ୍ତାରେ ବେଆଇନ୍ ପାର୍କିଂ ବଢ଼ି ଚାଲିଥିବାେବଳେ ଏନେଇ ବିଏମ୍ସି କିଛି ବି ପଦକ୍ଷେପ ନେଉନି। ବିଏମ୍ସିର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ବେଆଇନ ଭାବେ ରାସ୍ତାରେ ଯେଉଁ ଗାଡ଼ି ପାର୍କିଂ ହେଉଛି ତାହାକୁ ଜବତ କରିବା ଏବଂ ଜରିମାନା ଆଦାୟ କରିବା କାର୍ଯ୍ୟ କମିସନରେଟ୍ ପୁଲିସର। ବିଏମ୍ସି ଏନେଇ କିଛି କରିପାରିବନି। ସପିଂ ମଲ୍ ପାର୍କିଂ ଫି’ ଆଦାୟ କରିବେ କି ନାହିଁ ସେନେଇ ତଦାରଖ କରିବା ଦାୟିତ୍ବ ଆମର ନୁହେଁ।
ସେହିପରି ଟ୍ରାଫିକ ଏସିପି କହିଛନ୍ତି ଯେ, ସପିଂ ମଲ୍ ସମ୍ମୁଖରେ ବେଆଇନ ଭାବେ ଗାଡ଼ି ପାର୍କିଂ ହେଉଥିବା ଆମ ନଜରକୁ ଆସିଛି। ତେଣୁ ଆମେ ଜରିମାନା ଆଦାୟ କରୁଛୁ। ଏନେଇ ପୁଲିସ, ବିଏମ୍ସି ଓ ବିଡିଏ ମିଳିତ ଭାବେ ପଦକ୍ଷେପ ନେଲେ ଏହାର ସ୍ଥାୟୀ ସମାଧାନ ହୋଇପାରିବ।
କେବଳ ସପିଂ ମଲ୍ ନୁହେଁ ଜନପଥରେ ଥିବା ବିଭିନ୍ନ ସୋରୁମ୍ ଏବଂ ଦୋକାନ ଗୁଡ଼ିକରେ ବେସ୍ମେଣ୍ଟ ପାର୍କିଂ ପାଇଁ ସ୍ଥାନ ସଂରକ୍ଷଣ ଥିଲେ ହେଁ ସେମାନେ ଏହାକୁ ମାନୁନାହାନ୍ତି। ପାର୍କିଂ ସ୍ଥାନରେ ଦୋକାନ କରିଦେଇଛନ୍ତି। ଫଳରେ ରାସ୍ତା ଉପରେ ଗାଡ଼ି ପାର୍କିଂ ହେଉଛି। ଏହାର ବି ସମାଧାନ ହେବା ଦରକାର।